بۇگىن، 28 تامىزدا  ارىس قالاسىنداعى جامبىل وبلىسىنا تيەسىلى 3-سەكتورداعى قۇرىلىس جۇمىستارىنىڭ اياقتالۋىنا وراي سالتاناتتى شارا ءوتتى. وعان جەرگىلىكتى ارىستىقتارمەن بىرگە جۇمىس جۇرگىزگەن ءبىرقاتار قۇرىلىسشىلار قاتىستى.

جيىندى تۇركىستان وبلىسى اكىمىنىڭ ءبىرىنشى ورىنباسارى قوسمان ايتمۋحامەتوۆ ءسوز سويلەپ، اشتى. وبلىستان ارنايى ات باسىن بۇرعان ءبىر توپ جامبىلدىقتاردى ايماق باسشىسىنىڭ ورىنباسارى ەركەبۇلان داۋىلبايەۆ باستاپ كەلدى. ەركەبۇلان ءابىلحان ۇلى ءوزىنىڭ العىسوزىندە جامبىل وبلىسى شتابىنىڭ قارقىندى جۇمىسى، ارىستىقتاردىڭ بەلسەندىلىگى مەن ىقىلاسى تۋرالى ايرىقشا ايتىپ ءوتتى. سونداي-اق، قالادا ورىن العان توتەنشە جاعدايدىڭ زارداپتارىن جويۋعا جۇمىلا اتسالىسقان كوپشىلىككە العىسىن ءبىلدىرىپ، مۇنداي وقىس وقيعا ەندى ەلىمىزدە ورىن الماۋىن تىلەدى. وزگە دە ءسوز العان جامبىل وبلىستىق ءماسليحاتىنىڭ حاتشىسى باعلان قاراشولاقوۆ، ارىس قالاسىنىڭ اكىمى مۇرات بولات ۇلى قادىربەك جانە تاعى باسقا قۇرمەتتى قوناقتار جامبىلدىق قۇرىلىسشىلاردىڭ تاباندى تىرلىگىن، ەلەۋلى ەڭبەگىن تىلگە تيەك ەتتى.
سالتتاناتتى جيىن «ارىستى تەربەتكەن اۋليەاتا اۋەندەرى» اتتى ك.ازىربايەۆ اتىنداعى جامبىل وبلىستىق فيلارمونياسىنىڭ كونسەرتتىك باعدارلاماسىنا ۇلاستى. باعدارلاما بارىسىندا ارىسقا ارناۋ ايتىلىپ، اسەم اندەر شىرقالىپ، بي بيلەندى. ايانباي تەر توككەن ءبىر توپ شتاب جۇمىسىنىڭ باسى-قاسىندا جۇرگەن ازاماتتار مەن قۇرىلىسشىلار ماراپاتتالدى.

سونداي-اق، بۇل كۇنى جارىلىس كەزىندە قيراعان 4 ءۇي قايتا باسىنان بوي كوتەرىپ، سالتاناتتى تۇردە پايدالانۋعا بەرىلدى. ول ۇيلەردىڭ ەكەۋى باسىنان بوي كوتەرىپ، ەكەۋى تولىق جاڭعىرتىلعان. قۇرىلىسىن جۇرگىزگەن مەردىگەر كومپانيا اتالعان ءۇي يەلەرىنە ءوز سىي-سياپاتتارىن جاسادى.

ايتا كەتەيىك، ارىس قالاسىنداعى جامبىل وبلىسىنىڭ شتابىنا قاراستى 3-سەكتورعا 11 كوشە بەكىتىلگەن. وندا 312 جەكە تۇرعىن ۇيلەرمەن بىرگە 14 الەۋمەتتىك جانە كوممەرسيالىق نىسان بارى انىقتالعان بولاتىن. زەردەلەۋدەن وتكەن جەكە تۇرعىن ءۇيدىڭ بارلىعىنىڭ اقاۋ اكتىلەرى تولتىرىلىپ، سمەتالاۋ جۇمىستارى جاسالدى. ناتيجەسىندە قيراعان 4 ءۇيدىڭ ەكەۋى باسىنان بوي كوتەرىپ، ەكەۋى تولىق جاڭعىرتىلدى. قالعان 309 ۇيگە ءارتۇرلى جوندەۋ جۇمىستارى جۇرگىزىلىپ، قالپىنا كەلتىرىلدى. بۇل جۇمىستارعا 4 مەردىگەر كومپانيا، 500-دەن اسا قۇرىلىسشى تارتىلدى.ءتيىستى شىعىندار رەسپۋبليكالىق بيۋدجەت پەن ارنايى قورعا جيناقتالعان قارجىدان قاراستىرىلدى.

اۋليەاتالىقتار ارىستىق اعايىندارعا بۇدان وزگە دە ءتۇرلى قولداۋلار كورسەتكەنىن بۇدان بۇرىن دا حابارلاعانبىز. اتاپ ايتار بولساق، ونداعى زارداپ شەككەن ازاماتتارعا كومەك كورسەتۋ بويىنشا «ارىس. ءبىز بىرگەمىز!» رەسپۋبليكالىق اكسياسى اياسىندا تاراز قالاسىندا 4 قابىلداۋ پۋنكتى اشىلدى. نۇر وتان پارتياسىنىڭ وبلىستىق جانە اۋداندىق فيليالدارىنداعى ارنايى پۋنكتتەردە جينالعان كومەك ماتەريالدارى، ازىق-تۇلىك پەن ءبىرىنشى قاجەتتىلىكتەگى زاتتار ارىسقا جەتكىزىلدى. بارلىعى 400 توننادان استام گۋمانيتارلىق كومەك، ازىق-تۇلىك، تۇرمىسقا قاجەتتى بۇيىمدار جونەلتىلگەن. ول عانا ەمەس، تۇرعىندارعا مەديسينالىق كومەك كورسەتۋ ءۇشىن 2،2 ميلليون تەڭگەگە قاجەتتى دارى-دارمەگىمەن قامتىلعان ارنايى جاساقتالعان 4 رەانيموبيلمەن 8 فەلدشەر ارىس قالاسىنا جىبەرىلدى. سونداي-اق، ارىس قالاسىنىڭ 400-گە جۋىق بالاسى جامبىل وبلىسىنداعى جازعى ساۋىقتىرۋ تاۋ سامالى، جۇرىندىساي، جۇلدىز سىندى لاگەرلەرىندە دەمالدى.