تاراز قالاسىنداعى «كونە تاراز»ارحەولوگيالىق كەشەنى جوباسىنىڭ جالعاسى رەتىندە سالىنىپ جاتقان «شاحريستان» تاريحي-مادەني ورتالىعى وبلىس ءتۋريزمىنىڭ بويتۇمارىنا اينالماق.ويتكەنى مۇندا ولكەتانۋ مۇراجايى، «رۋحانيات» ورتالىعى، قولونەر شەبەرلەرى مەن كوركەمسۋرەت گالەرەياسى، كورمە پاۆيلونى، امفيتەاتر سىندى بىرەگەي نىساندار سالىنادى، دەپ جازادى Qamshy.kz اقپارات اگەنتتىگى. 

قازىرگى تاڭدا «شاحريستان» تاريحي-مادەني ورتالىعىنىڭ قۇرىلىسىمەن 8 قۇرىلىس كومپانياسى اينالىسىپ جاتىر. قۇرىلىس جۇمىستارىن قازان ايىنىڭ سوڭىنا دەيىن تولىق اياقتاۋ جوسپارلانىپ وتىر. ءوز كەزەگىندە جاڭا تاريحي-مادەني ورتالىعىنىڭ قۇرىلىسى وبلىس اكىمى اسقار مىرزاحمەتوۆتىڭ تىكەلەي باقىلاۋىنا العان. ءوڭىر باسشىسى جاۋاپتى باسقارمالارعا ديزاينەرلىك ارلەۋ جۇمىستارىندا جاڭا تەحنولوگيانى مەڭگەرگەن كومپانيالارمەن ارىپتەستىك تانىتۋدى تاپسىردى.

ال وبلىس اكىمدىگىنىڭ تۋريزم باسقارماسىنىڭ باسشىسى قارلىعاش ارالبەكوۆا «شاحريستان» تاريحي-مادەني ورتالىعىنداعى كورمە زالىندا وڭىردەگى تۋريستىك نىساندارمەن ونلاين رەجيمدە تانىسۋعا مۇمكىندىك بەرەتىن قۇرىلعىلاردىڭ ورناتىلاتىندىعىن ايتادى. ال شەبەرلەر قالاشىعىندا 23 قولونەر شەبەرىنىڭ 1 118 كادەسىيى ساۋداعا شىعارىلماق.

–الەمدىك تۋريزم نارىعىندا پاريج ءسان استاناسى رەتىندە تانىمال بولسا، ءبىز تارازدى شەبەرلەر قالاسى رەتىندە تانىتاتىن بولامىز، –دەيدى قارلىعاش ءامىر قىزى.

قۇرىلىس باسقارماسىنىڭ وكىلدەرى مۇنداعى قۇرىلىس، ساۋلەتتىك ارلەۋ جۇمىستارىنىڭ وزگەشەلىكتەرىن ايتادى.

— بۇل ماڭداعى نىسانداردىڭ وزگە قالالارداعىداي «اربات» تولىقتىرادى. ءتىپتى تارازدا 3 بىردەي «اربات» بولادى. ونىڭ ءبىرى «مارت» ساۋدا ورتالىعىنىڭ ارتىندا سالىنادى. كوشەنى بويلاي 350 مەترلىك كانال اعىپ جاتىر. كانالدى لازەرىك شوۋ تيپىندە ارلەۋ جۇمىستارى جۇرگىزىلمەك.

«شاحريستان» تاريحي-مادەني ورتالىعى «كونە تاراز» ارحەولوگيالىق كەشەنىنىڭ ءبىر بولىگى بولعاندىقتان ەكى نىسان ارالىعىن جالعايتىن 1 شاقىرىمدىق جولدا جاياۋ جۇرگىنشىلەرگە ارنالعان «اربات» ەتىپ سالىنادى. كەشەن اۋماعىنداعى تۇرعىن ۇيلەر مەن 4 كاسىپكەرلىك نىساننىڭ سىرتقى قاسبەتى شىعىستىق ۇلگىدە ارلەنىپ جاتىر،–دەيدى وبلىس اكىمدىگى قۇرىلىس باسقارماسى باسشىسىنىڭ كەڭەسشىسى راحمانقۇل بايتەلييەۆ.

ايتا كەتۋ كەرەك، وبلىستىڭ 80 جىلدىعىنا وراي ۇيىمداستىرىلاتىن نەگىزگى شارالار لەگىن ءدال وسى «شاحريستان» تاريحي-مادەني ورتالىعىنداعى وتكىزۋ جوسپارلانىپ وتىر.