27 تامىزدا اتىراۋدا اتىراۋ وبلىسى اكىمى نۇرلان نوعايەۆتىڭ توراعالىعىمەن «Nur Otan» پارتياسى وبلىستىق فيليالىنىڭ ساياسي كەڭەسى بيۋروسىنىڭ وتىرىسى ءوتتى، – دەپ حابارلايدى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

21 تامىزدا قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ توراعالىعىمەن ەلىمىزدىڭ استاناسىندا پارتيانىڭ ساياسي كەڭەسىنىڭ كەڭەيتىلگەن وتىرىسى ءوتىپ، پارتيانىڭ سايلاۋالدى باعدارلاماسىنىڭ جۇزەگە اسۋ بارىسى مەن سەزدەردە بەرىلگەن تاپسىرمالاردىڭ ورىندالىسى تالقىلاندى.

– ءوز سوزىندە ەلباسى پارتيانى جۇيەلى قايتا جۇكتەۋ باعدارلاماسىن ۇسىندى. ەلباسى پارتيانىڭ بەلسەندى مۇشەلەرىن توپتاستىرۋدى، بارلىق دەڭگەيدەگى پارتيا ورگاندارىنىڭ الەۋەتىن مەيلىنشە جۇزەگە اسىرۋدى، پارتيالىق جاۋاپكەرشىلىكتى كۇشەيتۋدى تاپسىردى، – دەدى ن.نوعايەۆ.

ءوڭىر باسشىسى اتاپ وتكەندەي، پارتياعا دەگەن سەنىمدى ارتتىرۋ ءۇشىن بارلىق قويىلعان مىندەتتەر مەن بەرىلگەن ۋادەلەر ورىندالۋى كەرەك. بۇل ماقساتقا قول جەتكىزۋدە بارلىق پارتيا مۇشەلەرى قاجىرلى ەڭبەك ەتۋى ءتيىس – فراكسيالاردىڭ، باستاۋىش ۇيىمداردىڭ باسشىلارى، دەپۋتاتتار، مەملەكەتتىك ورگانداردىڭ وكىلدەرى.

پارتيانىڭ وبلىستىق فيليالى ءتوراعاسىنىڭ ورىنباسارى باقبەرگەن قارابايەۆ ازاماتتاردىڭ الەۋمەتتىك ءال-اۋقاتىن جاقسارتۋ جونىندەگى مەملەكەتتىك باعدارلامالاردى ورىنداۋ باعىتىندا جۇرگىزىلىپ جاتقان جۇمىستار تۋرالى باياندادى.

پارتيانىڭ الدىندا تۇرعان مىندەت – كوررۋپسيانىڭ الدىن الۋ بويىنشا جۇمىستى كۇشەيتۋ، اقپاراتتىق ستراتەگيانى تۇبەگەيلى قايتا قاراۋ، يدەولوگيالىق جۇمىستى كۇشەيتۋ. بۇنى ءوڭىردىڭ قوعامدىق كەڭەسىنىڭ ءتوراعاسى مۇرات وتەشيەۆ اتاپ ءوتتى. 

– الەۋمەتتىك جەلىلەردە، ازاماتتاردى جەكە قابىلداۋدا كەيدە ءبىزدىڭ اتىمىزعا سىن ايتىلىپ جاتادى. مەملەكەتتىڭ مىندەتى – ادامنىڭ بار مۇمكىندىگىن جۇزەگە اسىرۋىنا جاعداي جاساۋ، ونىڭ دامۋىنا ىقپال ەتۋ. باسقاسىنىڭ بارلىعىنا ول ءوزىنىڭ بىلىمىمەن، بىلىگىمەن، كۇش-جىگەرىمەن قول جەتكىزۋى ءتيىس. وڭىرىمىزدە جۇمىسقا ورنالاسۋعا مۇمكىندىك جەتكىلىكتى، ءوز ءىسىن اشۋ ءۇشىن ءتۇرلى باعدارلامالار بار. تالپىنعان ادامعا ءاردايىم جۇمىس تابىلادى. ەڭ باستىسى – باسقاعا يەك ارتۋدان، مەملەكەتكە دەگەن تۇتىنۋشىلىق كوزقاراستان ارىلۋ قاجەت، – دەپ اتاپ ايتتى نۇرلان نوعايەۆ. 

بۇل باعىتتاعى پروبلەمالىق ماسەلە – ءبىرقاتار ازاماتتار بىرەۋگە يەك ارتۋعا داعدىلانىپ قالعان. وتىرىستا ايتىلعانداي، مەملەكەت شىن مانىندە مۇقتاج بولىپ وتىرعاندارعا عانا كومەكتەسۋى كەرەك.

كوپ بالالى جانە از قامتىلعان وتباسىلارىن قولداۋدىڭ ءتيىمدى قۇرالى ءبىر رەتتىك كومەك ەمەس، جۇمىسقا ورنالاستىرۋ، وقىتۋ جانە قايتا وقىتۋ، ءوز ءىسىن اشۋ ءۇشىن نەسيەلەۋ سياقتى شارالار بولۋى ءتيىس. بۇگىندە وبلىستا 6،5 مىڭ وتباسى (36 مىڭ ادام) ادرەستى الەۋمەتتىك كومەك الادى. بۇعان 1،9 ملرد تەڭگە ءبولىنىپ وتىر. وسىدان ءبىر جىل بۇرىن كومەك الۋشىلاردىڭ سانى 2،2 مىڭ وتباسىن قۇراپ، وعان قاجەت قاراجات 500 ملن. تەڭگەدەن اسپايتىن ەدى. 

– بۇل قۋانتارلىق كورسەتكىش ەمەس. كەيدە جاردەماقى الۋ ءۇشىن تابىستارىن جاسىرىپ، سەميالارىن بۇزاتىن فاكتىلەر دە كەزدەسىپ جاتادى. الايدا، ولاردىڭ بارلىعى مۇقتاج ادامدار ەمەس. سونداي-اق، ەگەر ادام تەك جوعارىدان كومەك بولادى دەپ ۇيرەنىپ كەتسە، ول ەشنارسەگە تالپىنباي، اعىممەن جۇرە بەرەدى. تەك ەڭبەكقورلىقتىڭ ارقاسىندا عانا ادام تابىسقا قول جەتكىزەدى. وسىنى جاستاردىڭ ساناسىنا ءسىڭىرۋىمىز قاجەت. ەرتەڭ قىزمەت ەتىپ، مەملەكەتتىڭ يگىلىگىن جاسايتىن سولار. بۇگىنگى تاڭدا پارتيانىڭ الدىندا تۇرعان مىندەت – بارلىق الەۋمەتتىك جانە ەكونوميكالىق ماسەلەلەردى قامتي وتىرىپ، مەملەكەتىمىزدىڭ باستامالارىن ىلگەرىلەتۋ، قوعامنىڭ بەلسەندى توپتارى مەن جاستاردى تارتا وتىرىپ، پارتيالىق جوبالاردى ىسكە اسىرۋ. الدا ۇلكەن مىندەتتەر تۇر، ءبىز سولاردى بىرلەسىپ ورىنداۋعا ءتيىستىمىز، – دەپ قورىتىندىلادى نۇرلان نوعايەۆ.