جامبىل وبلىسىنا قازاقستان رەسپۋبليكاسى پارلامەنت ءماجىلىسىنىڭ دەپۋتاتى، «نۇر وتان» پارتياسىنىڭ دەپۋتاتتىق فراكسيا مۇشەسى دارحان قامزابەك ۇلى مىڭباي جۇمىس ساپارىمەن كەلدى. ول اۋدانداردىڭ تىنىس-تىرشىلىگىمەن تانىسۋ ماقساتىندا مەركى اۋدانىنا ات باسىن بۇردى دەپ جازادى Qamshy.kz اقپارات اگەنتتىگى. 

ءبىرىنشى كەزەكتە ءماجىلىس دەپۋتاتى «مەركى ىرىمشىك زاۋىتى» اق جۇمىسىمەن تانىستى. زاۋىتتىڭ ينجەنەر-تەحنولوگى ليۋدميلا گالەنسوۆا كەلگەن قوناقتارىد قارسى الىپ، زاۋىتتىڭ جۇمىس بارىسىمەن تانىستىردى. مۇندا 40-قا جۋىق ءسۇت ونىمدەرىنىڭ تۇرلەرى شىعادى ەكەن. اتاپ ايتساق، ىرىمشىكتىڭ بىرنەشە ءتۇرى، ايراننىڭ ءتاتتى قوسىلعانى، تۇزدى ءتۇرى، برىنزا، ءارتۇرلى مايلىلىقتاعى قايماق جانە سارى ماي ونىمدەرى. بۇل تاۋارلار نارىقتا كوپشىلىكتىڭ سۇرانىسىنا يە. ونىمدەر جارمەڭكەسىمەن تانىستىرعان مامان سونىمەن قاتار زاۋىتتىڭ تاريحىن بايانداپ، كوپ جىلعى جەتىستىكتەرىمەن تانىستىردى. ول ءۇشىن اكت زالىندا ارنايى تاقتايشا دا ورنالاستىرىلىپتى. زاۋىت 126 ادامدى جۇمىسپەن قامتىپ وتىر. ماۋسىمدىق كەزەڭدە كۇنىنە 35 توننا ءونىمدى وڭدەسە، قازىرگى كۇنى 20 توننا سۇتتەن ءتۇرلى تاعامدار شىعارىپ وتىر. بۇل زاۋىتتىڭ باسقا زاۋىتتان ەرەكشەلىگى ەشقانداي قوسپاسىز تازا ءونىم شىعارۋىندا.

70 جىلدىق تاريحى بار بۇل كاسىپورىننىڭ قۇرىلعىلارى ەسكىرگەن. جاڭالاۋدى قاجەت ەتىپ-اق تۇر. زاۋىت جۇمىسشىلارى پارلامەنت ءماجىلىسى دەپۋتاتى دارحان قامزابەكۇلىنا قۇرال-جابدىقتارىن جاڭالاۋعا مەملەكەتتەن قولداۋ كورسەتىلسە دەگەن ۇسىنىستارىن ءبىلدىردى.

كەلەسى كەزەكتە اۋداندىق №18 بالالار جانە جاسوسپىرىمدەر سپورت مەكتەبىنە باردى. مەكتەپ ديرەكتورى دۋلات مارات ۇلى مۇنداعى جاتتىقتىرىلاتىن 10 سپورت ءتۇرىنىڭ اربىرىنە توقتالا كەلە، سپورت مەكتەبىنىڭ جاساقتالۋىن، جاتتىقتىعۋ زالدارىن ارالاتىپ كورسەتتى. سپورت مەكتەبى شاكىرتتەرىنىڭ باعىندىرعان بەلەستەرى دە از ەمەس ەكەندىگىنە ماقتاۋ تاقتاسىنا قاراپ، كوز جەتكىزدىك. مۇندا قول كۇرەستەن جاقىندا عانا تۇركيا ەلىنەن الەم چەمپيونى اتانىپ كەلگەن جارقىناي راحىمبايەۆا مەن قول كۇرەستەن ازيا چەمپيونى ءبيبىماريا كوپجاساروۆا دا جاتتىعادى ەكەن.

جالپى سپورتتىڭ ون تۇرىنەن 737 شاكىرت تاربيەلەپ وتىرعان ىرگەلى شاڭىراق ۇجىمىنا ساتتىلىك تىلەپ، جۇمىسشى توپ №9 ساۆۆا اتىنداعى مەكتەپكە جەتتى. مۇندا ءدال وسى كۇنى «STEAM LABOROTORY» – ءىت سىنىبىنىڭ اشىلۋ سالتاناتى ق ر پارلامەنت ءماجىلىسىنىڭ دەپۋتاتىنىڭ كەلۋىنە ارنايى دايىندالىپتى. ال قىزىل لەنتانى دارحان مىڭباي مەن اۋدان اكىمىنىڭ ورىنباسارى مارات قاسىم كەسىپ، روبوتوتەحنيكا سىنىبى وقۋشىلارى مەن ۇستازدارىنا بيىك بەلەستەرگە جەتىپ، اۋىل شارۋاشىلىعىندا، كۇندەلىكتى تۇرمىستا پايداسى تيەتىن قۇرىلعىلاردى ويلاپ تابۋدى ۇسىندى.

دارحان قامزابەك ۇلى مۇنداعى ۇستازدارمەن كەزدەسىپ، تىلەك، نيەت، ۇسىنىستارىن تىڭدادى. الداعى وقۋ جىلىندا سانالى شاكىرت تاربيەلەپ، ساپالى ءبىلىم بەرۋلەرىنە تىلەكتەستىگىن ايتتى.

بۇدان سوڭ «رۋحاني جاڭعىرۋ» باعدارلاماسى اياسىندا مەكتەپ جانىندا بيىلعى جىلى عانا اشىلعان قوعام قايراتكەرى، قازاق حالقىنىڭ كورنەكتى پەرزەنتى تۇرار رىسقۇلوۆتىڭ مۋزەيىن كوردى. مۇندا مەكتەپ وقۋشىلارى ءاربىر بۇرىشقا انىقتاما بەرسە، №9 مەكتەپ ءمۇعالىمى نازگۇل تولەندى قىزى مۋزەيدىڭ قالىپتاسۋ تاريحىن باياندادى. بۇل مۋزەي ت.رىسقۇلوۆ پەن م.جىلىسبايەۆتاردىڭ 1907-1910 جىلدارى وقىعان مەكتەبى ەدى. ەل اۋزىندا «قىزىل ءۇي» اتانىپ كەتكەن بۇل عيمارات قايتا قالپىنا كەلتىرۋ جۇمىستارىنان سوڭ مۋزەي بولىپ اشىلدى. دارحان قامزابەك ۇلى مۇنداعى ەستەلىك كىتاپقا: «تۇركىستان تۇتاس بول! تۇركى جۇرتى تۇگەل بول!»-دەپ ۇران تاستاعان بابامىزدىڭ ءىزى قالعان ءاربىر جەر – ءبىزدىڭ تاريحىمىز، ورتاق ماقتانىشىمىز. مۋزەيدىڭ ماڭىزىن كەلەر ۇرپاق باعالايتىن بولادى. جاقسى ىسكە سۇيسىنەسىڭ، جاناشىر بولعىڭ كەلەدى. ەكسپوناتتار كوبەيسىن، تاعىلىمى مول بولسىن»،- دەگەن تىلەك جازىپ، قولتاڭداسىن قالدىردى.

ۇلتتىق سانامىزدى جاڭعىرتىپ، تاريحىمىزدى دارىپتەيتىن بۇل ىسكە وڭ باعا بەرگەن ق ر پارلامەنتى ءماجىلىسىنىڭ دەپۋتاتى ت.رىسقۇلوۆ اۋدانىنا اتتاندى. مۇندا مەملەكەتتىك-جەكەمەنشىك ارىپتەستىك نەگىزىندە سالىندار «م.ميراس» بالالار باقشاسىنا، قۇلان اۋىل شارۋاشىلىق كوللەدجىنە، «اگروپارك قۇلان» جاۋاپكەرشىلىگى شەكتەۋلى سەرىكتەستىگىنىڭ 100 گەكتارعا ورنالاستىرعان شيە باعىنا بارىپ، اۋداننىڭ الەۋمەتتىك-ەكونوميكالىق دامۋىن باقىلادى.