وبلىستا ءبىلىم بەرۋ جۇيەسىن دامىتۋعا ەرەكشە نازار اۋدارىلۋدا. بيىل ءبىلىم جۇيەسىن قارجىلاندىرۋعا 130 ملرد. تەڭگە ءبولىندى، بۇل وتكەن جىلمەن سالىستىرعاندا 22،2 ملرد. تەڭگەگە ارتىق (2017 جىلى – 107،8 ملرد. تگ.). ونىڭ 5،1 ملرد. تەڭگەسى ءبىلىم بەرۋ نىساندارىنىڭ قۇرىلىسى مەن كۇردەلى جوندەۋگە قارالعان.

وبلىستا ءبىلىم سالاسى جاڭا وقۋ جىلىندا بىرنەشە جاڭالىقتارمەن ەرەكشەلەنبەك. اتاپ ايتقاندا مەكتەپكە دەيىنگى ءبىلىم بەرەتىن ۇيىمداردىڭ سانى 545-كە جەتتى. وندا 55207 بالا تاربيەلەنۋدە. وڭىردە مەكتەپكە دەيىنگى تاربيەمەن قامتىلعاندار ۇلەسى 3-6 جاس ارالىعىندا 98،6%-عا ارتسا، جىل سوڭىنا دەيىن 100%-عا قامتىلادى.

مەكتەپكە دەيىنگى ءبىلىم مەكەمەلەرىنىڭ جەلىسىن كەڭەيتۋدىڭ ءبىر جولى – جەكەمەنشىك ارىپتەستىكتى تارتۋ. اعىمداعى جىلى وڭىردە 2194 ورىندىق 15 مەكتەپكە دەيىنگى ۇيىم اشىلدى. جەكەمەنشىك بالاباقشا ۇلەسى 31،4% قۇرادى. بۇگىندە وبلىستاعى 171 جەكەمەنشىك بالاباقشادا 14984 بالا تاربيەلەنۋدە.
بۇدان باسقا، بالاباقشالارعا «قولما-قول اقشاسىز تولەم» جوباسى ەنگىزىلۋدە. قازىرگى ۋاقىتتا 150 بالاباقشاعا ەنگىزىلدى. مۇندا اتا-انا تولەماقىسى تەرمينالدار ارقىلى قابىلدانىپ، تاماقتانۋىنا جۇمسالعان قاراجاتتىڭ ەسەبى مەن اس ءمازىرى پورتال ارقىلى جاريالانادى.

وبلىستا 442 جالپى ءبىلىم بەرەتىن مەكتەپتە 222 مىڭ بالا ءبىلىم الادى. وتكەن وقۋ جىلىمەن سالىستىرعاندا مەكتەپتەردىڭ سانى 4 بىرلىككە قىسقاردى.
ءبىرىنشى سىنىپ وقۋشىلارىنىڭ سانى سوڭعى ءۇش جىلدا ءوسىپ كەلەدى (2017ج.-26354، 2018ج.-27541). بيىل بولجام بويىنشا 28 مىڭ بالا مەكتەپ تابالدىرىعىن العاش رەت اتتايدى.

ورتا ءبىلىم بەرۋ جۇيەسىندە وقىتۋ ساپاسىن ارتتىرۋعا باعىتتالعان جاڭارتىلعان مازمۇندى ەنگىزۋ جۇمىستارى جالعاسۋدا. 2019-2020 وقۋ جىلىندا 4، 9 جانە 10-سىنىپ وقۋشىلارى جاڭارتىلعان مەكتەپ باعدارلاماسىنا كوشەدى.

وتكەن وقۋ جىلىندا 40 مەكتەپتە نازاربايەۆ زياتكەرلىك مەكتەپتەرىنىڭ وقىتۋ جۇيەسىمەن ادىستەمەلەرى ەنگىزىلسە، بيىل ونىڭ سانى 80-گە ارتادى.

وبلىستا 25 مىڭنان اسا ءمۇعالىم جۇمىس ىستەيدى. ولاردىڭ 82%-ى (20917 پەداگوگ) جاڭارتىلعان مازمۇن بويىنشا، 1426 پەداگوگ جاراتىلىستانۋ پاندەرى بويىنشا اعىلشىن تىلىندەگى كۋرستاردان ءوتتى. جاڭارتىلعان ءبىلىم بەرۋ مازمۇنىمەن مۇعالىمدەردىڭ لاۋازىمدىق جالاقىسى 30%-عا كوبەيدى.

دارىندى بالالارعا ارنالعان مامانداندىرىلعان 4 مەكتەپتە جاراتىلىستانۋ عىلىمدارى پاندەرى اعىلشىن تىلىندە جۇرگىزىلسە، 273 مەكتەپتە ەلەكتيۆتى كۋرستار اعىلشىن تىلىندە وقىتىلۋدا.

پەداگوگتاردى اتتەستاتتاۋدىڭ جاڭا جۇيەسى - ۇلتتىق بىلىكتىلىك تەستىلەۋدەن 4485 ءمۇعالىم ءوتتى. اتتەستاتتاۋدىڭ جاڭا جۇيەسىنە سايكەس بىلىكتىلىك تەستىلەۋدەن وتكەن مۇعالىمدەر 30% بەن 50% ارالىعىندا قوسىمشا تولەماقى الۋدا.
اعىمداعى جىلى تاراز قالاسىنداعى ا.پۋشكين اتىنداعى №41 كوپ سالالى گيمنازياسى وبلىستىق «ورتا ءبىلىم بەرەتىن ۇزدىك ۇيىم» بايقاۋىندا جەڭىمپاز اتاندى.

سونداي-اق، ءبىلىم مەكەمەلەرى اراسىندا جۇرگىزىلگەن رەيتينگ ناتيجەسىندە جامبىل اۋدانىنداعى ب.بەسبايەۆ اتىنداعى مەكتەپ-گيمنازياسى «ۇزدىك اۋىل مەكتەبى»، شۋ اۋدانىنداعى جىبەك جولى مەكتەپ-ليسەيى «ۇزدىك قالا مەكتەبى»، ت.رىسقۇلوۆ اۋدانىنداعى م.اۋەزوۆ اتىنداعى تىرەك مەكتەبى «ۇزدىك شاعىن جيناقتالعان مەكتەپ»، مەركى اۋدانىنداعى ت.قوجاكەيەۆ اتىنداعى №39 مەكتەپ-گينازياسى «ۇزدىك يننوۆاسيالىق مەكتەپ»، تاراز قالاسىنداعى اباي اتىنداعى جامبىل گۋمانيتارلىق كوللەدجى «ۇزدىك كوللەدج» نوميناسياسىن يەلەندى.

ءبىلىم نىساندارىنىڭ قۇرىلىسى قارقىندى جۇرگىزىلۋدە. اعىمداعى جىلى وبلىس بويىنشا 16 ءبىلىم نىسانىنىڭ قۇرىلىسى جۇرگىزىلىپ، 5 مەكتەپ جاڭا وقۋ جىلىندا پايدالانۋعا بەرىلدى. ونىڭ 1ء-ۋى ءۇش اۋىسىمدى، 1ء-ۋى اپاتتى جانە 3ء-ۋى ورىن تاپشىلىعى بار مەكتەپتىڭ ماسەلەسىن شەشتى. وسىلايشا بيىلعى جىلى وبلىستا ءۇش اۋىسىمدى مەكتەپتەر ماسەلەسى تولىعىمەن شەشىلدى.

ءبىلىم مەكەمەلەرى الدىندا تۇرعان باستى تالاپ – وقۋشىلار ءبىلىمىنىڭ ساپاسىن ارتتىرۋ. وسى ماقساتتا 2018 جىلى اۋداندار مەن تاراز قالاسىندا 14 IT سىنىبى اشىلسا، جىل سوڭىنا دەيىن 37 IT سىنىپ اشىلادى.

وبلىستا 46 كوللەدج جۇمىس ىستەيدى (23-مەملەكەتتىك، 23-مەملەكەتتىك ەمەس). وڭىردەگى تەحنيكالىق جانە كاسىپتىك ماماندارعا دەگەن ەڭبەك نارىعىنىڭ سۇرانىسىنا ساي جاڭا وقۋ جىلىنا وبلىستاعى 47 ماماندىققا 3082 ورىنعا مەملەكەتتىك ءبىلىم بەرۋ تاپسىرىسى ءبولىندى.

جالپى، بولىنگەن مەملەكەتتىك تاپسىرىستىڭ 56،7% (1750ء-ى) «بارشاعا ارنالعان تەگىن كاسىپتىك تەحنيكالىق ءبىلىم بەرۋ» جوباسى اياسىندا جۇمىسشى ماماندىقتارىنا بەرىلدى.

بيىلعى جىلدىڭ تاعى ءبىر جاقسى جاڭالىعى، مەملەكەت باسشىسى ق.توقايەۆ اتاپ وتكەندەي، كاسىپتىك تەحنيكالىق مەكەمەلەردە جۇمىسشى ماماندىعىندا وقيتىن ستۋدەنتتەردىڭ ستيپەندياسى 1 قىركۇيەكتەن باستاپ 30%-عا ارتادى.

كوللەدج ستۋدەنتتەرىنىڭ 50،9% مەملەكەتتىك تاپسىرىس نەگىزىندە تەگىن وقۋدا. بۇل وتكەن وقۋ جىلىمەن سالىستىرعاندا 1028 ورىنعا ارتىق. مەملەكەتتىك تاپسىرىس بويىنشا 2018 جىلى 3500 تۇلەك بىتىرسە، ونىڭ 84،2% جۇمىسقا ورنالاستى.

كاسىبي مامان دايارلاۋدا دۋالدى وقىتۋدىڭ ەنگىزۋدىڭ ماڭىزى زور. دۋالدى وقىتۋ جۇيەسى 35 كوللەدجدە ەنگىزىلىپ، 193 كاسىپورىنمەن ءۇش جاقتى كەلىسىمشارتتار جاسالعان. وتكەن جىلى دۋالدىق وقىتۋ جۇيەسىمەن وقۋىن اياقتاعان 1588 تۇلەكتىڭ 75% جۇمىسپەن قامتىلدى.

جامبىل پوليتەحنيكالىق جوعارى كوللەدجى مەن قۇلان اگروتەحنيكالىق كوللەدجىنەن ۇلگىلىك كوللەدج جاساۋ ماقساتىندا اتالعان وقۋ ورىندارىنان «WorldSkills» ستاندارتىنا ساي 10 قۇزىرەتتىلىك ورتالىعى قۇرىلدى (حيميا، ەنەرگەتيكا، قۇرىلىس، مەحاناترونيكا، موبيلدىك روبوتوتەحنيكا، سانتەحنيكا جانە جىلىتۋ، ماشينا جاساۋ، توكارلىق جۇمىستار، اگرونوميا، ۆەتەريناريا باعىتتارى).