جامبىل وبلىسى قىرعىز رەسپۋبليكاسىنىڭ ءبىرقاتار ايماقتارىمەن شەكارالاس ورنالاسقاندىقتان دا ەكى اراداعى الىس-بەرىس تە، بارىس-كەلىس تە ۇزىلگەن ەمەس. دەيتۇرعانمەن تاراز قالاسىنىڭ سىرتىمەن وتەتىن اينالما جولدىڭ بولماۋى شاھاردىڭ نەگىزگى كوشەلەرىندەگى كولىك قوزعالىسىنا كەرى اسەرىن تيگىزىپ كەلگەن-دى. ەندى مىنە، بۇل ولقىلىقتىڭ دا ورنى تولاتىن كۇن جاقىن. تاياۋدا كورشى ەلمەن بايلانىستىراتىن كۇرە جولدىڭ قۇرىلىسى باستالدى. بۇل «نۇرلى جول» مەملەكەتتىك باعدارلاماسىنىڭ جەمىسى ەكەندىگىن ايتا كەتكەن ءجون.

بۇگىنگى تاڭدا «ايشا ءبيبى» كەدەندىك بەكەتى ورنالاسقان «تاراز – وتمەك قىرعىزستان شەكاراسى» اۆتوجولىنىڭ بويىندا قىزۋ جۇمىس جۇرگىزىلىپ جاتىر. جوبانىڭ ىسكە اسىرىلۋى ءوز كەزەگىندە 100 مىڭعا جۋىق تۇرعىننىڭ كولىكپەن قاتىناۋىن قامتاماسىز ەتپەك. سونىمەن قاتار ءترانزيتتى اۋىر جۇك كولىكتەرىنىڭ قالانى وڭتۇستىك بەتتەن جىلدام جانە ءقاۋىپسىز ءجۇرىپ ءوتۋ مۇمكىندىگىنە قول جەتكىزبەك. بۇل ءوز كەزەگىندە حالىق تۇرمىسىنىڭ، قالا ەكولوگياسىنىڭ جاقسارۋى مەن جالپى ءوڭىردىڭ دامۋىنا وراسان زور ۇلەسىن تيگىزەرى ءسوزسىز.

– جالپى جولدىڭ ۇزىندىعى 16 شاقىرىمدى قۇرايدى. ونىڭ 1،7 شاقىرىمى تاراز قالاسىنىڭ اۋماعىمەن وتەدى. قالعانى 14،3 شاقىرىمى جامبىل اۋدانىنا تيەسىلى. سول ارقىلى كۇرە جول «ايشا ءبيبى» كەدەندىك بەكەتىنە تىرەلەدى. قۇنى 4 ميلليارد تەڭگە بولاتىن اتالعان جوبانى «قازاحدورستروي» ج ش س ىسكە اسىرىپ جاتىر. بۇل قارجىنىڭ 90 پايىزى رەسپۋبليكالىق، قالعان 10 پايىزى وبلىستىق بيۋدجەتتەن ءبولىنىپ وتىر. بۇگىندە قۇرىلىس جۇمىستارىنا 40 تەحنيكا جۇمىلدىرىلعان،-دەيدى جامبىل وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى باقىتجان جانىبەكوۆ.

بىلگەنىمىزدەي بيىل قۇرىلىس جۇمىستارىنا 880 ميلليون تەڭگە بولىنگەن. مۇنىڭ 800 ميلليون تەڭگەسى رەسپۋبليكالىق بيۋدجەتتەن بولىنسە، قالعان بولىگى وبلىستىق بيۋدجەتتەن قارالىپتى. وسىنشاما قارجىعا 4 شاقىرىم جەرگە اسفالت سالۋ جوسپارلانىپ وتىر. ايتا كەتەرلىگى، سالىناتىن جولدىڭ استىنان 57 سۋ قۇبىرلارى جۇرگىزىلەدى. سونداي-اق ەنى 24 مەتردى قۇرايتىن كوپىر دە سالىنباق.

ال «قازاحدورستروي» ءجشس-نىڭ باسشىسى مايرا سۇلتان قىزىنىڭ سوزىنشە، سالىنعالى جاتقان جول سازدى، شەڭگەلدى جەردەن وتەدى ەكەن. بۇگىندە ونىڭ 6 شاقىرىمى ارنايى تەحنيكانىڭ كومەگىمەن قوپارىلىپ رەتكە كەلتىرىلگەن. سونداي-اق قۇبىرلار ورنالاستىرىلىپتى. سازدى جەر بولعاندىقتان سۋ جول سالۋعا كەدەرگى كەلتىرمەي قويمايدى. سوندىقتان مەردىگەر كومپانيا جەردى رەتكە كەلتىرۋ بارىسىندا اك قولدانىپ جاتىر ەكەن. بۇل ءوز كەزەگىندە سۋدى سورىپ، جەردى قاتايتاتىن كورىنەدى.

ەگەر جوبا ءساتتى جۇزەگە اساتىن بولسا، قىرعىز رەسپۋبليكاسىنان شىعاتىن جۇك كولىكتەرى قالاعا كىرمەي، وسى جول ارقىلى قاتىنايتىن بولادى. سوندىقتان جولدىڭ شىدامدىلىعى 13 تونناعا ەسەپتەلىپتى. بۇل ءوز كەزەگىندە

اباي داڭعىلى بويىنداعى كولىك قوزعالىنىڭ رەتكە كەلتىرىلۋىنە دە وڭ سەپتىگىن تيگىزبەك.