مەملەكەت باسشىسى قاسىم-جومارت توقايەۆ «سىندارلى قوعامدىق ديالوگ- قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا ەكونوميكانى وركەندەتۋدىڭ بىردەن-بىر تەتىگى رەتىندە شاعىن جانە ورتا كاسىپكەرلىكتى دامىتۋعا ايرىقشا نازار اۋدارعانى بەلگىلى. بۇل تۇرعىدا تيىمدىلىككە باسىمدىق بەرىلمەك.

وسى ورايدا جامبىل وبلىسىندا ايماق باسشىسى اسقار مىرزاحمەتوۆتىڭ باستاماسىمەن الەۋمەتتىڭ الەۋەتىن ارتتىرۋعا باعىتتالعان پيلوتتىق جوبا جۇزەگە اسپاق. بۇل باستامانى اسقار يسابەك ۇلى جۋىردا عانا ۇكىمەت مۇشەلەرىنە تانىستىرىپ، تيىمدىلىگىن دالەلدەپ بەردى.

تالداۋ ناتيجەسى كورسەتكەندەي، قازىرگى تاڭدا جامبىل وبلىسىنداعى تاۋارلى شارۋاشىلىقتاردا 55 مىڭ، بيۋدجەتتىك، وزگە دە 122 مىڭ ادام مەكەمەلەردە جۇمىس جاساۋدا. ياعني 177 مىڭ ادامنىڭ بەلگىلىگى دارەجەدە تۇراقتى تابىسى بار. ال، قالعان 151 مىڭ حالىق الەۋمەتتىك تولەمدەر، ماۋسىمدىق جۇمىستاردان، قوسالقى شارۋاشىلىق ەسەبىنەن كۇنكورىس كەشۋدە.

قولدانىستاعى باعدارلامالارمەن جىل سايىن 35-37 مىڭ ادام جۇمىسپەن قامتۋدىڭ بەلسەندى شارالارىنا تارتىلۋدا. وسى ورايدا، اۋىلدى جەردەگى حالىقتى جاپپاي جۇمىسپەن قامتۋدىڭ بىردەن ءبىر جولى – ول قوسالقى شارۋاشىلىققا قولداۋ كورسەتىپ، دامىتۋ.

زەردەلەۋ بارىسىندا قوسالقى شارۋاشىلىقتار ءوندىرىس پەن تابىس كوزى ەكەنىن كورسەتىپ وتىر. وبلىستىڭ جالپى اۋىلشارۋاشىلىق ءونىمىنىڭ 43 پايىزىن، ال ءسۇت پەن ەتتىڭ 60 پايىزىن وسىلار وندىرەدى. بۇل مەملەكەتتىك قولداۋسىز.

سوندىقتان، اۋىل تۇرعىندارىنىڭ تابىسىن جاقسارتۋ ءۇشىن قوسالقى شارۋاشىلىقتاردى قولداۋعا باعىتتالعان ماقساتتى مەملەكەتتىك ساياساتتى جۇزەگە اسىرۋدىڭ تيىمدىلىگى زور بولماق.

ەلباسىنىڭ جانە پرەزيدەنتتىڭ حالىق تۇرمىسىن جاقسارتۋعا قاتىستى بەرگەن تاپسىرمالارىنىڭ اياسىندا وبلىستاعى بارلىق ەلدى مەكەندەگى 138 مىڭ اۋلا تولىق زەردەلەنگەن. ناتيجەسىندە ءبىر ءۇيدىڭ اي سايىنعى قوسالقى شارۋاشىلىقتان ورتاشا تابىسى 25-30 مىڭ تەڭگەنى قۇرايتىنى انىقتالدى.

سونىمەن بىرگە، ايىنا 500 مىڭ تەڭگە تاۋىپ وتىرعان قوسالىقى شارۋاشالىقتار دا بار. مىنە، وسىنداي جاعدايلاردى ەسكەرە كەلە جامبىل جەرىندە جۇمىر جوسپار تۇزىلۋدە. ايماق باسشىسى اسقار مىرزاحمەتوۆ ۇسىنعان پيلوتتىق جوبانىڭ كوپ ۇزاماي-اق ءوز جەمىسىن بەرەتىندىگىنە جەرگىلىكتى بيلىك تە، جۇرتشىلىق تا سەنىمدى. وسىلايشا قوسالقى شارۋاشىلىقتى دامىتۋ ارقىلى الەۋمەتتىڭ الەۋەتى ارتا تۇسەتىن بولادى.