قازاقستان 140 ەتنوس پەن 19 كونفەسسيا وكىلدەرىنىڭ تۋعان شاڭىراعىنا اينالدى. ازاماتتىق  تاتۋلىق پەن ۇلتارالىق كەلىسىم – ءبىزدىڭ باستى قۇندىلىعىمىز. تاراز قالاسىنىڭ «دوستىق ۇيىندە»   جامبىل وبلىسى قازاقستان حالقى اسسامبلەياسىنىڭ «ارحىز» رەسپۋبليكالىق قوعامدىق بىرلەستىگى –   «بىرلىك» قاراشاي-بالكارلاردىڭ جامبىل فيليالى» ەتنومادەني بىرلەستىگىنىڭ ەتنوس كۇنى ءوتتى دەپ جازادى Qamshy.kz اقپارات اگەنتتىگى. 

جامبىل وبلىسى اكىمى اپپاراتى «قوعامدىق كەلىسىم» كوممۋنالدىق مەملەكەتتىك مەكەمەسى مەن «ارحىز» رەسپۋبليكالىق قوعامدىق بىرلەستىگىنىڭ جانىنداعى وبلىستىق «بىرلىك» قاراشاي-بالكارلار جامبىل فيليالى» ەتنومادەني بىرلەستىگى ۇيىمداستىرعان  باسقوسۋدا  جامبىل  وبلىسى اكىمى اپپاراتى  «قوعامدىق كەلىسىم» كمم باسشىسى  رانو ماحسۋد قىزى  جيىلعان قاۋىمدى اتاۋلى كۇنمەن قۇتتىقتادى.

-  قازاقستان – بارلىق ەتنوس وكىلدەرىنە كەڭ قۇشاعىن جايا بىلگەن قاسيەتتى ەل. وڭىرلىك «بىرلىك» قاراشاي-بالقارلار ەتنومادەني بىرلەستىگىن بۇگىنگى ەتنوس كۇندەرىمەن قۇتتىقتاي وتىرىپ، وتكەنى مەن بولاشاعىنا زور قۇرمەتپەن قارايتىندىعىمىزدى بىلدىرەمىز. قاراشاي-بالقارلار قاۋىمداستىعىنا دەگەن ىقىلاسىمىز شەكسىز. ۇيىمنىڭ تالاپتى، ونەرلى جاستارىنا وسىپ-وركەندەۋ تىلەيمىز،- دەپ جىلى لەبىزىن ءبىلدىردى.

ءىس-شارا بارىسىندا جاستاردى تاربيەلەۋ  جانە ۇلكەنگە قۇرمەت كورسەتۋ، اتا-بابالار رۋحىنا تاعزىم ەتۋ،  باسقا دا ەتنيكالىق ەرەكشەلىكتەرگە قاتىستى داستۇرلەردى ساقتاۋ ماسەلەلەرى حاقىندا كوپ ويلار ايتىلدى.

  – قانشاما قايعى-قاسىرەت پەن قۋعىن-سۇرگىندى باسىنان وتكەرگەن قاراشايلاردىڭ جانىنا باتقان قيىندىعىن تەرەڭىنەن ءتۇسىنىپ، ىستىق ىقىلاسىن كورسەتكەن قازاق  حالقى بىزگە وتە جىلى كورىنەدى. ءبىزدىڭ ۇرپاقتارىمىز قازاق توپىراعىندا ءوسىپ-ونىپ، قازاق ەلى مەن جەرىنە ادال قىزمەت ەتىپ كەلەدى .

سانى از بولعانىمەن، قاراشاي-بالقار جۇرتى ۇلتتىق بولمىسىن ساقتاپ، مادەني ورتالىقتارى ارقىلى، وزىندىك ءسالت-داستۇر مەن مادەنيەتى باردا  ۇلت رەتىندەگى ەرەكشەلىكتەرىن قاستەرلەي بىلەتىن حالىق. بۇگىندە وسى اسسامبلەيا، تاعدىرى توعىسقان ەتنوستىق ۇلت وكىلدەرىنىڭ اۋىزبىرشىلىگىن ءبىر شاڭىراق استىندا ۇيىتىپ، بىرلىگىن نىعايتۋ باعىتىندا تولايىم تىرلىكتەر اتقارۋدا - دەدى قاراشاي-بالقارلار بىرلەستىگىنىڭ باسشىسى لەليا احماد قىزى.

جيىن سوڭىندا جامبىل وبلىسى قحا يگى ءىس-شارالارىنا ايانباي ءوز ۇلەستەرىن قوسىپ، قايىرىمدىلىق تانىتىپ جۇرگەن «بىرلىك» قاراشاي-بالقارلار بىرلەستىگىنىڭ انالار كەڭەسىنىڭ بەدەلدى مۇشەلەرى مەن شىعارماشىلىق جاستارىنا العىس حاتتار مەن سىيلىقتار تارتۋ ەتىلدى.