بايزاق اۋدانىداعى ىبىراي التىنسارين اتىنداعى ورتا مەكتەبىندە «مەكتەپ فورماسى: وزەكتى ماسەلەلەر» ايدارىمەن “بالا قۇقىعىن قورعاۋ – قوعامعا ورتاق مىندەت» تاقىرىبىندا اشىق اڭگىمە الاڭى ۇيىمداستىرىلدى. جيىندا مىندەتتى مەكتەپ فورماسى، مەكتەپ جارعىسى، ىشكى ءتارتىپ ەرەجەلەرى، وقۋشى مەن اتا-انانىڭ مىندەتى سىندى وزەكتى ماسەلەلەر ورتاعا سالىندى.
باسقوسۋعا قۇقىق قورعاۋ سالاسى، ءدىن پروبلەمالارىن زەرتتەۋ ورتالىعى، اۋدان اكىمدىگى ىشكى ساياسات ءبولىمىنىڭ جاستار رەسۋرستىق ورتالىعى، اۋدان اكىمدىگىنىڭ ءبىلىم ءبولىمى، قوعامدىق بىرلەستىكتەر مەن قامقورشىلىق كەڭەس مۇشەلەرى، ايماقتىق مەكتەپتەردەگى ديرەكتورلاردىڭ ورىنباسارلارى مەن اتا-انالار كوميتەتتەرىنىڭ مۇشەلەرى، سونىمەن قاتار، وبلىستىق جانە اۋداندىق بۇقارالىق اقپارات قۇرالدارىنىڭ وكىلدەرى شاقىرىلدى.
مىندەتتى مەكتەپ فورماسىنا قويىلاتىن تالاپتاردى ورىنداۋعا قوعام نازارىن اۋدارۋ ماقساتىندا وتكىزىلگەن باسقوسۋدى ى.التىنسارين ورتا مەكتەبىنىڭ ديرەكتورى قانات بايتەن اشىپ بەردى. بۇدان كەيىن اۋدان اكىمدىگى ءبىلىم ءبولىمىنىڭ تاربيە ءىسى جونىندەگى ادىسكەرى ينديرا سپانالييەۆا ءسوز الىپ، اۋدان اۋماعىندا مەكتەپ فورماسىنا بايلانىستى نەمەسە اتا-انالارىنىڭ ىقپالىمەن مەكتەپ فورماسىن ساقتاماي وتىرعان وقۋشىلار جايىندا مالىمەتتەرمەن ءبولىستى.
– مەكتەپ فورماسىنىڭ مىندەتتى ءبىرىڭعاي بولۋى تۋرالى كوتەرىلىپ وتىرعان ماسەلەنىڭ وزىندىك الەۋمەتتىك-تۇلعالىق جۇگى بار. بىرىنشىدەن، كەز كەلگەن فورما بەلگىلى ءبىر مەكەمەگە قاتىستىلىقتى بىلدىرەتىندىكتەن، تۇلعاعا سول مەكەمە الدىنداعى جاۋاپكەرشىلىكتى جۇكتەيدى. ەكىنشىدەن، فورما قۇقىقتىق قاتىناستار شەگىن ايقىندايتىن باقىلاۋ قۇرالى. قاراپايىم مىسال كەلتىرەر بولساق، مەكتەپ فورماسىن كيىپ جۇرگەن بالا ساباق ۋاقىتىندا كوشەدە جۇرسە نەمەسە كومپيۋتەر كلۋبتارىندا ويىن ويناپ وتىرسا، كەز كەلگەن ۋچاسكەلىك پوليسيا قىزمەتكەرى ودان ءمان-جايدى سۇراپ، قاداعالاۋعا قۇقىعى بار. ۇشىنشىدەن، ءبىرىڭعاي فورما مەكتەپ جاسىنداعى بالالاردىڭ الەۋمەتتىك تۇرعىدان جىكتەلۋىنە، پسيحولوگيالىق قىسىمداردىڭ ورىن الۋىنا جول بەرمەيدى. مەكتەپ فورماسى باستاۋىش سىنىپ وقۋشىلارىن تارتىپكە ۇيرەتسە، جوعارى سىنىپ وقۋشىلارىن سەنىمدىلىككە جەتەلەيدى، – دەدى مەكتەپ ديرەكتورى قانات بايتەن.
كەلەسى كەزەكتە قامقورشىلىق كەڭەسىنىڭ ءتورايىمى ەلميرا سمايلوۆاعا ءسوز بەرىلىپ، ول ءوز ويىمەن ءبولىستى. ءبىرىڭعاي مەكتەپ فورماسىنا قويىلاتىن تالاپتار ساقتالماعان جاعدايدا اتا-انالاردىڭ جاۋاپكەرشىلىكتەرى تۋرالى اۋدان پروكۋراتۋراسىنىڭ پروكۋرورى جۇلدىز قويكەنوۆا، اۋداندىق پوليسيا ءبولىمى جەرگىلىكتى پوليسيا قىزمەتىنىڭ بولىمشەسى يۋۆەنالدى پوليسيا توبىنىڭ ينسپەكتورى، پوليسيا مايورى مەيىربەك جۇنىسبەكوۆ ءتۇسىندىردى.
