جامبىل وبلىستىق قازاق دراما تەاترىنا اسقار توقپانوۆتىڭ، ال «شاحريستان»تاريحي- مادەني ورتالىعىندا بوي كوتەرەتىن «رۋحانيات» ورتالىعىنا شەرحان مۇرتازانىڭ اتى بەرىلمەك. سونداي-اق كەنەن ازىربايەۆ اتىنداعى وبلىستىق فيلارمونيا الدىنا ءان مەن جىر ءدۇلد ۇلىنىڭ ەڭسەلى ەسكەرتكىشى ورنالاسادى، دەپ جازادى Qamshy.kz اقپارات اگەنتتىگى. 

بۇل اقجولتاي حاباردى وبلىس اكىمى اسقار مىرزاحمەتوۆپەن بولعان كەزدەسۋدەن سوڭ زيالى قاۋىم وكىلدەرى قۋانىشپەن جەتكىزدى. ءوڭىر باسشىسى زيالى قاۋىم وكىلدەرىمەن ءراۋىشتى باسقوسۋدىڭ بىرىندە وبلىستىڭ مادەني-رۋحاني ومىرىندە ءىز قالدىرعان ازاماتتاردىڭ ەسىمىن ۇرپاق جادىندا ماڭگى ساقتاۋ ماقساتىندا جوعارى اتالعان جۇمىستاردى جۇرگىزۋ تۋرالى تۋرالى جاۋاپتى ۆەدومستۆولاردىڭ رۇقساتى الىنعانىن اتاپ وتكەن.

–جامبىل وبلىستىق قازاق دراما تەاترىنا وسى ونەر ۇجىمىنىڭ اياققا تۇرىپ،ونىڭ قالىپتاسۋىنا ولشەۋسىز ۇلەس قوسقان اتپال ازامات اسقار توقپانوۆتىڭ اتىن بەرۋدى مادەنيەت سالاسى ارداگەرلەرىنىڭ كوپتەن كوكەيىندە جۇرگەن ەدى. ءدال وسى ۇسىنىسىمىزدى بىرنەشە رەت جوعارى جاققا ءوتىنىش حاتپەن دە جەتكىزدىك. راسىندا اسقار توقپانوۆتىڭ اتى وبلىستىق قازاق دراما تەاترىنا بەرۋگە سۇرانىپ-اق تۇر. ول كىسى وسى ونەر ۇجىمىنداعى تۇڭعىش كاسىبي رەجيسسەردىڭ ءبىرى بولىپ قىزمەت اتقاردى. ونىڭ رەجيسسەرلىك ەتۋىمەن تەاتر ۇجىمى «اباي» قويىلىمىن ساحنالاعان. سوندا ماعان ايگەرىمنىڭ ءرولىن ويناۋ باقىتى بۇيىرىپ ەدى، – دەيدى مەملەكەتتىك سىيلىقتىڭ لاۋرەاتى، نۇرسيفات سالىقوۆا.

شىنىندا قازاق تەاتر ونەرىندە وشپەس ءىس قالدىرعان اسقار توقپانوۆ ماسكەۋدە ءبىلىم العان تۇڭعىش كاسىبي تەاتر رەجيسسەرلەرىنىڭ ءبىرى. ول ورىس جانە شەتەل دراماتۋرگتەرىنىڭ پەسالارىن قازاق تىلىنە اۋدارعان. ماسەلەن، «اسپازشى»، «شىندىق قاتتى، ب ا ق ءتاتتى»، «يۆانوۆ»، «شاعالا»، «نورا»، «سەرۋەندەگى سەرگەلدەڭ» سىندى تۋىندىلاردى اسقان شەبەرلىكپەن اۋدارعان. ءوز شىعارماشىلىعىندا پەسا جانرىنا ايرىقشا ءمان بەرىپ «تازشا بالا»، «تاسىعان توگىلەر» اتتى پەسالاردى ومىرگە اكەلگەن. ال تەاتر ساحناسىندا لەنين، اباي، ىبىراي التىنسارين بەينەلەرىن سومداعان تالانتتى ءارتىس رەتىندە تەاترسۇيەر قاۋىمنىڭ ەسىندە قالدى.

«رۋحانيات» ورتالىعىنا اتى بەرىلەتىن شەرحان مۇرتازانى كوپشىلىككە تانىستىرىپ جاتۋدىڭ ءوزى ارتىق. قازاق جۋرناليستيكاسىنىڭ، ادەبيەتى قايراتكەرى جامبىل وبلىسىندا تۋعان. شىعارماشىلىعىندا وبلىستىڭ سان ءتۇرلى سالاسىن قوزعاپ جازعان. سول سەكىلدى «قىزىل جەبە» عۇمىرنامالىق رومانى ارقىلى الاش ارداقتىسى تۇرار رىسقۇلوۆتىڭ وبرازىن كىتاپسۇيەر قاۋىمعا تانىتتى.