جۋىردا جامبىل وبلىسىنىڭ اكىمى اسقار مىرزاحمەتوۆ ۇكىمەت وتىرىسىندا قوسالقى شارۋاشىلىقتى دامىتۋ بويىنشا جاڭا پيلوتتىق جوبانى كوپشىلىكتىڭ نازارىنا ۇسىنعان بولاتىن. باياندى باستاما ۇكىمەت مۇشەلەرى تاراپىنان قولداۋ تاپتى دا. ويتكەنى، جاڭا جوبا ەلباسى ن.نازاربايەۆتىڭ، مەملەكەت باسشىسى ق.توقايەۆتىڭ شاعىن جانە ورتا كاسىپكەرلىكتى دامىتۋ تۋرالى تاپسىرمالارىمەن ساباقتاستىرىلا ازىرلەنگەن. بۇل تۇرعىدا «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنىڭ تيىمدىلىكتەرى دە تولىق ەسكەرىلگەن.

پيلوتتىق جوبادا مال شارۋاشىلىعىن دامىتۋ ماسەلەسى دە تولىق قامتىلعان. جاسىراتىنى جوق، بۇگىندە اۋلاداعى مال شارۋاشىلىعى، ونىڭ دا تيىمدىلىگى از. نە ءبارى اۋلالاردىڭ 56 پايىزىندا عانا مال بار، ءبىراق ونىمدىلىگى وتە تومەن. بۇنىڭ بىردەن-بىر سەبەبى جەم ءشوپتىڭ، جايىلىمنىڭ جەتىسپەۋىندە جانە راسيوننىڭ قۇنارسىزدىعىندا.

قوسالقى شارۋاشىلىقتىڭ بۇل باعىتىنىڭ تيىمدىلىگىن كوتەرۋ ءۇشىن، اۋلالاردىڭ مۇمكىنشىلىگىن ەسكەرە وتىرىپ، 44 مىڭ مال-قۇس ساتىپ الىنادى.

قولداعى جانە ساتىپ الىناتىن مال-قۇستى ءتيىستى جەم-شوپپەن قامتاماسىز ەتۋ ءۇشىن، تۇرعىنداردىڭ اۋىل سىرتىنداعى پايلىق جەرلەرى پايدالاناتىن بولادى. ول بويىنشا دا ءتيىستى ساناق جانە تۇرعىنداردىڭ كەلىسىمى بار.

كووپەراتيۆ جەم-شوپپەن قامتاماسىز ەتۋدەن بولەك، مالدى اسىلداندىرۋ ءۇشىن قولدان ۇرىقتاندىرۋ بەكەتىن اشادى جانە قۇس شارۋاشىلىعىنا ينكۋباتورلار ساتىپ الادى. ناتيجەسىندە مال ءونىمىنىڭ كولەمى كەمىندە 2-3 ەسەگە، قۇستىكى- 11 ەسەگە كوبەەدى. بۇل ماقساتقا باعىت بويىنشا 3،5 ميلليارد تەڭگە قاجەت.

سونىمەن قاتار اۋىل سىرتىنداعى پاي ۇلەستىك جەرلەردى، ءبىر جاعىنان، ءتيىمدى پايدالانۋ ءۇشىن، ەكىنشى جاعىنان، قوسالقى شارۋاشىلىقتاعى مال-قۇستى جەم-شوپپەن قامتاماسىز ەتۋ ءۇشىن كووپەراتيۆكە 40 تراكتور، 182 قوسالقى قوندارعىلار، 36 شوپ-ەگىن جينايتىن تەحنيكالار ساتىپ الىنباق.

سونداي-اق، 273 توننا مالازىعى داقىلدارىنىڭ تۇقىمى، 684 توننا تىڭايتقىش جانە 8 توننا پەستيسيدتەر ساتىپ الىنادى. وسى ماقساتتا، تۇرعىنداردىڭ كەلىسىمىنە سايكەس 4 351 گەكتار پاي ۇلەستىك جەرلەر بىرىكتىرىلىپ، 19 مىڭ توننا ءشوپ، 7 مىڭ توننا جەم، 2 مىڭ توننا سۇرلەم ءوندىرۋ جوسپارلانىپ وتىر.

ەجەلدەن توسكەيدى ءتورت تۇلىككە تولتىرىپ، ىرىسقا كەنەلگەن حالقىمىز ءۇشىن مال شارۋاشىلىعى تاڭسىق ەمەس. تەك ۇيىمداستىرۋ جۇمىستارى رەتتەي بىلگەن ابزال. بۇل تۇرعىدا قوسالقى شارۋاشىلىقتى دامىتۋ تۋرالى پيلوتتىق جوبانىڭ بەرەرى مول بولماق.