مەملەكەت باسشىسى قاسىم-جومارت توقايەۆ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا ەلباسى ايقىنداعان ستراتەگيالىق ماقساتتاردىڭ ارى قاراي دا جالعاسا بەرەتىندىگىن جەتكىزگەن بولاتىن. بۇل رەتتە پرەزيدەنت «وتىز جىلعا جۋىق ۋاقىت بۇرىن حالقىمىز ءوزىنىڭ تاۋەلسىزدىگىن جاريالاپ، بابالارىمىزدىڭ عاسىرلار بويى اڭساعان ارمانىن ورىندادى.

وسى ۋاقىت ىشىندە قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتىڭ باسشىلىعىمەن ەلىمىز الەمدەگى بەدەلدى ءارى ورنىقتى مەملەكەتكە اينالدى.

باياندى بىرلىگىمىزدىڭ ارقاسىندا تاۋەلسىزدىگىمىزدى نىعايتىپ، حالقىمىزدىڭ جاعدايىن جاقسارتۋعا جول اشتىق.

بۇل جاسامپازدىق پەن ىلگەرىلەۋ، بەيبىتشىلىك پەن كەلىسىم كەزەڭى بولدى.

ەلىمىزدىڭ دامۋ جولىن بۇكىل الەم مويىنداپ، قازاقستاندىق، ياعني نازاربايەۆ مودەلى دەپ اتادى.

ءقازىر بىزگە تاۋەلسىزدىكتىڭ جەتىستىكتەرىن ەسەلەپ، ەلىمىزدى دامۋدىڭ جاڭا ساپالى كەزەڭىنە شىعارۋ مۇمكىندىگى بەرىلىپ وتىر.

ءبىز بۇعان ەلباسى ساياساتىنىڭ ساباقتاستىعىن ساقتاپ، جۇيەلى رەفورمالار جۇرگىزۋ ارقىلى قول جەتكىزە الامىز» دەپ اتاپ كورسەتتى.

بۇگىندە ءتيىمدى رەفورمالار ناتيجەسىندە جامبىل وبلىسىنداعى مويىنقۇم اۋدانىندا دا جەمىستى جۇمىستار اتقارىلىپ، جۇرتشىلىقتىڭ شاتتىعىن ەسەلۋدە. اسىرەسە، قۇرىلىس جۇمىستارىنىڭ قارقىن العانى قۋانتادى.

كۇنى كەشە وسىنداي شارۋالاردىڭ بارىسىن باقىلاۋ ماقساتىندا جامبىل وبلىسى اكىمىنىڭ ورىنباسارى ەركەبۇلان داۋىلبايەۆ مويىنقۇم اۋدانىنا ىس-ساپارمەن باردى.

ەركەبۇلان ءابىلحان ۇلى باستاعان بىرنەشە وبلىس اكىمدىگىنىڭ باسقارما باسشىلارى جانە اۋدان اكىمى مادەن مۇسايەۆتىڭ قاتىسۋىمەن الدىمەن بىرلىك اۋىلىنداعى دارىگەرلىك امبۋلاتوريا، سپورت كەشەنى قۇرىلىسىنىڭ ورنىمەن تانىستى. بىرلىك اۋىلىندا سپورتتىق-ساۋىقتىرۋ كەشەنىن سوعۋ جوبا دايىندالىپ، جسق ازىرلەۋگە اۋداندىق بيۋدجەتتەن 3،4 ميلليون تەڭگە قاراستىرىلعان. جوبا 90 پايىزعا دايىن. جوبا دايىنداۋ كەلىسىم شارتى بويىنشا قازان ايىنىڭ سوڭىندا اياقتالادى. بۇدان سوڭ اۋداندىق ەمحانا، اۋرۋحانا ءىشىن ارالاپ دارىگەرلەرمەن سويلەستى. اۋرۋحانانىڭ جۇمىسى تۋرالى اۋداندىق ورتالىق اۋرۋحانانىڭ باس دارىگەرى جايدار ايتىشيەۆ ايتىپ بەرىپ، بۇگىنگى تاڭدا اۋداندىق ەمحانانىڭ ءبىرقاتار بولىكتەرىن جوندەۋدەن وتكىزۋ قاجەت بولىپ تۇرعانىن جەتكىزدى. كەلەسى كەزەكتە ەركەبۇلان ءابىلحان ۇلى اۋداندىق مادەنيەت ۇيىندە اۋىل تۇرعىندارىمەن كەزدەسۋ وتكىزىپ، تۋىنداعان سۇراقتارعا جاۋاپ بەردى. سونداي-اق اۋىل تۇرعىندارىن جەكە ماسەلەلەرى بويىنشا قابىلدادى. ساپار سوڭىندا وبلىس اكىمىنىڭ ورىنباسارى ەركەبۇلان داۋىلبايەۆ اۋدان اكىمدىگىنىڭ ءماجىلىس زالىندا اۋدان اكتيۆىمەن جيىن وتكىزىپ، اتقارىلعان جۇمىستار بارىسىن سارالاپ، ايتىلعان كەمشىلىكتەردى ۋاقىت وتكىزبەي، قالپىنا كەلتىرۋ جونىندە جاۋاپتى باسشىلارعا ناقتى تاپسىرمالار بەردى.