جامبىلدىق دۋلات بولاتبەك ۇلى قۇران جارىسىنان تۇركيا پرەزيدەنتىنىڭ جۇلدەسى ءۇشىن بولعان سايىستان ولجالى ورالدى. ول بۇعان دەيىن قۇران وقۋدان رەسپۋبليكالىق، الەمدىك دەڭگەيدە ۇيىمداستىرىلعان بايقاۋلاردان ۇزدىك شىققان، دەپ جازادى Qamshy.kz اقپارات اگەنتتىگى. 

قارشادايىنان بەس ۋاقىت نامازىن قازا قىلماعان وتباسىدان تاربيە كورىپ وسكەن جاس قاري اكەسىنىڭ كولىگىندە قوسىلىپ تۇرعان قۇراننان ونىڭ بىرنەشە سۇرەلەرىن جاتتاپ العان. بالاسىنىڭ بويىنداعى دىنگە دەگەن جاقىندىقتى بايقاعان اكەسى دە دۋلاتتىڭ ءبىر كەزدەرى وبلىستىڭ باس يمامى بولعان دانيار جۇمابايەۆتىڭ تاربيەسىنە بەرگەن ەكەن. جاستايىنان ءدىن ۇستازىنىڭ الدىن كورگەن شاكىرت 14 جاسىندا رەسپۋبليكالىق قۇران وقۋ جارىسىنىڭ جەڭىمپاز اتانعان. وسىلايشا اتالعان سايىستان سوڭ ەل نامىسىن شەتەلدىك باسەكەلەردە قورعاۋعا مۇمكىندىك العان دۋلاتتىڭ حالىقارالىق باسەكەلەردەگى جەڭىستى جورىعى يندونەزيادان باستالىپتى. كەيىننەن تۇركيادا ارنايى كۋرستا ءبىلىمىن شىڭداعان تالاپتى جاسقا پرەزيدەنت سىيلىعى ءۇشىن وتەتىن قۇران وقۋ جارىسىنا قاتىسۋ تۋرالى ۇسىنىس تۇسكەن.

–بۇل ۇسىنىسقا قۋانا كەلىسىم بەردىم. البەتتە بۇل سايىستا جەڭىسكە جەتۋدەن بۇرىن قاتىسۋدىڭ ءوزى عانيبەت. ستامبۋل قالاسىندا وتكەن بۇل جارىسقا الەمدەگى مۇسىلمان ەلدەرىنەن سۋىرىلىپ شىققان ۇزدىكتەر قاتىستى. بۇل بايقاۋ ون ەكى كەزەڭنەن تۇردى. ءار كەزەڭ سايىن سۇراقتار دا قيىنداي بەرەدى. مۇندا قۇراننىڭ 400ء-ى بەتىنىڭ 8ء-ى قاتارىنان نەمەسە قانداي دا ءبىر سۇرەنىڭ سوڭعى اياتىن وقۋ تۋرالى تالاپ قويدى. قازىلار القاسى ۇمىتكەرلەردى قۇراننىڭ كەز كەلگەن جەرىنەن سۇراق قويىپ، سۇرىندىرۋگە تىرىستى. سوعان قاراماستان جارىستىڭ قورىتىندىسى بويىنشا ءۇش قاتىسۋشى «التىن بەلگى» بۇيىردى،–دەيدى جاس قاري.

شىن مانىندە اسقان ىجداھاتتىلىق پەن تياناقتىلىقتى قاجەت ەتەتىن سايىستا جەڭىس تۇعىرىنان كورىنۋگە دۋلات بولاتبەكۇلىنا وتباسى وشاق-قاسىندا كورگەن تاربيەنىڭ دە ىقپال زور بولعانىن اتاپ وتپەسكە بولمايدى.

–اكە-شەشەمىز مەن ەس بىلگەلى نامازىن قازا قىلىپ كورمەگەن جاندار. ولاردىڭ ءىزىن جالعاپ ەكى اپكەم دە ءدىن جولىن ۇستانىپ، ۇستازدىق قىزمەت ءجۇر. جاستىعىنا قاراماستان ەكى ءىنىمنىڭ دە قۇراندى جاتتاپ الۋعا قۇشتارلىعى ەرەكشە. التىنشى سىنىپتا وقيتىن ۇلكەن ءىنىم قۇراننىڭ جارتىسىن جاتتاپ ۇلگەردى. ال كىشىسى ءبىر پارانى جاتتاپ العان، –دەيدى دۋلات بولاتبەك ۇلى.

قازاقستان اتىن قۇران وقۋ سايىسىندا كوپشىلىككە تانىتقان تالاپتى جاس بولاشاق اراب مەملەكەتىندە نەمەسە كاتاردا، افريكا ەلدەرىنىڭ بىرىندە ءدىن سالاسىندا جوعارى ءبىلىم الۋ دا جوسپارلاۋدا.