تارازدىق ابىلحان وتەپبەرگەنوۆ ەلۋ جاسىندا قولونەرگە بەت بۇرىپ، ءقوشقارمۇيىز جاساۋدى قولعا العان. بۇگىندە شەبەردىڭ تۋىندىلارى «تورتكۇل» كەشەنىندەگى «كونە تاراز شەبەرلەرى» ەتنوجوباسىنا قويىلىپ، قالا تۇرعىندارى مەن قوناقتارىنىڭ تاراپىنان وڭ باعاعا يە بولۋدا، دەپ جازادى Qamshy.kz اقپارات اگەنتتىگى. 

الىس جولدارعا شىعاتىن جۇك كولىكتەرىن تىزگىندەگەن كولىك جۇرگىزۋشىسى بولعان ا.وتەپبەرگەنوۆتىڭ بويىنداعى سۋرەت سالۋ، قولونەر بۇيىمدارىن جاساۋ، اعاش ويۋ قابىلەتى 4 جىل بۇرىن ويانعان.

–2015 جىلى تاراز قالاسىندا قازاق حاندىعىنىڭ 550 جىلدىعى مەرەيتويى دۇركىرەپ ءوتتى. سول شارانىڭ اياسىندا وتكىزىلگەن رەسپۋبليكا ايتىسقا بارىپ، «بالاساعۇن» ورتالىق كونسەرت زالىنىڭ دالىزىندە اشىلعان كورمەدەن كونە اعاش ىدىسقا كوزىم ءتۇستى. وتە شەبەر جاسالعان دۇنيەگە سۇيسىنگەنىم سونشالىقتى ونى جاساپ كورۋگە تىرىستىم.

ۇيگە بارعان سوڭ كورمەدەگى دۇنيە كوز الدىمدا تۇرىپ الدى. بىرەر كۇننەن ويدا جوقتا ەسىك الدىنداعى جەمىس اعاشىنىڭ بىرنەشە جىلدان بەرى جەمىس بەرمەي قۇر تۇرعانى ەسىمە ساپ ەتە قالدى. دەرەۋ اعاشتى كەسىپ، كەپتىردىم. العاشقى تۋىندىمدى ءدال وسى اعاشتان قاراپايىم بالتا، ارا، پىشاقتىڭ كومەگىمە ويىپ الدىم. جامان شىقپاعان سياقتى،–دەيدى شەبەر.

تىرناقالدى تۋىندىسىن ويۋعا كوڭىل اۋعان كەلىنىنە سىيعا تارتقا شەبەر مۇنان سوڭ بۇل ىسپەن شىنداپ اينالىسۋعا بەل بۋادى. الايدا شەبەر العاشقى جاساعان تۋىندىلارىنىڭ دەنى وزىنە ۇناماعانىن ايتادى. مۇنىڭ سەبەبىن شەبەر قاجەتتى قۇرال-جابدىقتاردىڭ بولماۋىمەن تۇسىندىرەدى. كوپ وتپەي شەبەردىڭ قولىنان كادەسىيدىڭ ءتۇر-تۇرى شىقتى. كەيىننەن از-ماز قارجىنىڭ باسىن جيناپ، قولونەر شەبەرىنە قاجەتتى بۇيىمداردى ساتىپ الادى. ءقازىر شەبەر جامبىل اۋدانىنداعى ايشا ءبيبى اۋىلىنان تارازداعى ەجەلگى «تورتكۇل» كەرۋەن سارايىنا ارنايى كەلىپ، وبلىس اكىمدىگىنىڭ تۋريزم باسقارماسى ۇيىمداستىرعان «كونە تاراز شەبەرلەرى» ەتنوجوباسىنا قاتىسادى. بۇگىندە ءوزىنىڭ باي تاريحىمەن جانە اڭىز-اڭگىمەلەر ارقاۋ بولۋىمەن وڭىردەگى بىردەن ءبىر تۋريستىك نىسان سانالاتىن «تورتكۇلگە» تابان تىرەگەندەردىڭ اراسىندا ابىلحان وتەپبەرگەنوۆتىڭ تۋىندىلارىنا سۇيسىنە قارايدى. ءتىپتى ون ساۋساعىنان ونەر تامعان شەبەردىڭ كوزدىڭ جاۋىن الار بۇيىمداردىڭ جانىندا ساعات بويى تاپجىلماي وتىراتىندار تابىلدى. ايتپاقشى ابىلحان شەبەردىڭ قولونەر جاساۋداعى ەرەكشەلىكتەرىنە قىزىعۋشىلاردىڭ اراسىندا ءوزىنىڭ نەمەرەسى مادينا دا بار.