تاعدىر تالكەگىمەن دۇنيەنىڭ ءتورت بۇرىشىن كەزىپ، ءومىرىنىڭ سوڭعى 15 جىلىن قازىرگى تاراز شاھارىندا وتكىزگەن تالانتتى سۋرەتشى لەونيد بريۋممەردىڭ تۋىندىلارىن قالانىڭ تاريحي كەلبەتىن كورۋگە بولادى. بۇگىندە ونىڭ كارتينالارى وبلىستىق ولكەتانۋ مۇراجايىندا جەكە بولىمىندە قويىلعان، دەپ جازادى Qamshy.kz اقپارات اگەنتتىگى.
تالانتتى سۋرەتشى حەرسون قالاسىندا دۇنيەگە كەلگەن. كەيىننەن كييەۆتىڭ كوركەمسۋرەت ۋچيليششەسىنە ءتۇسىپ ءبىلىم الادى. ءوزىنىڭ شىعارماشىلىق عۇمىرىنىڭ 1،5 جىلىن ايگىلى ەرميتاجدى بەينەلەۋگە جۇمسايدى. 1930 جىلدارى بريۋممەردىڭ كارتينالارى ايگىلى بولا باستايدى. ونىڭ ءبىر كارتيناسىندا كاۆكازدىڭ كوز تويماس سۇلۋلىعى بەينەلەنسە ەندى بىرىندە قىرىمنىڭ كوركەم بەينەسى كورىنىس تاپتى. الايدا سوعىس باستالعان شاقتا تالانتتى سۋرەتشى ساياسي قۋعىن-سۇرگىنگە ۇشىرىپ اۋەلى پاۆلودار وبلىسىنا كەيىننەن جامبىل وبلىسىنا جەر اۋدارىلادى. مۇراجاي ماماندارى سۋرەتشىنىڭ تۇرمىستىق جاعدايى مۇشكىل بولعانىنا قاراماستان ونىڭ شىعارماشالىقتان قول ۇزبەگەنىن ايتادى.
–بريۋممەردى كوزى كورگەندەردىڭ ايتۋىنشا ونىڭ تۇرمىستىق جاعدايى وتە تومەن بولعان. ايداۋ مەن قۋعىن-سۇرگىنگە قاراماستان ول وسىناۋ عاجاپ دۇنيەلەردى بەينەلەي الدى. ول ءوزىنىڭ وسى ءبىر سۇرەڭسىز كۇندەرىنىڭ وزىنەن جارقىل تابۋعا تىرىستى. جانە بۇل ونىڭ قولىنان كەلدى. سۋرەتشى عۇمىرىنىڭ سوڭعى 15 جىلى سول كەزدەگى جامبىل قالاسىندا ءوتتى. ول ءوزىن وسى قالادا جايلى سەزىنگەنى سونشالىق شىعارماشىلىعىندا ۇلكەن ورلەۋ كەزەڭى باستالدى. سۋرەتشى قولىنان قىلقالامىن تاستاماستان تاراز قالاسىنىڭ سول كەزدەگى بەينەسىن اينا-قاتەسىز بۇگىنگى كۇنگە جەتكىزە الدى،–دەيدى وبلىستىق ولكەتانۋ مۇراجايىنىڭ ءبولىم مەڭگەرۋشىسى جاننا قوسالييەۆا.
راسىندا لەونيد بريۋممەر كارتينالارىنان تاراز قالاسىنداعى الاڭدار مەن ساياباقتاردى، شىعىس بازارلارىن، قاراحان كەسەنەسىن كورۋگە بولادى. سۋرەتشى ءتىپتى تاراز قالاسىنا ارناپ سيكلدىق كارتينالار دا ازىرلەگەن. ماسەلەن «جامبىلداعى كوكتەم»، «جايما شۋاق كۇن»، «قاراحان»، «قاراسۋ وزەنىندە»، «جامبىل كوشەلەرىندە»، «جاز» سىندى كارتينالارىن وسى قاتارعا جاتقىزۋعا بولادى.
وكىنىشتىسى سول لەونيد بريۋممەردىڭ شىعارماشىلىق الەۋەتى ول ومىردەن وتكەننەن كەيىن بارىپ قانا مويىندالعان. تەك جامبىل قالاسىنداعى 15 جىلدىق عۇمىرىندا سۋرەتشى قالا كەلبەتىنە ارنالعان 1000 جۋىق كارتينا سالعان ەكەن.
پىكىر قالدىرۋ