اسا كۇردەلى ساياسي، ەكونوميكالىق قيىنشىلىقتار شاعىندا ءوز الدىنا وتاۋ تىككەن جامبىل وبلىسىندا 1939 جىلى جۇرگىزىلگەن ساناعى ناتيجەسى بويىنشا 320 390 تۇرعىن تۇرعان دەپ جازادى Qamshy.kz اقپارات اگەنتتىگى.
العاشىندا 9 اۋداننان تۇرعان وبلىس قۇرامىنا وڭتۇستىك قازاقستان وبلىسىنان 6 اۋدان، الماتى وبلىسىنان 3 اۋدان بەرىلگەن ەكەن. «سول كەزدەگى وبلىستا مەكەندەيتىن 320 390 تۇرعى 121 سەلولىق، 4 قالالىق جانە پوسەلكەلىك سوۆەتتەرگە بىرىكتىرىلدى» دەلىنگەن ارحيۆ دەرەكتەرىندە. ال 1939 جىلى جۇرگىزىلگەن حالىق ساناعى كەزىندە وبلىس اۋماعىندا 1154 ەلدى مەكەن بولعان. وبلىستاعى حالىق تىعىزدىعى 1شارشى كيلومەترگە 2،6 ادامنان كەلدى. سارىسۋ اۋدانىندا بۇل كورسەتكىش نەبارى 0،4-كە تەڭ بولدى.
رەسمي مالىمەتتەر 80 جىل بۇرىن جامبىلدىقتاردىڭ 30 پايىزى جامبىل قالاسىمەن بىرگە شۋ، لۋگوۆوە (قازىرگى قۇلان)، مەركە سىندى اۋدان ورتالىقتارىنداعى جۇمىسشى پوسەلكەلەرىندە تۇرعانىن دالەلدەيدى. ءبىر عانا جامبىل (قازىرگى تاراز) قالاسىن وبلىس قۇرىلعان العاشقى جىلدارى 51 961 تۇرعىن مەكەن ەتىپتى. ونىڭ 31 952ء-ى ورىس حالقىنان بولسا، جامبىلداعى جەرگىلىكتى قازاقتاردىڭ سانى 10 404ء-تىڭ شاماسىندا بولعان. سونداي-اق جاڭادان قۇرىلعان وبلىستىڭ ورتالىعىندا 5946 وزبەك، 1854 تاتار، 9197 تاتار جانە 3875 وزگە ۇلت وكىلدەرى ءتاتۋ-تاتتى عۇمىر كەشكەن. قالا تۇرعىندارىنىڭ باسىم بولىگىنەن 60 جاسقا دەيىنگى تۇرعىندار قۇراعان. سونداي-اق جامبىل قالاسى تۇرعىندارى قاتىستى ءبىر قىزىق دەرەك. جامبىلدىق (قالالىق) ەر ازاماتتاردىڭ سانى ايەلدەردەن 1300-گە كوپ بولعان كورىنەدى.ءارى قالالىق ەر ازاماتتاردىڭ 90 پايىزى قارا تانىسا، ساۋاتتى نازىكجاندىلاردىڭ ۇلەسى 25 پايىزعا تەڭ بولعان.
تۇرعىندار سانى جونىنەن جامبىل قالاسىنان سوڭ شۋ، مەركى مەن قورداي اۋداندارى كوش باستادى. حالقىنىڭ سانى جامبىل قالاسىمەن شامالاس شۋ وڭىرىندە سول جىلدارى 45 387 ادام ءومىر سۇرگەن. مەركى اۋدانىنداعى حالىقتىڭ جالپى 40 556-عا جەتتى. ال قورداي اۋدانىنداعى حالىقتىڭ جالپى سانى 36 295 بولدى. سۆەردلوۆ (قازىرگى بايزاق اۋدانى) اۋدانىندا حالىق تىعىز شوعىرلاندى. ارحيۆ دەرەكتەرى سۆەردلوۆتىقتاردىڭ جالپى سانىن 24 570 ادام بولعانىن كورسەتەدى. سونداي-اق كراسنوگورسك اۋدانىندا 14160 مىڭ ادام تۇرسا، كوكتەرەك اۋدانىندا 12 116 تۇرعىن مەكەن ەتكەن. سارىسۋ، تالاس اۋداندارىندا دا حالىق تىعىزدىعى وتە تومەن بولدى. ماسەلەن سارىسۋ اۋدانىندا 1939 جىلى 12 194 ادام تۇرسا، تالاستىقتاردىڭ جالپى سانى 17 941 بولعان.
ال ءقازىر وبلىس تۇرعىندارىنىڭ جالپى سانى 1 ميلليوننان اسىپ جىعىلادى. ءارى وڭىردە جىل ساناپ تابيعي ءوسىم بايقالۋدا. 80 جىل بۇرىن نەبارى 54 مىڭ جۋىق تۇرعىن تۇرعان تاراز قالاسىنىڭ حالقى بۇل كۇندە 6 ەسەگە دەيىن ۇلعايعان.
