سىبايلاس جەمقورلىق-مەملەكەتتىڭ دامۋىنا كەرى اسەرىن تيگىزەتىن فاكتوردىڭ ءبىرى. سوندىقتان دا وعان قارسى ءىس-قيمىل شارالارى ءبىر ساتكە دە تولاستامايدى. پرەزيدەنت ق.توقايەۆ قازاقستان حالقىنا جولداۋىندا دا بۇل ماسەلەگە ايرىقشا كوڭىل ءبولىم، قازىنا قارجىسىنا قول سالعانداردىڭ جازاسىز قالمايتىندىعىن قاتاڭ ەسكەرتتى. وسى ورايدا جامبىل وبلىسىندا دا كەشەندى شارالار جۇزەگە اسۋدا. مىسالى، جاقىندا جۋالى اۋدانى اكىمى اپپاراتىنىڭ ءماجىلىس زالىندا اۋدانداعى سىبايلاس جەمقورلىققا قارسى كۇرەس كوميسسياسىنىڭ ءۇشىنشى توقسانداعى كەڭەيتىلگەن وتىرىسى بولىپ ءوتتى.
جيىنعا ق ر سىبايلاس جەمقورلىققا قارسى ءىس قيمىل اگەنتتىگىنىڭ وبلىس بويىنشا دەپارتامەنتى باسشىسىنىڭ ءبىرىنشى ورىنباسارى راۆيل تولەبايەۆ، اتالعان دەپارتامەنت قىزمەتىنىڭ تەرگەۋشىسى باتىرجان شامگۋنوۆ پەن اۋدان اكىمدىگىنىڭ ءبولىم باسشىلارى، اۋىلدىق وكرۋگ اكىمدەرى قاتىستى.
وتىرىس بارىسىندا قىلمىستىق قۇقىق بۇزۋشىلىقتار جانە باسقا دا زاڭ بۇزۋشىلىقتار جاساۋعا ىقپال ەتكەن ءمان جايلاردى جويۋ جونىندە جانە اۋدانداعى سىبايلاس جەمقورلىقتىڭ ورىن العان كورىنىسى تۋرالى باتىرجان شامگۋنوۆ باياندادى. ول اتالمىش اۋدانداعى بالاباقشانىڭ مۇلىكتەرىن جىمقىرعان تۇلعالاردىڭ ءىسى بويىنشا جاسالعان جۇمىستاردى تىلگە تيەك ەتتى.
بۇدان سوڭ اعىمداعى جىلى اۋداندا سىبايلاس جەمقورلىققا قارسى كۇرەس بويىنشا اتقارىلعان شارالارى جونىندە اۋداندىق ءبىلىم ءبولىمىنىڭ باسشىسى ءماجيت ايجانوۆتىڭ حابارلاماسى تىڭدالدى. ءماجيت مامىت ۇلى جۋالى اۋدانى اكىمدىگىنىڭ ءبىلىم ءبولىمى مەن ءبىلىم مەكەمەلەرىندە قازاقستان رەسپۋبليكاسىنىڭ 2015-2025 جىلدارعا ارنالعان سىبايلاس جەمقورلىققا قارسى ستراتەگياسىنىڭ ىسكە اسىرۋعا ارنالعان ءىس-شارالار جوسپارى جاسالىنعانىن، جوسپاردا ناقتى بەلگىلەنگەن شارالاردىڭ ورىندالۋ مەرزىمدەرى مەن جاۋاپتى قىزمەتكەرلەر بەكىتىلگەنىن اتاپ ءوتتى.
جيىندى قورىتىندىلاعان ق ر سىبايلاس جەمقورلىققا قارسى ءىس قيمىل اگەنتتىگىنىڭ وبلىس بويىنشا دەپارتامەنتى باسشىسىنىڭ ءبىرىنشى ورىنباسارى راۆيل تولەبايەۆ اۋىلدىق وكرۋگ اكىمدەرىنە سىبايلاستىق قۇقىق بۇزۋشىلىققا اكەلەتىن كورىنىستەردىڭ ورىن الۋىنىڭ الدىن الۋ بويىنشا ءتيىستى جۇمىستار جاساۋ كەرەكتىگىن اتاپ ءوتتى. سونىمەن بىرگە اۋىلدىق وكرۋگ باسشىلارىنىڭ قىزمەتىنە ساي ارەكەت ەتىپ قانا قويماي، ءجۇرىس-تۇرىسىنا دا زور ءمان بەرۋى كەرەكتىگىن تىلگە تيەك ەتتى.
– اۋىلدىق وكرۋگ اكىمدەرى سول جەرگىلىكتى حالىقتىڭ الدىندا ەڭ ۇلگىلى تۇلعا بولۋى ءتيىس. ونىڭ ايتقانى تىڭدالۋى كەرەك ءارى دەر كەزىندە ورىندالۋى كەرەك. ءتىپتى حالىقتىڭ الدىندا سويلەگەن ءسوزى مەن كيىمىنە دە ەرەكشە ءمان بەرۋى ءتيىس. ءبىر كەزدەرى فۋتبولكامەن ءجۇرىپ ەل باسقارعانداردىڭ ءىسىن تارتىپتىك كەڭەستە قاراعان بولاتىنبىز. حالىقپەن تىكە جۇمىس جاسايتىندىقتان حالىقتىڭ نارازىلىعى يا مەملەكەتكە دەگەن سەنىمدىلىگى سىزدەر ارقىلى كەلەدى، – دەدى راۆيل قۋانىش ۇلى.
