ەلباسى ن.نازاربايەۆتىڭ تىكەلەي تاپسىرماسىمەن قابىلدانعان «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسىنىڭ الەۋمەتتىڭ الەۋەتىن ارتتىرۋعا قوسىپ جاتقان ۇلەسى مول. مىسالى، جامبىل وبلىسىنىڭ جامبىل اۋدانىندا اتالمىش باعدارلاما اياسىندا شارۋاسىن شالقىتىپ جاتقان ازاماتتاردىڭ قاتارى ارتقان. بۇل تۋرالى جامبىل اۋداندىق جۇمىسپەن قامتۋ ورتالىعىنىڭ ديرەكتورى اسقار جانقورازوۆ تارقاتا ايتىپ بەردى.

– «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسى اۋدانىمىزدا جۇيەلى تۇردە جۇزەگە اسىرىلۋدا. ماسەلەن، شاعىن نەسيە الىپ، كاسىبىن دوڭگەلەتەمىن دەگەندەرگە قازىردە ايرىقشا قولداۋ كوپ. بيىلعى جىلدىڭ جارتى جىلدىعىنىڭ وزىندە 74 ادام شاعىن نەسيەمەن قامتاماسىز ەتىلدى. ولاردىڭ 70ء-ى نەسيەگە «اۋىل شارۋاشىلىعىن قولداۋ قورى» اكسيونەرلىك قوعامى ارقىلى قول جەتكىزسە، قالعانى «اتامەكەن – تاراز» شاعىن نەسيە ۇيىمىنان الدى، – دەيدى ا.جانقورازوۆ.

بيىل مەملەكەتتەن شاعىن نەسيە الىپ، وعان ساۋىندى سيىر ساتىپ العانداردىڭ ءبىرى– «شاديار» جەكە كاسىپكەرلىك يەسى جۇبانىش اينيازوۆ. ول دا «اۋىل شارۋاشىلىعىن قولداۋ قورى» اكسيونەرلىك قوعامىنىڭ وبلىستاعى فيليالى ارقىلى 4 ميلليون تەڭڭگە الىپ، وعان 14 سيىر ساتىپ الىپتى.

– نەسيەنى 6 پايىزبەن 5 جىلعا الدىم. 14 ءمۇيىزدى ءىرى قارانىڭ بەسەۋى ساۋىن سيىر. ونى اۋىلداعى ۇيدە قولدا ۇستاپ وتىرمىن، قالعانىن ءبىر شارۋا قوجالىقپەن كەلىسىپ، اقىعا باقتىرىپ جاتىرمىن. مال شارۋاشىلىعىمەن اينالىسۋىما اۋىلداستارىمنىڭ ءىسى ارقاۋ بولدى. ناقتى ايتقاندا، بۇرىننان ازىق-تۇلىك ساتاتىن دۇكەنىم بار ەدى. دۇكەنىمە ۇيىندە بىر-ەكى سيىر ۇستاپ وتىرعان كورشىلەرىم ساۋىپ وتىرعان سيىر ءسۇتىنىڭ وزدەرىنەن ارتىلعانىن اكەلىپ قويىپ ءجۇردى. ال ول ءسۇتتى كەلگەن كەلگەنىنشە تۇتىنۋشىلار تالاپ اكەتەتىن. وسى جايتتار كوز الدىمدا بولىپ جاتقان سوڭ، نەسيەگە بولسا دا سيىر الىپ، ءسۇتىن ساتۋعا بەل بۋدىم. قازىرگى تاڭدا كۇنىنە سۋىلعان 25-30 ليتر ءسۇتتىڭ ءار ءليترىن 130 تەڭگەدەن وتكەرۋدەمىن. تابىسىمىز وزىمىزگە جەتەدى. الداعى ۋاقىتتا قوسىمشا جۇمىسشىلاردىڭ كومەگىمەن مال شارۋاشىلىعىنىڭ ءورىسىن كەڭەيتىپ، ءوز الدىنا اۋىل سىرتىنان شارۋاشىلىق اشسام دەگەن ويىم بار، – دەيدى جۇبانىش قۋانىشباي ۇلى.

راسىندا دا تىنباي تىرلىك ەتكەندەردىڭ عانا تابىسى ارتادى. بۇل تۇرعىدا دانا حالقىمىز «ەڭبەك ەتسەڭ-ەمەرسىڭ» دەپ تەگىن ايتپاسا كەرەك.