ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ەلباسى جەرگىلىكتى حالىق كيەلى سانايتىن ورىندار جايىنداعى مالىمەتتەردى ۇرپاق ساناسىنا ءسىڭىرۋدىڭ ماڭىزدىلىعىنا توقتالعانى ءمالىم. وسى ورايدا جامبىل وبلىسى اۋماعىندا ورنالاسقا جىلاندىكول اتالاتىن ورىننىڭ تاريحى ايشا ءبيبىنىڭ بايلانىستىرىلا ايتىلادى دەپ جازادى Qamshy.kz اقپارات اگەنتتىگى.
ەل اراسىنداعى اڭىزداردا ءحى-حىى عاسىرلاردا ءومىر سۇرگەن عالىم ءارى اقىن سۇلەيمەن ءباقىرعانيدىڭ قىزى ايشا ءبيبى مەن تارازدى بيلەگەن شاح-ماحمۋد اراسىنداعى ماحاببات وقيعاسىنىڭ قايعىلى اياقتالعانى ايتىلادى. اكەسى سۇلەيمەن باقىرعاني ومىردەن وزعان سوڭ ايشا ءبيبى انامىز شەيح ايقوجانىڭ تاربيەسىندە قالعان. الايدا شەيح ايقوجا ايشا ءبيبى مەن شاح-ماحمۋدتىڭ نەكەسىنە قارسىلىق تانىتادى. سوعان قاراماستان بۇقارادان سۇيگەنى مەكەن ەتكەن تارازعا قاراي بەت العان ايشا ءبيبى جولدا قيىن جاعدايعا دۋشار بولادى. قازىرگى اسا وزەنىنىڭ جاعاسىنداعى جىلاندىكولگە ات شالدىرىپ، دەمالىپ جاتقان ايشا ءبيبىنى جىلان شاعىپ جازىم ەتەدى. سۇيىكتىسىن جىلان شاققانىن قاراحانعا بابادجا حاتۋن ەستىرتەدى. قاراحان جەتكەنشە جىلان ۋى دەنەسىنە تاراپ كەتكەن ايشا ءبيبى انامىز ءجانتاسىلىم ەتەر شاعىندا يمام ەكى عاشىقتىڭ نەكەسىن قيادى. الايدا يمامنىڭ «سەن قاراحاننىڭ جۇبايى ايشا ءبيبىسىڭ» دەگەن سوڭعى ءسوزدى ەستىگەن ايشا ءبيبى انامىزدىڭ كوزىنەن جاس اققان كۇيىن جالعان دۇنيەمەن قوش ايتىسىپ كەتە بارادى.
مىنە عاسىردان عاسىرلارعا جەتكەن وسى ءبىر تاريحي وقيعا بۇگىنگى اۋليەكول اۋىلىنىڭ ماڭىنداعى كولدە بولعان. قازىرگى تاڭدا اۋليەكول اتالاتىن كول ءبىر كەزدەرى جىلاندىكول اتالىپتى. ويتكەنى سول ءداۋىردىڭ كولدىڭ ماڭى جىلاننىڭ تۇر-تۇرىنە تولى بولعان ەكەن. ءقازىر وسى كەزىندە جىلان جورتقان قارا بالشىقتى ەمدىك ماقساتتا پايدالانادى. مەديسينادا جىلاننىڭ ۋىمەن قورەكتەنگەن بالشىق مىڭ ءتۇرلى اۋرۋعا شيپا سانالادى.
ءبىر كەزدەرى اڭىزدىڭ كەيىپكەرى، شىنايى ماحاببات سيمۆولىنا اينالعان ايشا ءبيبىنىڭ سۇيىكتىسىنە جەتەر جولىن بايلاعان جىلاندىكول بۇگىندە جەرگىلىكتى تۇرعىنداردىڭ ، جانىنا شيپا ىزدەگەندەردىڭ ات باسىن بۇراتىن شيپالى ورىنعا اينالدى. ال ءدال وسى جىلاندىكول ماڭىندا ماڭگىلىك ساپارعا اتتانعان قاس سۇلۋدىڭ قۇرمەتىنە سۇيىكتىسى قاراحان ورناتقان كەسەنە ءتاۋ ەتە كەلەتىن تۋريستەردىڭ سانى جىل ساناپ ۇلعايا تۇسۋدە. وسىدان سوڭ ءوز زامانىندا ايشا ءبيبىنىڭ ولىمىنە سەبەپكەر بولعانىمەن سونىڭ وتەۋىنە مىڭداعان ادامنىڭ دەرتىنە داۋا تابىلىپ جۇرگەن جىلاندىكولدىڭ كيەلىلىگى ەشقانداي تالاس تۋدىرا قويماس.
پىكىر قالدىرۋ