30 تامىز – ق ر كونستيتۋسياسى كۇنىنە وراي تاراز قالاسىنداعى 15 ىقشاماۋداندا كوپقاباتتى تۇرعىن ءۇي پايدالانۋعا بەرىلدى. باسپانالى بولۋ باقىتىنا كەنەلگەن تۇرعىنداردىڭ قۋانىشىمەن بولىسكەن وبلىس اكىمى اسقار مىرزاحمەتوۆ اقجارما تىلەگىن ءبىلدىرىپ، پاتەر كىلتتەرىن ءوز قولىمەن تاپسىردى.

– باسپانا – قاي ۋاقىتتا دا وزەكتى ماسەلە. قالا حالقىنىڭ سانى وسۋىمەن تۇرعىن ۇيگە دەگەن سۇرانىس كولەمى دە ۇلعايۋدا. تاۋەلسىزدىك جىلدارى ەلىمىزدە ەلباسىنىڭ باسشىلىعىمەن قازاقستاندىقتاردى تۇرعىن ۇيمەن قامتاماسىز ەتۋ بويىنشا ۇلكەن جۇمىستار اتقارىلدى. سونىڭ ىشىندە قالادا جاڭادان سوعىلىپ جاتقان 15 شاعىن اۋدان ورنالاسقان جەر بىرنەشە جىل بۇرىن اشىق دالا بولاتىن، ال ءقازىر جاڭا تۇرعىن ۇيلەر بوي كوتەرگەن شاعىن اۋدانعا اينالدى.
پرەزيدەنتتىڭ بەس الەۋمەتتىك باستاماسى بويىنشا جاريالانعان باستى ماقساتتاردىڭ ءبىرى – حالىقتى تۇرعىن ۇيمەن قامتاماسىز ەتۋ. وسى ماقساتتا «نۇرلى جەر» باعدارلاماسى اياسىندا اعىمداعى جىلى جالپى 17،6 ميلليارد تەڭگەگە بارلىعى 30 كوپقاباتتى (2 118 پاتەرلى) تۇرعىن ءۇيدىڭ قۇرىلىسى جۇرگىزىلىپ، جىل سوڭىنا دەيىن 28 كوپقاباتتى (1988 پاتەرلى) تۇرعىن ۇيلەردى پايدالانۋعا بەرۋ جوسپارلانۋدا. وسىناۋ وڭدى ىستەردىڭ بارلىعى الەۋمەتتىڭ الەۋەتىن ءالدى ەتەتىن اۋقىمدى شارالاردىڭ جارقىن كورىنىسى، – دەگەن اسقار يسابەك ۇلى كوپشىلىكتى ق ر كونستيتسياسى كۇنىمەن قۇتتىقتاپ، پاتەر كىلتتەرىن تابىس ەتتى.

سالتاناتتى شارا سوڭىندا باسپانالى بولعان تۇرعىندار اتىنان اسەل بالتابەك قىزى وبلىس باسشىلىعىنا العىسىن جەتكىزدى.

بۇل كۇنى بارلىعى 720 پاتەر پايدالانۋعا بەرىلسە، ونىڭ 200-گە جۋىعى باعدارلاما ارقىلى بانكتىڭ ءتيىستى شەشىمىن العان. ياعني 200 دەي وتباسى قونىس تويىن تويلاعالى وتىر. قالعانى الداعى ۋاقىتتا «نۇرلى جەر»، «7-20-25»، «باقىتتى وتباسى» باعدارلامالارى ارقىلى بەرىلەتىن بولادى.

ايتا كەتەيىك، جاڭا پاتەرگە يە بولعانداردىڭ دەنى كوپبالالى وتباسىلار مەن تولىق ەمەس وتباسىلار. وڭىردەگى كوپبالالى وتباسىلارىن تۇرعىن ۇيمەن قامتاماسىز ەتۋ ماسەلەسىن شەشۋ ءۇشىن اعىمداعى جىلدىڭ ءبىرىنشى جارتى جىلدىعىندا 120 كوپبالالى وتباسىلارىنا پاتەر كىلتى تابىستالدى. ونىڭ 93ء-ى ارەندالىق ءۇي، 27ء-ى دەمەۋشىلەر ەسەبىنەن. جىل سوڭىنا دەيىن 493 كوپبالالى وتباسىن تۇرعىن ۇيمەن قامتاماسىز ەتۋ جوسپارلانۋدا.

سونداي-اق، تۇرعىن ءۇي كەزەگى كەلگەنگە دەيىن كوپبالالى وتباسىلاردىڭ تۇرعىن ءۇي ماسەلەسىن ۋاقىتشا شەشۋ ءۇشىن 612 پاتەرلى 12 جاتاقحانا قۇرىلىسىنا ءتيىستى قاراجات قاراستىرىلىپ، جىل سوڭىنا دەيىن پايدالانۋعا بەرىلەدى دەپ كۇتىلۋدە.