جامبىل وبلىسىندا «Taraz Gid» اتاۋىمەن جاستار تۋريستىك سلەتى ءوتتى. جامبىل وربلىسى اكىمدىگىنىڭ تۋريزم باسقارماسى باستاماشى بولعان شاراعا «تاراز-تۋريزم» تۋريستىك اقپاراتتىق ورتالىعى مەن تاراز قالالىق جاستار رەسۋرستىق ورتالىعى، «جامبىل وبلىسىنىڭ الپينيزم، راديوباعدارلاۋ جانە سپورتتىق تۋريزم فەدەراسياسى» قوعامدىق بىرلەستىگى، «وتان ي.» تۋروپەراتور قولداۋ ءبىلدىردى.
شارا جامبىل وبلىسى مەن تاراز قالاسىندا ىشكى جاستار ءتۋريزمىن دامىتۋ، ءبىرىڭعاي تۋريستىك جاستار كلۋبىن قۇرۋ، اۆتورلىق تۋرلاردى «TripAdvisor»، «Indy-Guide»، «Viator» «Private Guide» سىندى حالىقارالىق تۋريستىك پلاتفورمالاردا دامىتۋ، تۋريزم ساراپشىلارىنىڭ ءوزارا اقپارات جانە تاجىريبە الماسۋى جانە جاستاردى تۋريزم سالاسىنداعى كاسىپكەرلىككە باۋلۋ جانە ىنتالاندىرۋدى ماقسات ەتتى.
جاستار سلەتىنا ايماقتاعى جوعارى وقۋ ورىندارىنىڭ جانە وبلىس كوللەدجدەرىنىڭ ستۋدەنتتەرى قاتىستى. سونىمەن بىرگە، ەلىمىزدىڭ ءار ايماعىنان كەلگەن ەكسكۋرساۆودتار، شەتەل ساياحاتشىلارى مەن بلوگەرلەرى، سونداي-اق مەملەكەتتىك مەكەمە قىزمەتكەرلەرى مەن ەل جانە الىس-جاقىن شەتەلدىڭ ءتۇرلى تۋريستىك مەكەمەلەرى اتسالىستى.
ەكى كۇنگە سوزىلعان تۋريستىك سلەتتىڭ العاشقى بولىگى تاراز قالاسىنداعى شوقان ءۋاليحانوۆ اتىنداعى وبلىستىق عىلىمي-امبەباپ كىتاپحاناسىنىڭ كوۆورگينگ زالىندا ءوتتى. مۇندا جامبىل وبلىسى اكىمدىگى تۋريزم باسقارماسىنىڭ باسشىسى قارلىعاش ارالبەكوۆا فورۋمدى سالتاناتتى اشىپ، قوناقتاردى وبلىستاعى تۋريزم سالاسىنىڭ الەۋەتىمەن تانىستىردى.
جيىندا ەل جانە شەتەل ساياحاتشىلارى ءوز ويلارىمەن ءبولىسىپ، ءتۋريزمدى دامىتۋ تۇرعىسىنداعى ۇسىنىستارىن ورتاعا سالدى. اتاپ ايتقاندا، «تاراز تۋريزم» مەكەمەسىنىڭ ديرەكتورى ۇ. جولدىقۇل ۇلى تاراز قالاسىنداعى تۋريستىك مارشرۋتتاردى تانىستىرسا، فرانسيادان ارنايى كەلگەن ساياحاتشىلار اۋليەاتا ايماعىن ارالاۋدا العان اسەرلەرىمەن ءبولىسىپ، ءوز ويلارىن ورتاعا سالدى.
قاتىسۋشىلار شارا سوڭىندا ورتاعاسىرلىق تورتكۇل كەرۋەن سارايىن ارالاپ، قازاق حالقىنىڭ ءداستۇرى مەن ۇلتتىق تاعام، ۇلتتىق سپورت سىندى قۇندىلىقتارىنان حاباردار بولدى.
سلەتتىڭ ەكىنشى كۇنى قاتىسۋشىلارەكولوگيالىق تۋر وتكىزدى. جۋالى اۋدانىندا ورنالاسقان بەرىكقارا شاتقالىنا اتتانعان ستۋدەنتتەر الدىمەن تاۋلى جەردەگى قاۋىپسىزدىك تەحنيكاسىمەن تانىستى. ودان سوڭ تاۋعا ورمەلەۋدىڭ پراكتيكالىق جاتتىعۋلارىنا كىرىستى. قاتىسۋشىلار ءشوپتى شاتقالدارمەن ءجۇرۋ تەحنيكاسىن دا مەڭگەرىپ، تاۋلى جەردى باعدارلاۋدان دا ساباقتار الدى. شارا سوڭىندا بارلىق قاتىسۋشىلار سەرتيفيكاتتارمەن ماراپاتتالدى.
پىكىر قالدىرۋ