شاعىن جانە ورتا كاسىپكەرلىكتى دامىتۋ-ەلىمىزدىڭ ستراتەگيالىق ماقساتتارىنىڭ ءبىرى. مەملەكەت باسشىسى ق.توقايەۆ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا دا بيزنەستىڭ العا باسۋى ءۇشىن ناقتى مىندەتتەردى ايقىنداپ بەردى. بۇل باعىتتا جامبىل وبلىسىندا دا جارقىن جوبالار جۇزەگە اساتىن بولادى. سونىڭ ىشىندە قوسالقى شارۋاشىلىقتاردى دامىتۋ پيلوتتىق جوباسىنىڭ بەرەرى مول بولماق.

اتالمىش جوبا اۋقىمى جانە قارجى ماسەلەسى ەسكەرىلە وتىرىپ، بيىل ءار اۋداننان ءبىر اۋىلدىق وكرۋگتا باستاۋ الماق. سوندا جالپى سانى 10 اۋىلدىق وكرۋگ 23 ەلدى-مەكەن قامتىلادى. بۇل ماقساتقا 7،2 ميلليارد تەڭگە قاجەت.

ال ەكىنشى كەزەڭدە، ياعني 2020-21 جىلدارى قالعان 143 اۋىلدىق وكرۋگكە 39،2 ميلليارد تەڭگە قاجەت بولادى.

ءبىرىنشى كەزەڭدە 42 مىڭ ادامدى قۇرايتىن 7 مىڭ اۋلا قامتىلادى. ناتيجەسىندە كەلەسى جىلدىڭ قورىتىندىسىمەن قوسالقى شارۋاشىلىقتان تۇسەتىن ورتاشا ايىلىق تابىس 41 مىڭنان تەڭگەدەن 104 مىڭ دەيىن وسپەك، ارعى جىلدارى تابىس بۇداندا ارتاتىن بولادى.

ايتا كەتۋ كەرەك، جوبانىڭ ءبىرىنشى باعىتى ءۇي ىرگەسىندەگى جەرلەردى ءتيىمدى پايدالانۋعا نەگىزدەلىپ وتىر. قازىرگى تاڭدا 10 پيلوتتىق وكرۋگتەردەگى 7 مىڭنان استام اۋلادا 1117 گەكتار ءۇي ىرگەسىندەگى جەرلەر بار. ولاردىڭ 853 گەكتارى ءار ءتۇرلى دەڭگەيدە پايدالانۋدا (76%)، سونىڭ ىشىندە 157 گەكتارىنا (19%) ونىمدىلىگى وتە تومەن جوڭىشقا ەگىلگەن. ال 264 گەكتار نەمەسە 24 پايىزى يگەرىلمەي جاتىر.

بۇعان قوسا قولدانىستاعى جەردىڭ دە ونىمدىلىگى وتە تومەن. سەبەبى، ساپالى تۇقىم، تىڭايتقىشتار مەن پەستيسيدتەر قولدانىلمايدى جانە ءونىم ءبىر-اق رەت الىنادى.

جوبا اياسىندا كووپەراتيۆ ەسەبىنەن ءتيىمدى داقىلداردىڭ ساپالى تۇقىمىمەن، پەستيسيدتەر جانە تىڭايتقىشتارمەن قامتاماسىز ەتىلەدى. جانە داقىلدار ەكى اينالىمدا ەگىلەتىن بولادى. بۇنىڭ ءبارى ءار اۋىلدىق وكرۋگتىڭ تابيعاتى، جەرى، سۋى ەسكەرىلە وتىرىپ سانالدى.

ول ءۇشىن 298 توننا تۇقىم، 715 مىڭ كوشەت، 3،7 توننا پەستيسيد، 164 توننا تىڭايتقىش ساتىپ الىنادى. باستاما رەتىندە 76 وتباسىلىق جىلىجاي سالىنادى جانە سۋمەن قامتۋعا قاتىستى جۇمىستار جۇرگىزىلەدى. تەحنولوگيانى ساقتاۋ ءۇشىن اۋىلدىق وكرۋگتەر اگرونوممەن قامتىلادى.

ناتيجەسىندە ونىمدىلىك 2 ەسەگە، ءونىم كولەمى 3 ەسەگە ارتاتىن بولادى. ءساتىن سالسا، بۇل جوبا تالاي وتباسىنىڭ تابىسىن ارتتىرىپ، ىرىسىن مولايتپاق.