بۇگىندە مەملەكەت تاراپىنان شاعىن جانە ورتا كاسىپكەرلىكتىڭ دامۋىنا جان-جاقتى جاعداي جاسالۋدا. ءوز كەزەگىندە بيزنەس قۇرىلىمدارى دا زاڭ تالاپتارىن ساقتاپ، بەكىتىلگەن تاپتىپكە باعىنۋى ءتيىس. بۇل تۇرعىدا ءتۇسىندىرۋ جۇمىستارىنىڭ ماڭىزى زور. وسى ورايدا تاراز يننوۆاسيالىق-گۋمانيتارلىق ۋنيۆەرسيتەتىندە قازاقستان ستاندارتتاۋ جانە سەرتيفيكاتتاۋ ينستيتۋتى وبلىستىق فيليالى بيزنەس ورتاسىنىڭ وكىلدەرىنە ارنالعان مەنەدجمەنت جۇيەلەرىن كاسىپورىنداردا ەنگىزۋ بويىنشا ايماقتىق سەمينارىن ۇيىمداستىردى.
نەگىزىنەن اتالعان جيىن حالىقارالىق ستاندارتتارعا سايكەس مەنەدجمەنت جۇيەلەرىن ەندىرگەن جانە سەرتيفيكاتتاعان وتاندىق كاسىپورىنداردىڭ سانىن ارتتىرۋ، سونىمەن بىرگە ISO 9004 «ساپا مەنەدجمەنتى. ۇيىمنىڭ ساپاسى. تۇراقتى تابىسقا جەتۋ بويىنشا ۇسىنىمدار» جانە «ISO 50001 «ەنەرگەتيكالىق مەنەدجمەنت جۇيەلەرى. پايدالانۋ جونىندەگى تالاپتار مەن نۇسقاۋلىق» جاڭا ستاندارتتارىنىڭ تالاپتارىن ءتۇسىندىرۋ ماقساتىندا ءوتتى.
جالپى وسىنداي جاڭا تالاپتار قاتىسۋشى بيزنەس وكىلدەرىنىڭ دە قىزىعۋشىلىعىن تۋدىردى. ويتكەنى، بۇل كاسىپورىندار مەن ۇيىمدارعا كەلەشەكتە تاجىريبەدە بارلىق قاجەتتى قۇرالداردى دۇرىس جانە ءتيىمدى پايدالانۋعا، ەنەرگەتيكالىق مەنەدجمەنتتى باسقارۋ جۇيەسىندە، سونداي-اق ءونىم مەن قىزمەتتەر ءوندىرىسىن، ءونىم ساپاسىن تەك ىشكى نارىقتا عانا ەمەس، سىرتقى نارىقتا دا كاسىپورىن مەن ۇيىمداردىڭ باسەكەگە قابىلەتتىلىگىن ارتتىرۋدا جوعارى ناتيجەلەرگە قول جەتكىزۋىنە مۇمكىندىك بەرەدى.
– ISO 9004 جانە ISO 50001 ستاندارتىنىڭ تالاپتارىن ەنگىزۋ بويىنشا عانا ەمەس، جالپى ۇيىمنىڭ قىزمەتىن جاقسارتۋعا باعىتتالعان ۇسىنىمداردى قامتيتىن جۇيەنى جاقسارتۋ بويىنشا جەتەكشىلىك بولىپ تابىلادى. ISO 9004 ستاندارتى مەنەدجمەنت جۇيەلەرىنىڭ جەكەلەگەن اسپەكتىلەرىن جاقسارتۋدىڭ كوپتەگەن جاڭا يدەيالارىن قامتيدى. سونىمەن قاتار، ەنەرگيا مەنەدجمەنتىنە جۇيەلى كوزقاراس بۇگىندە وتە وزەكتى تاقىرىپ، ويتكەنى ول ۇزدىك الەمدىك تاجىريبەنى ەسكەرەتىن ISO 50001 ستاندارتىنىڭ ۇسىنىمدارىن ەسكەرە وتىرىپ ۇردىستەردى قۇرۋدى كوزدەيدى. ەنەرگيا رەسۋرستارىن باسقارۋ جانە ەنەرگيا ۇنەمدەۋ – قازىرگى كاسىپورىندار ءۇشىن ەڭ وزەكتى ۇردىستەردىڭ ءبىرى، – دەيدى ءدارىس وتكىزگەن «استانالىق ساپا جانە مەترولوگيا ورتالىعى» جاۋاپكەرشىلىگى شەكتەۋلى سەرىكتەستىگىنىڭ وكىلى، ساراپشى-اۋديتور ەلەنا بۋلاتوۆا.
