ماڭعىستاۋ وڭىرىندە ءوتىپ جاتقان كونگرەسس - حيرۋرگيانىڭ، گينەكولوگيانىڭ، ونكولوگيانىڭ، بالالار حيرۋرگياسىنىڭ، اسىرەسە ءارتۇرلى اۋرۋلاردىڭ حيرۋرگيالىق ەمدەۋدىڭ وزەكتى ماسەلەلەرىن تالقىلاۋ ءۇشىن تاماشا مۇمكىندىك. سونىمەن قاتار، كونگرەسس كاسپيي ماڭى ەلدەرىنىڭ حيرۋرگيالىق قاۋىمداستىعى وكىلدەرىنىڭ ىنتىماقتاستىعىن نىعايتۋدا ماڭىزى زور.

الدىمەن ءسوز العان ماڭعىستاۋ وبلىسى دەنساۋلىق ساقتاۋ باسقارماسىنىڭ باسشىسى ءانۋار ساعىمبايەۆ، ايماقتا جاسالاتىن وتالاردىڭ 70% استامى قازىرگى زامانعى ەندوحيرۋرگيالىق تەحنولوگيالاردى پايدالانۋمەن وتكىزىلەتىنىن تىلگە تيەك ەتتى. سونداي-اق، ماڭعىستاۋلىق حيرۋرگتەر ەلدە العاشقىلاردىڭ ءبىرى بولىپ جەتەكشى شەتەلدىك كلينيكالاردا ەندوسكوپيالىق حيرۋرگيا بويىنشا تاعىلىمدامادان وتكەن. ۆەدومستۆا باسشىسى كەلەر 2020 جىلدان باستاپ ەلىمىزدە جۇزەگە اسىرىلاتىن مىندەتتى الەۋمەتتىك مەديسينالىق ساقتاندىرۋ تۋرالى دا ايتىپ ءوتتى.

شارادا ءسوز العاندار قاتارىندا كونگرەستىڭ قۇرمەتتى ءتوراعاسى سەرىك توقپانوۆ، ەلىمىزدىڭ باس ونكولوگى ديليارا قايداروۆا، مەديسينا عىلىمدارىنىڭ دوكتورى،  پروفەسسور جاقسىلىق دوسقالييەۆ بار. كونگرەستىڭ العاشقى كۇنىندە كولورەكتالدى حيرۋرگيانىڭ بولاشاعى، ونكولوگياداعى لاپاروسكوپيا، بالالارداعى قولقا جانە ونىڭ تامىرلارىنداعى ەندوحيرۋرگيالى وتالار، قازىرگى زامانداعى ەندوسكوپيالىق حيرۋرگيا، قاتەلەر مەن اسقىنۋلاردى الدىن-الۋ، ەلىمىزدەگى ترانسپلانتتاۋدى ۇيلەستىرۋ قىزمەتى، ۇيقىبەزىنىڭ جىلاۋىق نەوپلازياسىن وپتيمالدى ەمدەۋ، ەگىزدەرگە ترانسفۋزيا سيندرومىن فەتوسكوپيالىق ەمدەۋ ماسەلەلەرى تالقىلاندى.

ءتورت كلينيكالىق بازادا، اتاپ ايتقاندا ماڭعىستاۋ وبلىستىق اۋرۋحاناسى، پەريناتالدىق ورتالىق، باللار اۋرۋحاناسى جانە ونكولوگيالىق ديسپانسەردە وتاندىق جانە شەتەلدىك جەتەكشى ەندوسكوپيالىق حيرۋرگتەر قازىرگى زامانعى ەندوحيرۋرگيالىق جابدىقتا قۇرساق قۋىسى، كىشى جامباس جانە ىشپەردە ارتىنداعى كەڭىستىك اعزالارىندا 3D، HD، ICG، 4K فورماتتارىندا ۆيزۋالداۋمەن جوعارى تەحنولوگيالىق وپەراسيالار جاساۋ جوسپارلانعان.

ماڭعىستاۋ وبلىستىق پەريناتالدىق ورتالىعىنىڭ ديرەكتورى جامال جامانبايەۆانىڭ ايتۋىنشا، عىلىمي – پراكتيكالىق سەسسيا بارىسىندا جاتىر مويىنى وبىرى حيرۋرگياسىنداعى لاپاروسكوپيانىڭ مۇمكىندىكتەرى مەن شەكتەۋلەرى، ونكوگينەكولوگياداعى يننوۆاسيالارعا كوبىرەك كوڭىل بولىنبەك.

«گينەكولوگيا سالاسىنداعى لاپاروسكوپيالىق وپەراسيالار جاساۋدا ءار دارىگەردىڭ ءوز تاجىريبەسى بولادى. ال وپەراسيالاردى ترانسلياسيالاۋ كەزىندە انالىق بەزى وبىرىنىڭ تارالعان ءتۇرى كەزىندەگى لاپاروسكوپيالىق تولىق ءبىرىنشى سيتورەدۋكسيانىڭ دۇنيەجۇزىندەگى العاشقى تاجىريبەسى، لاپاروسكوپيالىق جامباستى ليمفوديسسەكسياسجانە ەنگىزۋ كەزەڭدەرىنە ءمان بەرىلەدى. سونىمەن قاتار ەلەكتروحيرۋرگيانىڭ فيزيكالىق نەگىزدەرى، رەپرودۋكتيۆتىك جاستاعى ايەلدەرگە جاتىر مويىنى پاتولوگياسىن ەمدەۋدىڭ قازىرگى زامانعى ادىستەرى، باستاۋىش ەندوسكوپيستتىڭ داعدىلارىن دامىتۋداعى Wetlab رولىنە دە ەرەكشە ءمان بەرىلمەك»، - دەيدى ول. 

كونگرەسس قورىتىندىسى بويىنشا عىلىمي ماتەريالدار جيناعى شىعارىلماق. شارا اياقتالعان سوڭ، بارلىق قاتىسۋشىلارعا العىس حاتتار مەن سەرتيفيكاتتار تابىستالاتىن بولادى.

ايتا كەتۋ كەرەك، اتالمىش شارانى وتكىزۋ تۋرالى شەشىم ماڭعىستاۋ وبلىسىنىڭ اكىمدىگى، قازاقستان ەندوسكوپيالىق حيرۋرگتەرى قاۋىمداستىعى، استانا مەديسينالىق ۋنيۆەرسيتەتى، قازاقستان گينەكولوگتار-ەندوسكوپيستەرى قوعامدىق بىرلەستىگى جانە ماڭعىستاۋ وبلىستىق اۋرۋحاناسى تاراپىنان قولداۋ تاپتى.