تارازداعى العاشقى مەديسينالىق مەكەمە 1873 جىلدان بەرى قىزمەت كورسەتىپ كەلەدى.ءدال وسى جىلى ۋەزد ورتالىعى اۋليەاتا قالاسىندا العاشقى قابىلداۋ ءبولىمى دەرتىنە داۋا ىزدەگەندەرگە قىزمەت كورسەتە باستادى، دەپ جازادى Qamshy.kz اقپارات اگەنتتىگى. 

وڭىردەگى ەڭ العاشقى كاسىبي مەديسينالىق قىزمەت كورسەتكەن مەكەمەدە ءبىر مەزگىلدە نەبارى 6 اۋرۋعا عانا ەم-دوم جاساعان.مۇندا ءبىر دارىگەر، ەكى فەلدشەر جانە جۇكتى ايەلدەرگە بوسانۋعا جاردەمدەسەتىن ءبىر «كىندىك شەشە» بولعان ەكەن. ول تۇستا ەل اراسىنداعى اۋرۋلار مەن جاراقات العانداردى ەمدەۋ ءىسىن تاۋىپتەر مەن بالگەرلەر، سىنىقشىلار، باقسىلار سىندى حالىقتىق مەديسينا وكىلدەرى جۇرگىزگەن. وكىنىشتىسى سول حالىقتىق مەديسينا دەرتكە شالدىققانداردىڭ كەيبىرىنىڭ ساۋىعىپ كەتۋىنە سەبەپشى بولسا، ەندى كەيبىرى قاراپايىم عانا مەديسينالىق كومەكتىڭ بولماۋىنان دۇنيە سالدى. ناتيجەسىندە اۋرۋحانا قىزمەتكەرلەرى ەل اراسىندا ناۋقاستاردى ەمدەۋمەن بىرگە حالىقتى ساۋاتتاندىرۋ، كۇندەلىكتى سانيتارلىق-گيگيەنانىڭ تالاپتارىن ساقتاۋدى ناسيحاتتاۋمەن دە اينالىستى.سوعان قاراماستان حالىق ساناسىندا ءداستۇرلى حالىقتىق مەديسيناعا دەگەن سەنىم جوعارى بولدى. سوندىقتان باسى اۋىرىپ، بالتىرى سىزداعاندار ەمنىڭ داۋاسىن ىزدەۋدە باقسى-بالگەرلەردىڭ كومەگىنە جۇگىنۋدى جالعاستىرا بەردى. ناتيجەسىندە انا مەن بالا ءولىمى ءورشي ءتۇستى. قاراپايىم تۇرعىندار سوقىرىشەك، جەدەل حولەسيستيت، ءىش ءتۇيىلۋى سىندى جەڭىل-جەلپى اۋرۋلاردىڭ سالدارىنان ومىرىمەن قوش ايتىسىپ جاتتى. تۇرمىستاعى قاراپايىم گيگيەنالىق تالاپتاردىڭ ساقتالماۋىنان بەزگەك،ءىش سۇزەگى، وبا، تىرىسقاق سىندى اۋرۋلار ادامداردىق جاپپاي كوز جۇمۋىنا نەگىز بولدى.

ال كەڭەس وكىمەتى ورناعان تۇستا جامبىل وڭىرىندەگى مەديسينالىق قىزمەتتىڭ ساپاسى سالدە بولسا ارتتى. ويتكەنى حالىقتىڭ دەنساۋلىعىن ساقتاۋ ىسىنە بۇل كەزدە 7 دارىگەر، 34 فەلدشەر، 9 اكۋشەر، ءتىس دارىگەر، فارماسيەۆت سىندى ماماندار كاسىبي مەديسينالىق قىزمەت كورسەتتى. سونداي-اق ءبىرقاتار ءىرى ەلدى مەكەندەردە فەلدشەرلىك-اكۋشەرلىك پۋنكتەر ۇيىمداستىرىلعان. حالىق اراساندا دەنساۋلىقتى كۇتۋ ەرەجەلەرى كەڭىنەن ناسيحاتتالا وتىرىپ، اۋرۋلارعا قارسى ەكپە جۇمىستارى دا جۇرگىزىلدى. ءتىپتى قاراپايىم تازالىق ەرەجەلەرىنىڭ ساقتالماۋىنان اۋرۋلاردىڭ ءورشي تۇسكەنىن ەسكەرگەن ماماندار مونشالاردى كوپتەپ سالۋ، تۇرعىنجايلارعا سۋ جۇيەلەرىن كوپتەپ تارتۋدى تالاپ ەتىپ قويعان.