ەلباسىنىڭ «ۇلى دالانىڭ جەتى قىرى» اتتى ماقالاسىندا اتا-بابالارىمىزدىڭ ەرتەدەن تەحنيكالىق پروگرەستىڭ بەل ورتاسىنان تابىلىپ، وركەنيەتكە ءوز ۇلەسىن قوسقاندىعى ايتىلدى. بابادان ۇرپاققا جەتكەن وسىناۋ ءبىر قۇندىلىق ۇلتتىق سپورت تۇرلەرى سانالادى. ال ولاردى زامان اعىمىنا ساي جەتىلدىرۋ ۋاقىت تالابى. وسى ورايدا، م.ح. دۋلاتي اتىنداعى تاراز مەملەكەتتىك ۋنيۆەرسيتەتىنىڭ دوسەنتتەرى اسىق اتۋ ويىنىنىڭ «ءۇشباس» دەپ اتالاتىن ءتۇرىن ويلاپ تاۋىپ، ونى ناسيحاتتاۋدا، دەپ جازادى Qamshy.kz اقپارات اگەنتتىگى. 

م.ح. دۋلاتي اتىنداعى تاراز مەملەكەتتىك ۋنيۆەرسيتەتىنىڭ «دەنە شىنىقتىرۋ جانە سپورت» كافەدراسىنىڭ دوسەنتتەرى بەكبولات امانجول ۇلى، جامبىل ەلەمەس ۇلى، دارحان ىزتىلەۋ ۇلى ويلاپ تاپقان ويىن اسىق اتۋ سپورتىنىڭ جاڭعىرتىلعان نۇسقاسى سانالادى. ويىننىڭ ەڭ باستى ەرەكشەلىگى ونى جىل ون ەكى اي بويى ويناتۋعا بولاتىندىعىندا بولىپ وتىر. ول ءۇشىن 12 قوي اسىعى، 3 قىزىل ءتۇستى ساقا جانە جەڭىل تاقتايشا قاجەت. «ءۇشباس» ويىنىنىڭ ەرەجەسىندە ونى جاس ەرەكشەلىكتەرىنە بايلانىستى بىرنەشە توپقا ءبولىپ ويناتۋ قاراستىرىلعان. ماسەلەن 6-10 جاس ارالىعىنداعى بۇلدىرشىندەر اسىقتى 1 مەتر جەردەن كوزدەۋگە ءتيىس بولسا، 11-16 جاستاعى جاسوسپىرىمدەر ءۇشىن بۇل مەجە 2 مەتر دەپ بەكىتىلگەن. 17 جاستان اسقان ويىنشىلار «ءۇشباستان» ۇزدىك شىعۋى ءۇشىن اسىقتى 3 مەتر قاشىقتىقتان اتىپ ءتۇسىرۋى كەرەك. ويىنشىلار ءبىر ويىندا 3 اتىس جاساۋعا رۇقسات بەرىلگەن. ولار ساقالارىن قاز قاتار تىگىلگەن 12 اسىققا قاراي باعىتتاي اتادى. جەڭىمپاز وزىنە بەرىلگەن 3 مۇمكىندىكتى ءمۇلت جىبەرمەي تورعا اسىقتى كوپ تۇسىرگەن ويىنشى اتانادى.

«ءۇشباس» ويىنى ويىننىڭ بەلسەندى تۇرىنە جاتقىزىلادى. ويتكەنى مۇندا جەڭىسكە جەتۋ ءۇشىن جۇگىرۋگە، سەكىرۋگە، نىسانى كوزدەۋگە تۋرا كەلەدى. قازىرگى تاڭدا جاستار اراسىندا كەڭ تاراعان بيليارد ويىنى سەكىلدى «ءۇشباس» ويىنىنىڭ ۇلتتىق سپورت ءتۇرىن جاستار اراسىندا كەڭ تانىمال ەتەتىندىگىنە كۇمان جوق. ءارى مۇنداعى باستى نازار جاستاردىڭ قۇر اسىق ويىنىنا قۇشتارلىعىن ارتتىرۋ ەمەس. سول ارقىلى ۇلتتىق قۇندىلىقتاردى دارىپتەۋ ەكەنىن ايتا كەتكەن ءجون.

بۇگىندە وبلىس اۋماعىندا وبلىستىق، قالالىق، اۋداندىق دەڭگەيدە «ءۇشباس» ويىنىنان سايىستار ۇيىمداستىرىلىپ تۇرادى.