جامبىل جۋرناليستيكاسىنىڭ ارداگەرى بولات ماۋلەنوۆ اقپارا جانە قوعامدىق دامۋ مينيسترلىگىنىڭ «اقپارات سالاسىنىڭ ۇزدىگى» توسبەلگىسىنە يە بولدى.بيىل جەتپىس جاسقا تولعان جۋرناليست ءۇشىن بۇل توسبەلگى مەرەيتويى قارساڭىندا ۇلكەن سىي بولدى دەپ جازادى Qamshy.kz اقپارات اگەنتتىگى. 

ماراپاتتى يەسىنە تاراز قالاسىنداعى «بالاساعۇن» ورتالىق كونسەرت زالىندا قازاقستان رەسپۋبليكاسى كونستيتۋسيا كۇنىنە وراي ۇيىمداستىرىلعان سالتاناتتى جيىندا جامبىل وبلىسىنىڭ اكىمى اسقار مىرزاحمەتوۆ تاپسىردى. ايتا كەتۋ كەرەك بۇل ماراپاتقا بولات ماۋلەنوۆتى قازاقستان جۋرناليستەر وداعىنىڭ وبلىستىق فيليالى ۇسىنعان ەدى.

جالپى «اقپارات سالاسىنىڭ ۇزدىگى» اتانعان بولات ماۋلەنوۆتىڭ ەسىمى وبلىس تۇرعاندارىنا جاقسى تانىس. ول 40 جىلعا جۋىق جۋرناليستىك ەڭبەك جولىندا وبلىستىق گازەتتە، اقپارات اگەنتتىگىندە، تەلەراديو كومپانيادا وزىندىك قولتاڭباسىن قالدىرعان كاسىپقوي جۋرناليست. العاشقى ماقالاسىن التىنشى سىنىپ وقىپ «قازاقستان پيونەرى» گازەتىندە جاريالاعان ب.ماۋلەنوۆ سودان بەرى «جەگەنى جانتاق، ارقالاعانى التىن سانالاتىن» ماماندىقتىڭ ىستىق سۋىعىنا ءتوزىپ كەلە جاتقان جان. مەكتەپتى ءتامامداعان سوڭ قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىنە تۇسەدى. قولىنا جۋرناليست ماماندىعىن راستايتىن ديپلومىن العان سوڭ 1976-1992 جىلدار ارالىعىنداعى قازىرگى «اq jol» (بۇرىنعى «ەڭبەك تۋى») گازەتىندە اعا ادەبي قىزمەتكەر، شولۋشى، ءبولىم مەڭگەرۋشىسى ءتارىزدى شىعارماشىلىق قىزمەت ساتىلارىنان وتكەن. كەيىننەن جامبىل وبلىستىق تەلەراديوكومپانياسى ءتوراعاسىنىڭ شىعارماشىلىق جونىندەگى ورىنباسارى، وبلىستىق راديونىڭ باس رەداكتورى قىزمەتتەرىن اتقاردى.

ءار جىلدارى ءبىرقاتار رەسپۋبليكالىق بۇقارالىق اقپارات قۇرالدارىنىڭ وبلىستاعى مەنشىكتى ءتىلشىسى بولىپ ەڭبەك ەتتى. اتاپ ايتقاندا بولات ماۋلەنوۆ وبلىستىق الەۋمەتتىك ەكونوميكالىق ءومىرىن رەسپۋبليكالىق «دالا ديدارى»، «اۋىل»، «ايقىن»، «قازاقستان—زامان» گازەتتەرىنىڭ وڭىردەگى مەنشىكتى ءتىلشىسى رەتىندە كورسەتە ءبىلدى. جۋرناليستىك قىزمەتتەن قول ۇزبەستەن مويىنقۇمدىق اتاقتى قىرىقتىقشى شوتاي تايباعاروۆ تاجىريبەسى جايىندا «قوي قىرقۋ شەبەرلىگى» كىتابى مەن «ەڭبەكپەن ەر اتانعاندار» وچەركتەر جيناعىن جارىققا شىعاردى.

بيىل بولات ماۋلەنوۆتىڭ وچەركتەر، سۇحباتتار، تولعاۋلار توپتاستىرىلعان «مۇز بەن گۇل» كىتابى باسپادان شىقتى.