تارازدىق كاسىپكەرلەر «قازاقستان رەسپۋبليكاسىنداعى ءتىل تۋرالى» زاڭىن جەتىك بىلەدى. اتالعان زاڭداعى 19،21 باپتارىنىڭ ساقتالۋى ءتىل سالاسى ماماندارىنىڭ تۇراقتى باقىلاۋىندا، دەپ جازادى Qamshy.kz اقپاراتتىق اگەنتتىگى.

جالپى وبلىس ورتالىعىنداعى ساۋدا ورىندارىنىڭ، دۇكەندەر مەن وزگە دە كاسىپتىك نىساندارداعى جارناما ءماتىنىڭ ساۋاتتىلىعى سالا ماماندارىنىڭ تۇراقتى باقىلاۋىندا. بۇل ماقساتتا تاراز قالاسىندا رەيدتىك شارالار ءجيى وتكىزىلىپ تۇرادى. سونىڭ ەسەبىنەن تارازدىق كاسىپكەرلەر «قازاقستان رەسپۋبليكاسىنداعى ءتىل تۋرالى» زاڭ تالاپتارىنا جەتىك. بۇل زاڭنىڭ 19، 21-باپتارى مەملەكەتتىك ەمەس ۇيىمداردىڭ جۇمىسىندا مەملەكەتتىك ءتىل ەڭ ءبىرىنشى كەزەكتە، ال باسقا تىلدەر قاجەت بولعان جاعدايدا عانا قولدانىلاتىندىعى تايعا تاڭبا باسقانداي ەتىپ جازىلۋى كەرەك. اتالعان زاڭدىلىقتىڭ ورىندالۋىن زەردەلەۋ ماقساتىندا وبلىس ورتالىعىنداعى ءبىرقاتار كاسىپكەرلىك نىسانداردى ءسۇزىپ شىققان ءتىل ماماندارى جامبىلدىق كاسىپ يەلەرىنىڭ جارناما تىلىندەگى ساۋاتتىلىق دەڭگەيى جوعارى ەكەنىن ايتادى.

– 2019 جىلدىڭ باسىندا جامبىل وبلىسى اكىمىنىڭ قاتىسۋىمەن وتكەن كەڭەستە اعىمداعى جىل سوڭىنا دەيىن 2019 جىلى تاراز قالاسىنداعى مەيرامحانا، قوناق ءۇي، ساۋدا ۇيلەرى مەن ءسان سالوندارىنىڭ كورنەكى اقپاراتتارىنداعى مەملەكەتتىك ءتىلدىڭ پايدالانىلۋ دارەجەسىن 100 پايىزعا جەتكىزۋ تۋرالى تاپسىرما بەرىلدى. سوندىقتان وبلىس اكىمدىگىنىڭ تىلدەردى دامىتۋ باسقارما مەن وبلىستىق اكىمدىكتىڭ بەكىتكەن كەلىسىمىنە سايكەس كورنەكى اقپاراتتىڭ پايدالانۋىن باقىلاۋدىڭ وڭىرلەردەگى قامتۋ دارەجەسى 100 پايىزعا جەتۋى كەرەك، – دەيدى وبلىس اكىمدىگى تىلدەردى دامىتۋ باسقارماسىنىڭ باسشىسى مىندەتىن اتقارۋشى ءنابيرا ءسۇيمانوۆا.

جارناما ساۋداداعى ەڭ ۇتىمدى ماركەتينگتىك ءادىس بولعانىمەن ونى جاساۋدىڭ دا ءوز زاڭدىلىقتارى بار. جانە ق ر «جارناما تۋرالى» زاڭى ساۋاتسىز جارناماعا جول بەرمەي جانە ولارعا تىيىم سالۋدى ماقسات ەتەدى. سايكەسىنشە دۇرىس جارناما اۋەلى مەملەكەتتىك تىلدە جازىلۋى كەرەك جانە كاسىپكەردىڭ قالاۋىنشا بۇل جازۋدىڭ بىرنەشە تىلدەگى نۇسقاسى بولۋى مۇمكىن. ال بۇل زاڭ تالاپتارىن كوزگە ىلمەگەن كاسىپكەرلەرگە سىرتقى جارناماداعى قاتەلەرگە قاتىستى ەسكەرتۋ حات تۇرىندە جولدانادى. سونداي-اق سىرتقى جارناماعا لاتىن ءقارپىن قولدانۋعا دا بولادى. تەك ءماتىننىڭ بارىنشا ساۋاتتى بولعانى ابزال. قاجەت جاعدايدا كاسىپكەر بۇل ماتىندەردى ءتىل سالاسىنا جەتىك مامنادارعا تەكسەرتكەنى دۇرىس.

ايتا كەتەتىن تاعى ءبىر جايت تاراز قالاسىندا جارنامالىق ماتىندەردىڭ ساۋاتتى جازىلۋىنا، ورنالاسۋىنا اقىسىز كونسۋلتاسيالىق كومەك كورسەتەتىن «جەدەل جەلى» قىزمەتى دە ۇيىمداستىرىلعان.