ەلباسى نۇرسۇلتان نازاربايەۆ ءوزىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا «مەديسينالىق قىزمەت ساپاسى حالىقتىڭ الەۋمەتتىك كوڭىل-كۇيىنىڭ اسا ماڭىزدى كومپونەنتى بولىپ سانالادى. ەڭ الدىمەن، اسىرەسە اۋىلدىق جەرلەردە العاشقى مەديسينالىق-سانيتارلىق كومەكتىڭ قولجەتىمدى بولۋىن قامتاماسىز ەتۋ قاجەت» دەپ ايرىقشا تاپسىرعان بولاتىن. بۇگىندە وڭىردەگى شالعاي اۋدانداردا دەنساۋلىق ساقتاۋ سالاسىنىڭ قىزمەت ساپاسى جىل ساناپ ارتىپ كەلەدى. بۇل ماڭىزدى باعىت بويىنشا اتقارىلىپ جاتقان جۇمىس تا، الداعى جوسپارلار دا اۋقىمدى. ءدال قازاقستان رەسپۋبليكاسىنىڭ كونستيتۋسياسى كۇنى قارساڭىندا تاعى 36 ارنايى مەديسينالىق جەدەل جاردەم كولىكتەرى اۋدان حالقىنىڭ يگىلىگى ءۇشىن بەرىلدى. ال وبلىس ورتالىعىنىڭ تۇرعىندارى ءۇشىن 58 سۋ جاڭا قوعامدىق كولىكتىڭ كىلتى سالتاناتتى تۇردە قالاداعى جولاۋشى تاسىمالدايتىن مەكەمەلەردە تابىستالدى.

ارينە، ايبىندى اتا زاڭىمىزدىڭ وزىندە ەڭ باستى قۇندىلىق ادام ءومىرى ەكەنى بەلگىلى. بۇگىنگىدەي جاھاندانۋ مەن جاڭعىرۋ عاسىرىندا باسەكەگە دەنى ساۋ ۇلت پەن ۇرپاق قانا توتەپ بەرىپ، تولاعايلارمەن تايتالاسا الاتىنى ايتپاساق تا تۇسىنىكتى. ەلىمىز تاۋەلسىزدىك العالى بەرى ۇلت كوشباسشىسى نۇرسۇلتان ءابىش ۇلى ءوزىنىڭ حالىققا ارناعان ءاربىر جولداۋىندا بۇقارانىڭ دەنساۋلىعىن باستى نازاردا ۇستاپ، كۇن تارتىبىنەن تۇسىرگەن ەمەس. ونىڭ يگىلىگىنە ەل كۋا. وسى تۇستا قازاقستان رەسپۋبليكاسى كوستيتۋسياسى كۇنى قارساڭىندا ورتالىق «دوستىق» الاڭىندا تاعى 36 ارنايى جەدەل جاردەم كولىگى حالىقتىڭ ساۋلىعى ءۇشىن پايدالانۋعا بەرىلدى. جانە ول سۋ جاڭا جۇيىتكىگەن اۆتوكولىكتەردىڭ 3ء-ى جامبىل اۋدانىنىڭ، 3ء-ى جۋالى، 11ء-ى قورداي، 2ء-ى مەركى، 2ء-ى مويىنقۇم، 9-ى ت.رىسقۇلوۆ، 3ء-ى شۋ، 2ء-ى سارىسۋ، 1ء-ى تالاس اۋدانىنداعى مەديسينا سالاسى مايتالمان ماماندارىنىڭ ەنشىسىنە ۇلەستىرىلدى. ايتا كەتسەك، وبلىس ورتالىعىنداعى جەدەل جاردەم ستانسياسىندا 2014 جىلى 56 سانيتارلىق اۆتوكولىك بولعان، سول جىلى وبلىستىق بيۋدجەت ەسەبىنەن 4 كولىك الىنىپ، بارلىعى 60 اۆتوكولىكتى قۇراعان. ال 2018 جىلدىڭ 1 شىلدەسىنەن باستاپ، جەدەل جاردەم قىزمەتى ورتالىقتاندىرىلىپ، جامبىل وبلىستىق جەدەل جاردەم ستانسياسى بولىپ وزگەرتىلدى. سونداي-اق 2018 جىلى 253،0 ميلليون تەڭگەگە 27 بىرلىك اۆتوكولىك ساتىپ الىنعان. مەرەكەلىك تارتۋ مۇنىمەن شەكتەلگەن جوق. قالالىق جولاۋشىلار تاسىمالدايتىن «اۋليەاتا ترانسپاسس» ج ش س 33 بىرلىك، «تاراز ترانسموتورس» ج ش س 15 بىرلىك، ال «ساپار ترانس-2012» ج ش س 10 بىرلىك جاڭا اۆتوبۋستارمەن تولىقتى. جالپى سانى 58 قوعامدىق كولىك دامۋ باعدارلاماسى «جول كارتاسى» اياسىندا ساتىپ الىنىپتى. سالتاناتتى شاراعا ارنايى قاتىسقان وبلىس اكىمىنىڭ ورىنباسارى ەركەبۇلان داۋىلبايەۆ ءسوز تىزگىندەپ، جينالعانداردى كونستيتۋسيا كۇنى مەرەكەسىمەن قۇتتىقتاپ، حالىقتىڭ يگىلىگى ءۇشىن ايانباي ەڭبەك ەتىپ جۇرگەن سالا ماماندارىنىڭ ىلكىمدى ىستەرىنە تابىس تىلەپ، اۆتوكولىكتەردىڭ كىلتىپ تاپسىردى. شارا بارىسىندا مەديسينا سالاسىنىڭ ارداگەرى، تاراز قالاسى مەن بايزاق اۋدانىنىڭ قۇرمەتتى ازاماتى ساميحا قوڭىروۆا ىزگى لەبىزىن جەتكىزىپ، ارىپتەستەرىنىڭ اتىنان العىسىن جەتكىزدى. «اۋدان حالقى جانە ءبىز، مەديسينا ماماندارى ءۇشىن بۇلۇلكەن كومەك، زور قامقورلىق، تاماشا تارتۋ. كوپ جاعدايدا شالعايداعى ناۋقاستارعا دەر كەزىندە جەتە الماۋ سەكىلدى ترانسپورتتىق ماسەلەنىڭ كەزىگەتىنى راس. دەگەنمەن ەلباسىنىڭ سارابدال ساياساتىنىڭ، پرەزيدەنتىمىزدىڭ پايىمدى پارمەنىنىڭ ارقاسىندا بۇل ماسەلە دە كەزەڭ-كەزەڭىمەن شەشىمىن تاۋىپ كەلەدى. ءبىزدىڭ كاسىبي جانە ازاماتتىق مىندەتىمىز – قالتقىسىز قىزمەت ەتىپ حالىق دەنىنىڭ ساۋلىعىن قامتاماسىز ەتۋ. سوندىقتان ايتۋلى مەرەكەنىڭ قارساڭىندا قۋانىشىمىزدى ەسەلەي تۇسكەن وبلىس باسشىلىعىنا العىستان باسقا ايتارىمىز جوق» دەيدى قورداي اۋداندىق ورتالىق اۋرۋحاناسى باس دارىگەرىنىڭ مىندەتىن اتقارۋشى گۇلنارا ساتىبالدينا. سالتاناتتى شارا سوڭى مەرەكەلىك ءان شاشۋمەن قورىتىلاندى.