جامبىلدا ەل اراسىنداعى داۋ-دامايدى شەشۋدەگى وبلىستىق ارداگەرلەر كەڭەسى جانىنان قۇرىلعان بيلەر كەڭەسىنىڭ ىقپالى زور. قۇرىلعاننان بەرگى ارالىقتا بيلەر كەڭەسى 82 داۋلى ماسەلەنىڭ ءتۇيىنىن تاۋىپ، قوس تاراپتىڭ تاتۋلاسۋىنا مۇرىندىق بولعان، دەپ جازادى Qamshy.kz اقپارات اگەنتتىگى.
ەلباسىنىڭ جوعارى سوتقا ەل اراسىنداعى ءىرىلى-ۇساقتى داۋ-دامايدى سوتقا جەتكىزبەي شەشۋ تاجىريبەسىن ەنگىزۋ تاپسىرماسىنا وراي جەرگىلىكتى جەرلەردە اقساقالدار ۇيىمىنىڭ باستاماسىمەن بيلەر كەڭەسى قۇرىلدى. جامبىل وبلىستىق ارداگەررلەر كەڭەسى جانىنان قۇرىلعان وسىناۋ كەڭەسكە ءقازىر 7 ادام مۇشەلىككە وتكەن. سونداي-اق تاراز قالاسىمەن بىرگە 5 اۋداندا وسى تاجىريبەنى كەڭىنەن قولدانىسقا ەنگىزگەن. اۋداندىق دەڭگەيدە بيلەر كەڭەسىنىڭ قۇرامى 5 ادامنان تۇرسا، اۋىلدىق وكرۋگتەگى داۋ-دامايدى شەشۋ 3 ادامنان تۇراتىن بيلەر كەڭەسىنىڭ ەنشىسىنە تيەدى. ءقازىر وبلىس اۋماعىندا جالپى سانى 518 بي داۋ-دامايدى سوتقا دەيىن جەتكىزبەي شەشۋگە بار كۇش جىگەرىن جۇمساۋدا.
–نەگىزىنەن بيلەر كەڭەسىنىڭ قۇرامىنا ەلگە سىيلى، اۋىزى دۋالى اقساقالدار مەن قاريالار سايلانادى. ولاردىڭ بىلىم-بىلىگىن ۇنەمى جەتىلدىرىپ وتىرۋى باستى نازاردا. ءبىلىمىن كاسىبي دەڭگەيدە شىڭداعان مەدياتورلارعا ارنايى سەرتيفيكاتتار تابىس ەتىلدى. قازىرگى تاڭدا وبلىستىق ارداگەرلەر كەڭەسى جانىنداعى بيلەر كەڭەسى ارداگەرلەر ورتالىعى عيماراتىندا جۇمىس جاسايدى. ولارعا ارناپ «مەدياسيا –بىتىمگەرشىلىككە اكەلەتىن جول» دەپ اتالاتىن ارنايى بۇرىش تا ۇيىمداستىرىلعان. بيلەر كەڭەسىنىڭ جۇمىسىن جەتىلدىرۋ ماقساتىندا جۋىردا وبلىستىق سوت پەن ارداگەرلەر كەڭەسى اراسىندا ىنتىماقتاستىق تۋرالى مەموراندۋمعا قول قويىلدى. وسى مەموراندۋم ارقىلى بيلەر ينستيتۋتىنىڭ ءرولىن نىعايتىپ، «مەدياسيا تۋرالى» زاڭنىڭ شەڭبەرىندە اۋىل-ايماق، كورشى-قولاڭ، اعايىن-تۋىس اراسىنداعى داۋدى رەتتەۋدىڭ تەتىگى قاراستىرىلماق،–دەيدى وبلىستىق ارداگەرلەر كەڭەسى جانىنداعى بيلەر كەڭەسىنىڭ ءتوراعاسى وڭلاسىن ەسىركەپوۆ.
ءوز جۇمىسىن باستاعاننان بەرى ەل اراسىندا ءىرىلى-ۇساقتى 82 داۋدىڭ ءتۇيىنىن سوتقا جەتكىزبەي تارقاتىپ بەرگەن بىتىمگەرلەر جىل باسىنان بەرگى ارالىقتى بىرنەشە ارىز-شاعىمدى قاراپ ءتيىستى شەشىمدەر شىعارعان. اسىرەسە، تالاس، جامبىل اۋداندارىنداعى بيلەر كەڭەسىنىڭ بەلسەندىلىگىن ەرەكشە اتاپ وتكەن ءجون. راسىندا قازاق قوعامىندا كەزىندە داۋ-جانجالدىڭ قاي-قايسىسىن بولماسىن جالعىز اۋىز سوزبەن شەشىپ، قوس تاراپتى تاتۋلاستىرۋ بيلەرگە جۇكتەلگەن مىندەت بولاتىن. جامبىلدىق قاريالاردىڭ ارەكەتىنە قاراپ وسى ءبىر وزىق ءداستۇردى زامان اعىمىنا ساي بەيىمدەۋدەن ۇتارىمىز كوپ بولاتىندىعىن باعامداي بەرۋگە بولادى.
