تاراز قالاسىنداعى «بالاساعۇن» ورتالىق كونسەرت زالىندا قازاقستان رەسپۋبليكاسىنىڭ كونستيتۋسياسى كۇنىنە ارنالعان سالتاناتتى جيىن ءوتتى. شارادا وبلىس اكىمى اسقار مىرزاحمەتوۆ قۇتتىقتاۋ ءسوز سويلەپ، ءبىر توپ ازاماتتاردى ماراپاتتادى. سالتاناتتى جيىنعا قاتىسۋشىلار كەنەن ازىربايەۆ اتىنداعى جامبىل وبلىستىق فيلارمونياسى ۇجىمىنىڭ كونسەرتتىك باعدارلاماسىن تاماشالادى، دەپ جازادى Qamshy.kz اقپارات اگەنتتىگى.

سالتاناتتى جيىنداعى سويلەگەن سوزىندە وبلىس اكىمى اسقار مىرزاحمەتوۆ قازاقستان رەسپۋبليكاسىنىڭ كونستيتۋسياسى ادام ءومىرىن، قۇقىقتارى مەن بوستاندىقتارىن، جوعارعى قۇندىلىقتارىن انىقتايتىن قۇندى قۇجات ەكەندىگىن اتاپ ءوتىپ، كۇللى وبلىس جۇرتشىلىعىن مارتەبەسى بيىك مەملەكەتتىك مەرەكەسىمەن قۇتتىقتادى. مۇنان سوڭ ءوڭىر باسشىسى ءتۇرلى سالادا جەمىستى ەڭبەك ەتىپ جۇرگەن ءبىر توپ ازاماتتارعا توسبەلگىلەر مەن العىسحاتتاردى، قۇرمەت گراموتاسىن تابىستادى. قازاقستان رەسپۋبليكاسى مەملەكەتتىك قىزمەت ىستەرى اگەنتتىگى ءتوراعاسىنىڭ بۇيرىعىمەن جامبىل وبلىسى اكىمدىگىنىڭ ەكونوميكا جانە جوسپارلاۋ باسقارماسىنىڭ باس مامانى گۇلميرا بايتالييەۆاعا «ۇزدىك مەملەكەتتىك قىزمەتشى» توسبەلگىسى، قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ «اقپارات سالاسىنىڭ ۇزدىگى» توسبەلگىسى، وبلىس جۋرناليستيكاسىنىڭ ارداگەرى بولات ماۋلەنوۆكە تابىس ەتىلدى. ال سارىسۋ اۋدانى اكىمدىگىنىڭ مادەنيەت جانە تىلدەردى دامىتۋ ءبولىمىنىڭ باس مامانى مەرۋەرت قادىربەكوۆا قازاقستان رەسپۋبليكاسى ورتالىق سايلاۋ كوميسسياسى ءتوراعاسىنىڭ ديپلومىمەن ماراپاتتالدى.

سونداي-اق تاراز قالالىق ادىلەت باسقارماسىنىڭ زاڭدى تۇلعالاردى تىركەۋ ءبولىمىنىڭ باس مامانى اينۇر اسقاربەك قىزى، مەركى اۋدانى جاڭاتوعان اۋىلدىق وگرۋگى اكىمى اپپاراتىنىڭ باس ءمامان-ىس جۇرگىزۋشىسى گۇلناپىش قالييەۆا، سارىسۋ اۋدانى اكىمدىگى، تۇركىستان اۋىلدىق وكرۋگىنىڭ اكىمى دۇيسەنالى بورسىقوۆ، 10216-گ اسكەري ءبولىم كومانديرىنىڭ تاربيە جانە يديولوگيالىق جۇمىستار جونىندەگى ورىنباسارى قايرات نۇرتايەۆ وبلىس اكىمىنىڭ قۇرمەت گراموتاسىنا يە بولدى.

سول سەكىلدى كوپجىلعى جەمىستى ەڭبەگى جانە قىزمەتتىك مىندەتتەرىن ۇلگىلى ورىنداعانى ءۇشىن جۋالى اۋدانى كۇرەڭبەل اۋىلدىق وكرۋگى اكىمى اپپاراتىنىڭ باس مامانى راتبەك كۇسەنبايەۆ، تالاس اۋدانى اكىمدىگىنىڭ اۋىل شارۋاشىلىعى ءبولىمىنىڭ باس مامانى جاندوس راتوۆ، 102516-ك اسكەري ءبولىمى قويما باستىعى قىدىرحان مىرزاتايەۆ وبلىس اكىمىنىڭ العىس حاتىمەن ماراپاتتالدى.

سالتاناتتى شارادا وبلىستىق ادىلەت دەپارتامەنتى باسشىسىنىڭ ورىنباسارى داۋرەن دايرابايەۆ بايانداما جاسادى. مۇنان سوڭ كورەرمەن قاۋىم كەنەن ازىربايەۆ اتىنداعى جامبىل وبلىستىق فيلارمونياسى ونەر شەبەرلەرىنىڭ مەرەكەلىك كونسەرتىن تاماشالادى. بۇل كۇنى جامبىلدىقتارعا مەرەكەلىك كوڭىل كۇي سىيلاۋعا قازاق ەستراداسىنىڭ جارىق جۇلدىزدارى دوسىمجان تاڭاتاروۆ پەن سايات مەدەۋوۆ تە اتسالىستى.