قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، "Nur Otan" پارتياسى دەپۋتاتتىق فراكسياسىنىڭ مۇشەسى مارات بوپازوۆ جامبىل وبلىسىندا جۇمىس ساپارىمەن بولىپ، اۋدانداردى ارالادى دەپ جازادى Qamshy.kz اقپارات اگەنتتىگى. 

مارات دارىبەك ۇلىنىڭ جۇمىس ساپارى الدىمەن بايزاق اۋدانىنداعى قىزىل جۇلدىز اۋىلدىق وكرۋگىندە ورنالاسقان "Rola-7" جاۋاپكەرشىلىگى شەكتەۋلى سەرىكتەستىگىنىڭ تىنىس-تىرشىلىگىمەن تانىسۋدان باستالدى. ون جىلدان استام ۋاقىتتان بەرى ماكارون، كەسپە، جايما، چابرەس جانە ۇن ونىمدەرىن وندىرۋمەن اينالىسىپ كەلە جاتقان سەرىكتەستىك بۇگىندە ءبىر ءجۇز وتىزدان استام ادامدى جۇمىسپەن قامتىپ وتىر. تاۋلىگىنە وتىز توننا ۇن جانە ماكارون ونىمدەرىن شىعاراتىن ۇجىم ءوز ونىمدەرىن ەل اۋماعىنان بولەك رەسەي مەن قىرعىزستان ەلىنە ەكسپورتتاپ كەلەدى. وتكەن جىلى "كەپىلدەمە" تەتىگى بويىنشا "رەسەي جيناق بانكى" اق-نان اينالىم قورىن تولىقتىرۋعا 60،0 ميلليون تەڭگە قارجى العان. اتالمىش سەرىكتەستىك "بيزنەستىڭ جول كارتاسى - 2020" باعدارلاماسىنىڭ ارقاسىندا 2016 جىلى "پايىزدىق ستاۆكانى سۋبسيديالاۋ" تەتىگى ارقىلى "حالىق بانكى" اق-ىنان ون ءتورت پايىزبەن جالپى سوماسى 165،5 ميلليون تەڭگە نەسيە الىپ، سەح قۇرىلىسىن تۇرعىزىپ، وعان كەرەكتى قۇرال-جابدىقتار ساتىپ العان.

ماجىلىسمەن توقتاعان كەلەسى نىسان كوكونىس، الما، ءداندى داقىلدار، مال ازىعى، ەت پەن ءسۇت، شۇجىق جانە ءسۇت ونىمدەرىن شىعارۋمەن اينالىساتىن "اگالي" شارۋا قوجالىعى بولدى. مۇندا ءسۇت سەحىنىڭ جۇمىس بارىسىنا كۋا بولعان مارات بوپازوۆ شارۋالاردى تولعاندىرىپ جۇرگەن ماسەلەلەر توڭىرەگىندە سۇحباتتاستى. شارۋا قوجالىق جەتەكشىسى نابي اگالييەۆ قوسالقى شارۋاشىلىق ارقىلى اتقارىلعان جۇمىستار، الداعى جوسپارلارىمەن ءبولىستى.

حالىق قالاۋلىسى بۇدان سوڭ جەكە كاسىپكەر ۆلاديمير لەسنياكتىڭ "مولوچنىي بيدونچيك" ءسۇت وڭدەۋ سەحىنا باردى. ءسۇت، ايران، قايماق، ماي، ىرىمشىك، سۇزبە، يوگۋرت سىندى ءسۇت ونىمدەرىنىڭ ون سەگىز ءتۇرىن شىعارۋمەن شۇعىلداناتىن سەحتا بۇگىندە ونعا تارتا ادام ەڭبەك ەتەدى. ساپالى ونىمگە سۇرانىس جوعارى بولعاندىقتان بولار، مۇنداعى وڭدەلگەن ونىمدەر الماتى مەن تاراز قالالارى جانە وبلىس اۋماعىنداعى بالاباقشالار، ەمدەۋ مەكەمەلەرىنە، سونداي-اق، ورتالىق بازارلار مەن ساۋدا ورىندارىنا شىعارىلۋدا ەكەن.

دەپۋتات مارات دارىبەك ۇلى ءوزى ارالاعان ۇجىمدارداعى قايناعان تىرلىككە رازى بولعاندىعىن جەتكىزدى. «ماڭىزدىسى حالىقتىڭ الەۋمەتتىك جاعدايىنىڭ جاقسى بولۋى. ءبارى دە ءوزىمىزدىڭ قولىمىزدا. سول ءۇشىن سانامىزدى وزگەرتىپ، ەڭبەكتەنە ءبىلۋىمىز كەرەك»،-دەگەن ماجىلىسمەن شارۋالار قاۋىمىنىڭ ەڭبەكتەرىنە تابىستار تىلەدى.