ۇلى وتان سوعىسى تاريحىندا اتىن التىن ارىپپەن جازعان بىرەگەي تۇلعا باۋىرجان مومىش ۇلىنىڭ ءومىر جولىنا قاتىستى تىڭ دەرەكتەر تولىعا ءتۇستى. باتىر باۋىرجان وتكەن عاسىردىڭ 20-30 جىلدارى قۇرىلعان قازىرگى سارىسۋ اۋدانىندا ۇستازدىق ەتىپ، تالاي قازاق بالاسىنىڭ ساۋاتىن اشۋعا مۇرىندىق بولعان دەپ جازادى Qamshy.kz اقپارات اگەنتتىگى. 

بۇل جايىندا باتىردىڭ ءوزى جازعان «ايتىلماعان اقيقات» كىتابىندا دا تامتۇمداپ ايتىلادى. اتالعان اڭگىمەدەن شىمكەنتتەن ءبىر ايلىق مۇعالىمدەر كۋرسىن ءتامامداعان باتىر باۋىرجاننىڭ سارىسۋعا ۇستازدىق ەتۋگە جولدانعانىن وقىپ بىلۋگە بولادى.سونداي-اق وقىرمان بۇل دەرەكتى اڭگىمە ارقىلى سارىسۋ اۋدانىنىڭ ەندى قۇرىلۋ تاريحىمەن دە تانىسا الادى. باتىردىڭ اۆتورلىعىمەن جازىلعان اڭگىمەدەن بولەك سول تۇستا سارىسۋ اۋدانىندا ءبىلىم بەرۋ ءىسىنىڭ باسى قاسىندا جۇرگەندەردىڭ ەستەلىگى دە بۇل دەرەكتى ناقتىلاي تۇسەدى. ماسەلەن ادەبيەت سىنشىسى ءاليا بوپەجانوۆانىڭ اكەسى قاھارمان بوپەجانوۆتىڭ قويىن داپتەرىندە سارىسۋ اۋداننىڭ العاشقى ۇستازى جانە مەكتەپ ديرەكتورى باۋىرجان مومىش ۇلى بولعاندىعى جازىلعان. باۋىرجان مومىش ۇلىنىڭ ۇستازدىق قىزمەتى جايىندا سارىسۋ اۋدانىنىڭ تۇرعىنى، جاقسىباي سۇلەيمەنوۆتىڭ ءوز اۋزىنان جازىلىپ الىنعان اڭگىمەدە تولىق اقپار بەرىلگەن. كونەكوز قاريانىڭ ايتۋىنشا باۋىرجان مومىش ۇلى ءبىر توپ جولداستارىمەن بىرگە شىمكەنت قالاسىنداعى «احمەت مەكتەبى» دەپ اتالىن ورىس مەكتەبىندە وقىعان كورىنەدى. ىلە شالا وسى قالاداعى مۇعالىمدەر كۋرسىن ءتامامداعاندا باۋىرجان مومىش ۇلى سارىسۋ اۋدانىنىڭ وقۋ بولىمىنە جىبەرىلىپتى.

باۋىرجان مومىش ۇلى سارىسۋ اۋدانىنداعى ۇستازدىق قىزمەتىن وكسىكباي اتتى بايدان كامپەسكەلەنگەن اعاش ۇيدەگى 150 ورىندىق مەكتەپ-ينتەرناتىنىڭ وقۋ ءىسى مەڭگەرۋشىلىگىنە باستاعان. ودان سوڭ مەكتەپ ديرەكتورى جانە اۋداندىق وقۋ ءبولىمىنىڭ باسشىسى بولدى. سول تۇستا مەكتەپتە ءتالىم العان بالتاباي ادامبايەۆ كەيىننەن ءتىل سالاسىنىڭ بىلگىرى اتاندى.

الايدا باتىردىڭ سارىسۋداعى ۇستازدىق قىزمەتى 4-5 اي عانا سوزىلعان ەكەن. 1929 جىلى ءۇي-جايىن كوشىرىپ الۋعا تۋعان جەرى جۋالىعا بارعان باۋىرجان مومىش ۇلى اۋداندىق اتقارۋ كوميتەتىنە جاۋاپتى قىزمەتكە تاعايىندالعان.

ايتا كەتۋ كەرەك 90 جىلدان استام تاريحى بار سارىسۋ اۋدانىندا ءار جىلدارى ساكەن سەيفۋللين، وراز جاندوسوۆ سىندى قازاقتىڭ ءبىر تۋار ۇلدارى ءىز قالدىرعان. كۇنى بۇگىنگە دەيىن اۋدان تاريحىنان حاباردار ازاماتتار ولاردىڭ سارىسۋداعى ساپارى جايىندا مازمۇندى اڭگىمەلەيدى.