ءتيىمدى شاعىن جانە ورتا بيزنەس – قالا مەن اۋىلدى دامىتۋدىڭ بەرىك نەگىزى. باسەكەلىك ورتادا حالىقتىڭ ءال اۋقاتىن ارتتىرۋ ماقساتىندا بىرەگەي جوبالاردى ىسكە اسىرۋ كەرەكتىگى ايقىن. بۇل باعىتتا دا جامبىل وبلىسىندا جۇيەسىن تاپقان جۇمىستار جەتەرلىك، دەپ جازادى Qamshy.kz اقپارات اگەنتتىگى.
جۇرگىزىلگەن تالداۋ بويىنشا جامبىل وبلىسى حالقىنىڭ 60،4 پايىزى نەمەسە 679 مىڭ ادام اۋىلدىق جەردە تۇرادى. ونىڭ ىشىندە، ەڭبەك جاسىنداعى 395 مىڭ ادامنىڭ 151 مىڭىندا تۇراقتى تابىس كوزى جوق.
بۇل ازاماتتار نەگىزىنەن بيۋدجەت ەسەبىنەن بەرىلەتىن الەۋمەتتىك تولەمدەر، ماۋسىمدىق جۇمىستاردان، قوسالقى شارۋاشىلىق ەسەبىنەن كۇن كورۋدە.
ءبىرىنشى جارتىجىلدىقتا 32 مىڭنان استام وتباسى اتاۋلى الەۋمەتتىك كومەك الدى (162 354 ادام).
مۇنداي پروبلەمالار بارلىق وڭىرلەرگە ءتان. سوندىقتان، ەل پرەزيدەنتى الەۋمەتتىك باعىتتارعا – وتباسى بيزنەسىن قۇرۋعا، ەڭ الدىمەن، كوپبالالى جانە جاعدايى تومەن وتباسىلارعا باسا ءمان بەرە وتىرىپ، بيزنەسكە قولداۋ كورسەتۋدىڭ جاڭا تاسىلدەرىن ەنگىزۋ كەرەكتىگىن تاپسىردى.
بۇل باعىتتا وبلىستا ناقتى جوسپار قۇرىلىپ، جۇرگىزىلگەن جۇمىستاردىڭ العاشقى ناتيجەسى دە بايقالۋدا.
وزدەرىڭىزگە بەلگىلى، ەلباسىنىڭ ۇستىمىزدەگى جىلدىڭ 30 قاڭتاردا ۇكىمەتتىڭ كەڭەيتىلگەن وتىرىسىندا وڭىرلەردە سكرينينگ وتكىزۋ تۋرالى تاپسىرماسى اياسىندا وبلىستاعى 376 ەلدى مەكەندەگى 138 347 اۋلا زەردەلەنىپ، انكەتالار تولتىرىلدى.
زەردەلەۋ ناتيجەسى مەن تۇرعىنداردىڭ ۇسىنىستارىن ەسكەرە وتىرىپ، جامبىل وبلىسى تۇرعىندارىنىڭ ءال-اۋقاتىن ارتتىرۋ جوباسىنىڭ تۇجىرىمداماسى ازىرلەندى. وسى جوبا اياسىندا حالىقتىڭ ءومىر ساپاسىن جاقسارتۋعا باعىتتالعان 5 باعىت تاڭدالىپ وتىر. ءبىرىنششىسى ءۇي ىرگەسىندەگى جەرلەردى ءتيىمدى پايدالانۋ؛ ەكىنشىسى مال شارۋاشىلىعىن دامىتۋ؛ ءۇشىنشىسى اۋىل سىرتىنداعى جەرلەردىڭ تيىمدىلىگىن ارتتىرۋ؛ ءتورتىنشىسى كووپەراتيۆتەر قۇرۋ؛ بەسىنشىسى شاعىن كاسىپكەرلىك جوبالاردى قولداۋ.
وسى 5 باعىت بويىنشا جالپى قۇنى 46،4 ملرد. تەڭگە كولەمىندە 31 مىڭنان استام جوبانى ىسكە اسىرۋ كوزدەلىپ وتىر.
الدىن-الا ەسەپتەۋلەرگە سايكەس، وسى جوبالاردىڭ ىسكە اسىرىلۋىمەن 90 مىڭنان استام جۇمىس ورىندارىنىڭ قۇرىلۋى، ءوز بەتىنشە جۇمىسپەن قامتىلعان جانە جۇمىسسىز 68 مىڭنان استام ادامدى كاسىپكەرلىكپەن اينالىسۋعا بەيىمدەۋ، اتاۋلى الەۋمەتتىك كومەك الۋشىلاردىڭ سانىن
قىسقارتۋ، اۋىل شارۋاشىلىعى ءونىمىن 132 ملرد. 200 ملن. تەڭگەگە نەمەسە 33 %-عا دەيىن ۇلعايتۋ، وڭدەۋشى كاسىپورىنداردىڭ جۇكتەمەسىن 30 %-عا ارتتىرۋ كوزدەلۋدە.
پىكىر قالدىرۋ