مەملەكەت باسشىسى قاسىم-جومارت توقايەۆ «سىندارلى-قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ كەپىلى» اتتى حالىققا ارناعان جولداۋىندا «شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن اۋىل تۇرعىندارىنا تۇراقتى جۇمىس بەرەدى، جۇمىسسىزدىقتى ازايتادى. سونىمەن قاتار سالىق بازاسىن قۇراپ، جەرگىلىكتى بيۋدجەتتى نىعايتادى. سونداي-اق جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى. ەلىمىزدە كاسىپكەرلىكتى دامىتۋدىڭ ۇلگى بولارلىق مىسالدارى جەتكىلىكتى. ءبىز شاعىن كاسىپكەرلىكتى بۇكىل قوعام بولىپ قولداۋىمىز كەرەك»،– دەپ اتاپ كورسەتكەن بولاتىن.
بۇگىندە جامبىل وبلىسىندا ءوز ءىسىن اشىپ، جەكە كاسىپكە بەت بۇرعانداردىڭ قاتارى كوبەيىپ كەلەدى. سولاردىڭ ءبىرى- جامبىل اۋدانى، اسا اۋىلىنىڭ تۇرعىنى دينارا بيبازاروۆا. جەكە كاسىپكەر وسىدان 3 جىل بۇرىن «جۇمىسپەن قامتۋ – 2020» مەملەكەتتىك باعدارلاماسى اياسىندا «اۋىل شارۋاشىلىعىن قولداۋ قورى» اكسيونەرلىك قوعامىنىڭ وبلىستاعى فيليالى ارقىلى 6 ميلليون تەڭگە نەسيەگە قول جەتكىزىپ، ول قارجىعا 18 سيىر ساتىپ الادى. وسىناۋ قارجىلاي قولداۋدىڭ ناتيجەسىندە تىرلىگىن تىكتەپ، شارۋاشىلىعىن دۇرىس جولعا قويدى.
– نەسيە الۋ ءۇشىن قاپتاعان قۇجات جيناۋدان شارشايتىن، ءار مەكەمەگە ءبىر سابىلىپ، ورتا جولعا كەلگەندە قولىن ءبىر-اق سىلتەپ، العان باعىتىنان كەرى شەگىنەتىن ادام مەن ەمەس. سوندىقتان وزىمە «ءوز الدىڭا ءبىر ءىستى باستاۋعا نازارىڭ اۋدى ما، ەندەشە سول ءىستى سوڭىنا دەيىن جەتكىز» دەگەن بيىك ماقسات قويدىم. مىنە، سونىڭ ارقاسىندا ءقازىر ءوز ءىسىمدى دوڭگەلەتىپ وتىرمىن. وسى رەتتە مەملەكەتتىڭ كومەگىنە، اۋداندىق جۇمىسپەن قامتۋ ورتالىعىنىڭ ماماندارىنا ايتار العىسىم شەكسىز.
جالپى مال شارۋاشىلىعىمەن اينالىساتىن ادام ساتىلاتىن مالدىڭ باعاسىنا ەمەس، ونىڭ دەنى ساۋ بولۋىنا، بارعان جەرىن جەرسىنە الاتىن ارتىقشىلىعىنا قاراۋ كەرەك. شارۋاشىلىعىڭ ءسۇت باعىتىندا بولسا ءسۇتتى، ەت باعىتىندا بولسا ەتتى مال الۋعا باسىمدىق بەرىلۋى قاجەت. ويتكەنى مەن ايەل ادام بولعاندىقتان، ءىستىڭ كوزىن تابۋ وڭاي بولعان جوق. كۇيەۋىم مەن ەنەم كۇندىز جۇمىستا بولعاندىقتان، مال-جانعا قاراۋ وزىمە جۇكتەلدى. سيىردى ساتىپ العان جىلى 5-ەۋى بەلگىسىز جاعدايدا ءولىپ، ايتارلىقتاي شىعىنعا باتتىق. دەسە دە قالعانىن باعىپ-قاعۋ، جەم-شوپ ءۇشىن تىعىرىقتان شىعۋدىڭ جولىن جولداسىم ناريمان ەكەۋمىز بىرگە قاراستىردىق. شىنىن ايتقاندا، ءبىرازىن بورداقىلاپ ساتتىق. و باستاعى ماقساتىم، ءىرى قارانىڭ باسىن ءتولى ەسەبىنەن كوبەيتۋ بولعان ەدى. الايدا ءمۇيىزدى ءىرى قارانىڭ كەيبىرىن بورداقىلاپ ساتىپ، ودان تۇسكەن قارجىنى نەسيەنى جابۋعا، ساۋىن سيىرلاردىڭ جەم-شوبىن الۋعا، ساتىلعان مالدىڭ ورنىن تولتىرۋعا جۇمساۋ ارقىلى تىعىرىقتان شىقتىق. بۇگىندە سيىرلارىمنىڭ ەسەبى تۇگەل. كۇنىنە ەكى مەزگىل 5-6 سيىر ساۋامىن. ءوزىم اشقان «ايارۋ» جەكە كاسىپكەرلىگى ءقازىر اسا اۋىلىنا قاراستى بالا باقشالار مەن ءبىرقتار اۋىل تۇرعىندارىن سيىر سۇتىمەن قامتاماسىز ەتىپ وتىرعان جايى بار، – دەيدى دينارا شەرالى قىزى.
جالپى، جامبىل جەرىنەن مۇنداي مىسالداردى كوپتەپ كەلتىرە بەرۋگە بولادى. بۇل باعىتتاعى جۇمىستار مەملەكەت باسشىسىنىڭ جولداۋىندا ايقىندالعان مىندەتتەر اياسىندا جاندانا تۇسەتىن بولادى.
