جامبىل وبلىسىنىڭ وندىرىستىك الەۋەتىن بۇگىندە تورتكۇل الەم تانيتىنى بەلگىلى. «قازفوسفات»، «اقباقاي»، «حانتاۋ»، «مىڭارال» سىندى كاسىپورىندارىنىڭ شىعارعان ونىمدەرى ورتا ازيا مەملەكەتتەرىنە عانا ەمەس، تەڭىز اسىپ، اقش، بىرىككەن اراب امىرلىكتەرىنە دە جەتۋدە. بۇل ءسوز جوق اۋليەاتانىڭ ەكسپورتتىق الەۋەتىن ارتىرىپ جاتقانى انىق دەپ جازادى  Qamshy.kz اقپارات اگەنتتىگى

ءوڭىر وندىرىسىنە جۋالى اۋدانى دا ولشەۋسىز ۇلەس قوسۋدا.

جۋالى اۋدانىندا ءبىرقاتار ءوندىرىس وشاقتارى جۇمىس جاساپ، ناتيجەسىندە ونەركاسىپ ونىمدەرىن شىعارىپ وتىرعان كاسىپورىندار 2019 جىلدىڭ قاڭتار-ماۋسىم ايلارىندا 4 472،2 ملن. تەڭگەنىڭ ونىمدەرىن ءوندىرىپ، (2018 جىلى 2 860،1 ملن. تەڭگە) وتكەن جىلدىڭ وسى كەزەڭىمەن سالىستىرعاندا وندىرىلگەن ءونىمنىڭ ناقتى كولەم يندەكسى 103،8 پايىزدى قۇرادى. وبلىس بويىنشا 2ء-شى ورىندا.

2019 جىلدىڭ 1 شىلدەسىنە اۋدان كولەمىندە ستاتيستيكالىق دەرەكتەرگە سايكەس 4 466 كاسىپكەرلىك سۋبەكتىلەرى تىركەلگەن، ونىڭ ىشىندە 3 ورتا، 160 شاعىن كاسىپورىندار (زاڭدى تۇلعالار)، 1979 جەكە كاسىپكەرلەر جانە 2324 شارۋا قوجالىقتار. وسى شارۋاشىلىق سۋبەكتىلەرىندە بارلىعى 8 908 ادام جۇمىس اتقاراتىن بولسا، سونىڭ ىشىندە 128 ادام ورتا كاسىپورىنداردا، 692 ادام شاعىن كاسىپورىنداردا، جەكە كاسىپكەرلىكتە 1678 ادام، شارۋا قوجالىقتارىندا 6410 ادام جۇمىس جاسايدى. 2019 جىلدىڭ التى ايىندا اۋدانداعى كاسىپكەرلىك سۋبەكتىلەرى بيۋدجەتكە 114 ملن. 133،4 مىڭ تەڭگە سالىق ءتۇسىرىلدى. جالپى تىركەلگەن كاسىپكەرلىك سۋبەكتىلەرىنىڭ 4177ء-ى، نەمەسە 93،5 پايىزى جۇمىس ىستەۋدە.

اۋدان بويىنشا 2019 جىلدىڭ قاڭتار – ماۋسىم ايلارىندا 1 411،7 ملن. تەڭگەنىڭ (2018 جىلدىڭ 6 ايىندا 1 271،9 ملن تەڭگە) بولشەك ساۋداسى جاسالىپ، 2018 جىلدىڭ وسى كەزەڭىمەن سالىستىرعاندا ناقتى كولەم يندەكسى 4،9 پايىزعا ارتىپ وتىر. وبلىس بويىنشا 10-شى ورىندا ورنالاستى.

ال جۋالى اۋدانىنىڭ ەن نەگىزگى كۇشى – «بۋرنوە سولار» كۇن ەلەكتر ستانسياسى ەكەنى بەلگىلى. بالامالى ەلەكتر ەنەرگياسىن قولدانۋعا بۇكىل الەم جانتالاسىپ جاتقاندا، جۋالى جەرىنەن وسىنداي الىپ كەشەن بوي كوتەرىپ وتىر. مامانداردىڭ بايلامى بويىنشا مۇنداي كۇن ەلەكتر ستانسياسى ورتا ازيا ەلدەرىندە جوق كورىنەدى. ياعني، ەلىمىزدە بالاماسى جوق ءوندىرىس ورنى ازيا قۇرلىعىن دا قايران قالدىرۋدا. قازىرگى تاڭدا «بۋرنوە سولار» كۇن ەلەكتر ستانسياسىنىڭ ەكى كەزەڭدىك جۇمىستارى اياقتالدى. ال تولىقتاي قۋاتتى كۇشىنە شىققاندا بالامى كۇن ەلەكتر كەزەڭىنىڭ جاڭا ءداۋىرى باستالعالى تۇر.