جامبىل وبلىسىندا ايمانتوبە اۋىلدىق مەشىت جانىنان ءدامحانانىڭ اشىلدى. بۇل يگىلىكتى شاراعا وبلىستىق ورتالىق مەشىتتىڭ جاڭا تاعايىندالعان باس يمامى قانات جۇماعۇلوۆ ارنايى قاتىستى دەپ جازادى Qamshy.kz اقپارات اگەنتتىگى. 

ايناداي تازا، سىرتقى-ىشكى كورىنىسى بىردەي كوز تارتارلىق عيبادات ورنىنا كوڭىلى تولعاندىعىن بىلدىرگەن باس يمام كوپشىلىككە ءبىرسىپىرا ءدىني ۋاعىز ايتا كەلە، جاڭا اشىلعان ءدامحانانىڭ قۇرىلىمىنا دا ريزا ەكەندىگىن جوعارى ىقىلاسپەن اتاپ ءوتتى.

جيىن بارىسىندا اۋداندىق «بايزاق بابا» مەشىتىنىڭ باس يمامى راميز ازيزوۆ ايمانتوبە اۋىلىندا اشىلىپ وتىرعان بۇل ءدامحانانىڭ جىلدىڭ قاي مەزگىلىندە بولماسىن، ەل يگىلىگىنە قىزمەت جاساي بەرەتىنى، اسىرەسە، قۇربان ايت، ورازا ايت مەرەكەلەرىن، اۋىز اشار، قۇدايى تاماق تاراتۋ ءىس-شارالارىن وتكەرۋگە وتە ىڭعايلى ورىن بولعانىنا توقتالدى. سونىمەن قاتار، ول وسى ءدامحانا قۇرىلىسىنىڭ ويدان شىعارلىق دارەجەدە بولۋىن قامتاماسىز ەتكەن ايمانتوبە اۋىلىنىڭ اتپال ازاماتى، بەلگىلى كاسىپكەر ايان لەسبەكۇلىنا دەگەن ريزاشىلىعىن باسا-باسا ايتىپ ءوتتى.

تۋعان جەردىڭ تۋىن جوعارى ۇستاپ، جيعان-تەرگەنىنەن اۋىلىنىڭ كەرەگىنە جاراتۋدا ايانبايتىن كاسىپكەر ايان لەسبەك ۇلى شات كوڭىلدە تۇرىپ، «بارلىق ماقتاۋلار مەن شۇكىرلىكتەر جاراتقان اللاعا بولسىن. مەن وسى اۋىلدىق مەشىتتى سالعان كەرىمجان جاپار ۇلى اعامىزدىڭ ەڭبەگى ەرەكشە ەكەنىن، ال سوسىن عيبادات ءۇيى جۇمىسىنىڭ جاندانۋىنا جانە جۇرتتى يماندىلىققا شاقىرۋدا تىنباي ءىس اتقارىپ كەلە جاتقان اۋىل يمامى كەنجەحان راحمانوۆ باۋىرىمىزعا اللا رازىلىعىن تىلەيمىن. اللاعا شۇكىر، اۋىل ادامدارىنىڭ، سونىڭ ىشىندە جاستاردىڭ اۋىزبىرلىگىنىڭ ارتۋى ارقاسىندا مىنەكي ءدامحانا دا اشىلدى. كوپتەپ-كومەكتەپ، دەگەندەي، ءسوز ەتىپ وتىرعان ءدامحانانىڭ نەگىزگى دەمەۋشىلەرى بولعان كاسىپكەرلەر ك.ديداربەكوۆ، م.توقتاربايەۆ، ءا.تولەپبايەۆ، اعايىندى مارات، مۇرات قاسىموۆتار جانە شارۋا قوجالىق يەلەرى ت.امانبايەۆ، ب.نۇرجىگىتوۆتارمەن بىرگە قۇرىلىستى باستاپ اياعىنا دەيىن ءساتتى الىپ شىققان ج.شورتانبايەۆتىڭ ەسىمدەرىن جىلى سوزبەن اتاپ وتكەن ارتىق ەمەس. وسى بىرلىك، وسى تۇسىنىستىكتى كەيىنگى ۇرپاق بويىنان دا كورەرمىز دەپ ۇمىتتەنەمىن. ويتكەنى يمانى ۇيىعان ەلدە، ءونىمدى تىرلىك وركەندەي بەرمەك»،-دەپ ءسوزىن اياقتادى، ەل ىسىنە جاراپ جۇرگەن كاسىپكەر ايان مىرزا.

شىنىندا دا، 200 ادام ەركىن وتىرىپ ءبىر مەزگىلدە تاماقتانۋعا لايىق كەڭ ءدامحانانىڭ ىشكى جاساۋى: ستول مەن ورىندىقتارى ىڭعايلى، تەرەزە، ەسىكتەرى دە زاماناۋي پلاستيك دۇنيەلەردەن جاسالعاندىقتان بارلىعى ءبىر-بىرىن تولىقتىرىپ جاراسىمىن جاريالاپ-اق تۇر.

ءدامحانانىڭ اشىلۋ قۇرمەتىنە جايىلعان داستارحان باسىندا وبلىستىق مەشىتتىڭ باس يمامى قانات جۇماعۇلوۆ قۇران وقىپ، اۋىل قاريالارى باتا بەرىستى.

جاقسىلىققا جيىلعان جۇرت بىتكەن ىسكە بىركىسىدەي ريزاشىلىق ءبىلدىرىسىپ تارقادى.