مەملەكەت باسشىسى قاسىم-جومارت توقايەۆ حالىققا ارناعان جولداۋىندا وتباسى جانە بالا ينستيتۋتىن قولداۋ، ينكليۋزيۆتى قوعام قۇرۋدىڭ ماڭىزدىعىنا ايرىقشا توقتالعانى بەلگىلى. وسى ورايدا جامبىل وبلىسىندا 2020-2021 جىلدار ارالعان 5 وتباسىلىق ۇلگىدەگى بالالار ءۇيىن جانە ومىرلىك قيىن جاعدايداعى بالالاردى قولداۋ ورتالىعى جانىنان مەدياسيا قىزمەتىن اشۋ جوسپارلانۋدا، دەپ جازادى Qamshy.kz اقپارات اگەنتتىگى. 

پرەزيدەنت جولداۋدا ەرەكشە قاجەتتىلىكتەرى بار ادامدار ءۇشىن بىردەي مۇمكىندىك جاساۋ مىندەتىن قويدى.

بۇگىنگى كۇنگە وبلىس بويىنشا 45 235 مۇگەدەك بار بولسا، ونىڭ ىشىندە 18 جاسقا دەيىنگىسى 6302 نەمەسە 14 %-دى قۇرايدى.

مۇگەدەك بالالاردى وڭالتۋ جانە بەيىمدەۋ ورتالىقتارىندا 145 بالا جانە ودان بولەك 102 بالا ستاسيونارلىق جانە جارتىلاي ستاسيونارلىق ۇلگىدە ارناۋلى الەۋمەتتىك قىزمەتتەرمەن قامتىلعان.

حالىقتىڭ دەنساۋلىعى قاشاندا ءبىرىنشى ورىندا تۇراتىنى بەلگىلى. سوندىقتان دا، دەنى ساۋ ۇلت تاربيەلەۋ، ولاردى سپورتقا باۋلۋعا باسىمدىق بەرىلۋدە.

بۇگىنگى كۇنى وبلىس بويىنشا 2364 سپورت نىساندارىنىڭ 98%-ى تۇرعىندارىنىڭ جۇيەلى تۇردە دەنە شىنىقتىرۋ جانە سپورتپەن شۇعىلدانۋى ءۇشىن قولجەتىمدى (ونىڭ 510 تاراز قالاسىندا، 1795ء-ى اۋدانداردا). وبلىستا دەنە شىنىقتىرۋ جانە سپورتپەن جۇيەلى تۇردە شۇعىلدانۋشىلار قاتارى 340 مىڭ ادامعا جۋىقتادى نەمەسە 29،6%-عا جەتتى.

جىل سوڭىنا دەيىن سپورت نىساندارىنا قولجەتىمدىلىكتى 100 %-كە، وبلىس تۇرعىندارىنىڭ قامتىلۋ كورسەتكىشىن 31% مەجەلەمەك.

مەملەكەت باسشىسى 2020 جىلدى «ۆولونتەر جىلى» دەپ جاريالادى. جاستاردى قوعامدىق ومىرگە بەيىمدەۋ، قايىرىمدىلىق كومەك كورسەتۋ جۇمىستارىنا تارتۋ - ولاردى تاربيەلەۋدىڭ قۇرالى.

بۇل جۇمىستاردى جۇيەلەندىرۋ ماقساتىندا وبلىس اكىمىنىڭ ۇستىمىزدەگى جىلى 14 ناۋرىزىنداعى №52 قاۋلىسىمەن «قامقور» ۆولونتەرلىك-قايىرىمدىلىق جوباسى قولعا الىندى. 2 مىڭعا جۋىق ەرىكتىلەر 250 مىڭعا جۋىق وتباسىلارىن ارالاپ، الەۋمەتتىك ساۋالناما تولتىردى، مۇقتاجدىقتارى سارالاندى. جوبا اياسىندا تاراز قالاسىندا 3 (تولە بي كوشەسى - ورتالىق مەشىت، لەنين كوشەسى - تاراز قوناق ءۇيى، بايدىبەك بي كوشەسى – كوكتەم ءماسسيۆى)، اۋدانداردا 9 قايىرىمدىلىق دۇكەندەرى اشىلىپ، 5 ساۋدا ورىندارىندا تۇرمىستىق قاجەتتىلىكتەگى زاتتاردى قابىلداۋعا ارنالعان جاشىكتەر ورناتىلدى.

ۆولونتەر جىلىن وتكىزۋ، ولاردىڭ سانىن 2 ەسەگە ارتتىرۋ بويىنشا وبلىستىق جوسپار ازىرلەنۋدە.