قازاق حالقى بىرلىكتىڭ ورنى مەن ماڭىزىن جوعارى باعالاپ، «بىرلىك بولماي تىرلىك بولماس»، «بىرلىك ءتۇبى – بەرەكە»، «باقىت – بىرلىكتە، بايلىق – ەڭبەكتە» دەپ تۇيگەن.

سوندىقتان دا، ەل تىزگىنىن قولىنا ۇستاعان ارداقتى ادامدار – حاندار، بيلەر، اۋزى دۋالى اقساقالدار ەل ىشىندەگى اسقىنعان داۋ، ۋشىققان جانجالدىڭ جولىنا توسقاۋىل قوياردا ەل بىرلىگىنە سىنا تۇسپەۋ جاعىنا باسا نازار اۋدارعان.

قوعامدىق كەلىسىم مەن ساياسي تۇراقتىلىق، ەتنوسارالىق جانە كونفەسسياارالىق بەيبىتشىلىك، بىرلىك پەن ىنتىماق، ۇلتتىق قۇندىلىقتاردى جاڭعىرتۋ  ماقساتىندا، ءوڭىر تاريحىنىڭ اسا ماڭىزدى كەزەڭى – جامبىل وبلىسىنىڭ قۇرىلعانىنا 80 جىل تولۋى قارساڭىندا «رۋحاني جاڭعىرۋ» باعدارلاماسى اياسىندا تاراز قالاسىندا «ەلدىك ەلگە بايلانىستى» قوعامدىق فورۋمى وتۋدە.

فورۋم بارىسىندا قوعامداعى تۇيىتكىلدى ماسەلەلەر، ۇلتتىق ءداستۇر مەن ادەت-عۇرىپتىڭ ۋاقىت اعىمىمەن وزگەرۋى، ىسىراپشىلدىق پەن داڭعازالىققا جول بەرمەۋ، جاستار تاربيەسىنىڭ وزەكتىلىگى تۋرالى وبلىسىمىزدىڭ اقساقالدارى مەن ەل اعالارى، ءبىلىمدى ءارى پاراساتتى ازاماتتارى ءوز ويلارىن ورتاعا سالۋدا.

حالىقتىڭ ۇلتتىق بولمىسى مەن بىرەگەيلىگىنە كەرى اسەر ەتەتىن  جەڭ ۇشىنان جالعاسقان جەمقورلىق، قىزمەتتەگى جەرشىلدىك پەن تامىر-تانىستىق، اعايىن اراسىنداعى رۋشىلدىق، توي تويلاۋداعى ىسىراپشىلدىق پەن استامشىلدىق، جاستار ورتاسىنداعى داڭعويلىق پەن كەردەڭدىك، ەل ىشىندەگى ورىنسىز سالتانات، قاناعاتسىزدىق پەن ۇنەمسىزدىك سياقتى جامان قاسيەتتەردەن ارىلۋ بۇگىنگى كۇننىڭ باس تالابىنا اينالىپ وتىر.

مىنە، وسى ماسەلەلەر توعىسىندا وبلىس تۇرعىندارىن بىرلىك پەن ىنتىماققا، سابىرلىق پەن  قاناعاتشىلىققا، بەرەكەلى ءومىر سۇرۋگە  شاقىراتىن ۇندەۋ جولدانادى.

شارانى وبلىستىق ءماسليحات دەپۋتاتى م.بەرىك جۇرگىزىپ، جامبىل وبلىستىق اۋماقتىق كاسىپوداقتار بىرلەستىگىنىڭ ءتوراعاسى م.تولەپبەرگەن، ەڭبەك ارداگەرى، جۋالى اۋدانىنىڭ قۇرمەتتى ازاماتى ءا.ەرگەبەكوۆ، وبلىستىق ءماسليحاتتىڭ دەپۋتاتى ا.مايلىبايەۆ، م.ح.دۋلاتي اتىنداعى تارمۋ-دىڭ اعا وقىتۋشىسى ب.مىرزابايەۆا، ارداگەر-ۇستاز ك.احمەتجانوۆا، «اسىل ارمان» قوعامدىق بىرلەستىگىنىڭ ءتوراعاسى ر.نۇراقبايەۆ، «ھيباتۋللا تارازي» مەشىتىنىڭ نايب-يمامى ب.امرەيەۆ، مەديسينا عىلىمدارىنىڭ دوكتورى س.وردابەكوۆ  بايانداما وقيدى.

فورۋمعا وبلىس بويىنشا ارداگەرلەر، زيالى قاۋىم وكىلدەرى، بيلەر كەڭەسىنىڭ مۇشەلەرى، ۇلتتىق مادەني ورتالىقتاردىڭ، ۇكىمەتتىك ەمەس ۇيىمداردىڭ جەتەكشىلەرى، وقىتۋشىلار مەن جاستار، ب ا ق وكىلدەرى قاتىسۋدا.