جامبىلدا بالالارعا ارنالعان ەرەكشە بايقاۋ وتۋدە دەپ جازادى Qamshy.kz اقپارات اگەنتتىگى. 

جامبىل وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسى مەن د.ا.قونايەۆ اتىنداعى جامبىل وبلىستىق بالالار مەن جاسوسپىرىمدەر كىتاپحاناسىنىڭ ۇيىمداستىرۋىمەن «رۋحاني قازىنا» كىشى باعدارلاماسىنىڭ اياسىندا جىل سايىن بالالار مەن جاسوسپىرىمدەر تاقىرىبىنا قالام تەربەيتىن قازاق اقىندارى مەن جازۋشىلارىنىڭ شىعارماشىلىعىنا ارنالعان «الەمدى كىتاپ ارقىلى تانيمىن» اتتى كوركەم ادەبيەت تۋىندىلارىن ەڭ كوپ وقيتىن وقىرماندار اراسىندا وبلىستىق بايقاۋ وتكىزىلىپ كەلەدى. وتكەن جىلى وسىنداي ءىس-شارا ايتۋلى بالالار اقىنى سۇلتان قالييەۆتىڭ شىعارمالارىنا ارنالعان ەدى.

ال بيىل وسى بايقاۋعا قازاق بالالار ادەبيەتىنىڭ كورنەكتى تۇلعاسى، رەسپۋبليكالىق جابىق ادەبي كونكۋرستاردىڭ التى دۇركىن، حالىقارالىق «دارابوز» كونكۋرسىنىڭ ەكى دۇركىن لاۋرەاتى، سول كونكۋرستىڭ 2015 جىلعى گران-پري يەگەرى پەرنەباي دۇيسەنبيننىڭ شىعارماشىلىعى تاڭدالىپ الىنعان. بايقاۋدىڭ بيىلعى العاشقى ءىس-شاراسى سارىسۋ اۋدانىنان باستاۋ الىپتىى. وعان وبلىستىق بالالار مەن جاسوسپىرىمدەر كىتاپحاناسىنىڭ ديرەكتورى گۇلفايرۋز ىڭكاربەكوۆا مەن ءبولىم مەڭگەرۋشىسى جانار تاتتىمبەتوۆا، كىتاپحانالار جۇيەسىنىڭ ديرەكتورى سۆەتا قوجانازاروۆا قاتىسىپ بايقاۋعا قازىلىق ەتتى.

ايتا كەتۋ كەرەك، بايقاۋدا قاتىسۋشىلار "مەن - كىتاپحانانىڭ تۇراقتى وقىرمانىمىن"، "پەرنەباي دۇيسەنبين - بالالار ادەبيەتىنىڭ كورنەكتى جازۋشىسى"، "پورترەت گالەرەياسى"، "جازۋشىنىڭ ءومىرى مەن شىعارماشىلىعى" سىندى ءتورت اتالىم بويىنشا سىنعا تۇسكەن.

ۇمىتكەرلەر جازۋشىنىڭ اڭگىمەلەرىنەن، ەرتەگىلەرى مەن اڭىزدارىنان، پوۆەستەرىنەن ۇزىندىلەردى جاتقا وقىدى. سونداي-اق "الپامىس باتىر" دراماسى بويىنشا ساحنالىق كورىنىستەر قويدى.

ارينە، سايىس بولعان سوڭ ۇزدىكتەردىڭ جەڭىسكە جەتۋى زاڭدىلىق. وسى ورايدا 24 ۇمىتكەر قاتىسقان سايىستا قازىلار القاسىنىڭ شەشىمىمەن بايقادام قاشقىنبايەۆ اتىنداعى ورتا مەكتەپتىڭ 4- سىنىپ وقۋشىسى ەسەنگەلدى اسىلاي مەن مۇحتار اۋەزوۆ اتىنداعى مەكتەپ-گيمنازيانىڭ 6-سىنىپ وقۋشىسى تىنىشتىقباي ەلدوس ءوز قاتارلاستارى اراسىنان وق بويى وزىق شىعىپ، جەڭىمپاز اتاندى. ەندى ولار ۇستىمىزدەگى جىلدىڭ قىركۇيەك ايىندا تاراز قالاسىندا وتەتىن وبلىستىق بايقاۋدا ءوز باقتارىن سىنايدى.

-وسى بايقاۋدىڭ نەگىزگى ماقساتى قازاق بالالار جازۋشىلارىنىڭ سان الۋان تاقىرىپتاعى كوركەم شىعارمالارى، تانىمدىق تاربيەلىك تۋىندىلارى، ەرتەگىلەرى مەن اڭىزدارى، پوۆەستەرى مەن اڭگىمەلەرى، ولەڭدەرى مەن جىرلارى

ارقىلى جاس جەتكىنشەكتەردىڭ كىتاپقا دەگەن ۇلكەن قىزىعۋشىلىعىن وياتۋ ەدى. سول تۇرعىدان كەلگەندە بايقاۋدىڭ بالعىن وقىرماندارعا بەرەرى مول. وسىنداي ىزگىلىكتى، رۋحاني شارالار بۇدان بىلاي دا ءوز جالعاسىن تابا بەرەتىنىنە سەنەمىز،-دەيدى سارىسۋ اۋداندىق ورتالىقتاندىرىلعان كىتاپحانالار جۇيەسى ديرەكتورىنىڭ ورىنباسارى ايتبالا جولماحانوۆا.