1 قىركۇيەك – ءبىلىم كۇنىنە وراي جامبىل وبلىسى بايزاق اۋدانىنىڭ اقشولاق اۋىلىندا 120 ورىندىق جاڭا مەكتەپ پايدالانۋعا بەرىلدى. مەرەكەگە ساي بەزەندىرىلگەن جاڭا مەكتەپكە شات-شادىمان كۇيگە بولەنگەن اتا-انالار بالالارىن جەتەكتەپ اعىلىپ جاتتى. الىستان مەن مۇندالاپ تۇرعان ءبىلىم بەرۋ مەكەمەسى سالتاناتتى تۇردە وقۋشىلارىن قارسى الدى.

ءبىلىم بەرۋ ءىسى قاي ۋاقىتتا دا، قاي عاسىردا دا قوعام دامۋى مەن تۇراقتىلىعىنىڭ نەگىزگى ولشەمى بولىپ تابىلادى. بۇگىنگى شاكىرت – ەرتەڭگى مامان، ەلىمىزدىڭ گۇلدەنىپ – وسۋىنە، وركەندەۋىنە ۇلەس قوساتىن باستى تۇلعا. ەلباسىنىڭ ەل يگىلىگىن كوزدەگەن ساليقالى ساياساتىنىڭ ارقاسىندا ءبىلىم بەرۋ جانە الەۋمەتتىك سالالارعا جاساپ وتىرعان قامقورلىعى ۇشان - تەڭىز. سونىڭ ءبىر كورىنىسى جاڭادان اشىلىپ وتىرعان ءبىلىم ورداسى. وسى كۇنگە دەيىن اقشولاق اۋىلىندا 70 ورىندىق ورتا مەكتەپ ءۇش اۋىسىممەن جۇمىس ىستەپ كەلگەن ەدى. بۇل مەكتەپتىڭ اشىلۋىن اقشولاقتىقتار اسىعا كۇتتى دەسەك ارتىق ايتپاعانىمىز. ءبىلىم كۇنى مەرەكەسى اقشولاق اۋىلىنىڭ بالالارى ءۇشىن ەرەكشە كۇن بولعانى انىق.

“ونەر” مەكتەبى ونەرپازدارىنىڭ اسەم بيىمەن اشىلعان سالتاناتتى جيىندا قازاقستان رەسپۋبليكاسىنىڭ مەملەكەتتىك گيمنى ورىندالدى. “ونەر” مەكتەبىنىڭ وقۋشىسى مۋحراب بولاتبەك “قازاق ەلى” ءانىن اۋەلەتە شىرقاعان سوڭ، وبلىس اكىمىنىڭ ورىنباسارى سۇلۋشاش قۇرمانبەكوۆا ءسوز الىپ، بارلىق اتا-انالار مەن مۇعالىمدەردى، وقۋشىلاردى ايتۋلى وقيعامەن قۇتتىقتادى. سۇلۋشاش ساتبەك قىزى ءوز سوزىندە سوڭعى بەس جىلدا وسى ءبىلىم مەكەمەسى ءۇش اۋىسىمدا وقىپ كەلگەنىن، وڭىردە ءۇش جىلدان بەرى ءبىلىم بەرۋ سالاسىنا ءبولىنىپ جاتقان قارجىنىڭ كولەمى ءۇش ەسەگە ارتىپ، 130 ملرد. تەڭگەنى قۇراعانىن، بۇگىنگى كۇنى وبلىس بويىنشا بەس مەكتەپ جاڭادان پايدالانۋعا بەرىلىپ وتىرعانىن جەتكىزدى. سونداي-اق، وبلىس اكىمىنىڭ ارنايى سىيلىعىن تابىس ەتتى.

ال، اۋىل اقساقالى، ەڭبەك ارداگەرى قالمان باقتىبايەۆ بارشا تۇرعىنداردى قۇتتىقتاپ: “جاڭا مەكتەبىمىز قۇتتى بولسىن. وبلىس، اۋدان باسشىلىعىنا راحمەت. تارىداي بولىپ كىرىپ، تاۋداي بولىپ شىعىپ، بيىكتەردەن كورىنىڭدەر شىراقتارىم!”، - دەپ اتالىق اق باتاسىن بەردى. ءوز كەزەگىندە اتا - انالار دا قىستىڭ قىسپاعىنا، جازدىڭ اپتاپ ىستىعىنا قاراماستان مەكتەپ قۇرىلىسىن مەزگىلىندە اياقتاپ، جاس ۇرپاققا ۇسىنىپ وتىرعان ەركىن قۇلمامبەتوۆ جەتەكشىلىك ەتەتىن «استانا-ۋپ» قۇرىلىس كومپانياسىنا ريزاشىلىق سەزىمدەرىن ءبىلدىرىپ جاتتى.

جاڭا نىساننىڭ لەنتاسىن وبلىس اكىمىنىڭ ورىنباسارى سۇلۋشاش قۇرمانبەكوۆا مەن ەڭبەك ارداگەرى قالمان باقتىبايەۆ قيدى. العاشقى قوڭىراۋ سوعىلىپ، 182 وقۋشى جاڭا مەكتەپتىڭ تابالدىرىعىن اتتاسا، ولاردىڭ جيىرما ءتورتى 1-سىنىپقا قابىلداندى.

ساپالى ءبىلىم الۋعا بارلىق جاعدايلار جاسالىپ، زاماناۋي قۇرال-جابدىقتارمەن قامتاماسىز ەتىلگەن مەكتەپ ءىشىن كەلگەن قوناقتار ارالاپ شىقتى. كىرەبەرىستە باستاۋىش سىنىپ وقۋشىلارىنىڭ تاقپاقتارىن تىڭداپ، “بەينەلەۋ” جانە “روبوتوتەحنيكا” ۇيىرمەلەرىنىڭ جۇمىستارىمەن تانىستى. سونداي-اق، “باستاۋىش سىنىپ”، “ينفورماتيكا”، “فيزيكا” كابينەتتەرى، كىتاپحانا، ءماجىلىس زالى، سپورت زالى مەن اسحانانى ارالادى. عيماراتتا جاڭاشىل ءبىلىم الۋعا قولايلى زاماناۋي كابينەتتەر مەن زەرتحانالار، مۋلتيمەديالىق كابينەتتەر بار. سالتاناتتى شارادان سوڭ بارلىق سىنىپتاردا «سانالى ۇرپاق - جارقىن بولاشاق» تاقىرىبىندا اشىق تاربيە ساعاتتارى وتكىزىلىپ جاتتى.

جاڭا مەكتەپتىڭ اشىلۋ سالتاناتىنا اۋدان اكىمى نۇرجان نۇرجىگىتوۆ، اۋداندىق ءماسليحات حاتشىسى نۇرجان تلەپوۆ، اۋداندىق پارتيا فيليالى ءتوراعاسىنىڭ ءبىرىنشى ورىنباسارى شولپان بايتاقوۆا، اۋدان اكىمدىگى ءبىلىم ءبولىمىنىڭ باسشىسى نۇرجان نۇرالييەۆ قاتىستى.