مەملەكەت باسشىسى قاسىم-جومارت توقايەۆتىڭ باستاماسىنىڭ ءبىرى – «BIRGE» جالپىۇلتتىق اكسياسى. ونداعى باستى ماقسات – ەل تۇرعىندارىنىڭ ۇسىنىس-تىلەكتەرىن جيناقتاپ تىركەۋ جانە جۇرتشىلىق كوتەرگەن ماسەلەلەردى شەشۋ. اكسيا شەڭبەرىندە جامبىل وبلىسى بويىنشا 30 مىڭنان اسا ۇسىنىستار مەن تىلەكتەر تۇسكەن. قازىرگى تاڭدا ولاردىڭ ورىندالۋى بويىنشا ناقتى جۇمىستار اتقارىلۋدا. بارلىعى سارالانىپ، شەشىلۋى ءتيىس ماسەلەلەر جاۋاپتى مەكەمەلەرگە ۇلەستىرىلىپ، ونىڭ جۇزەگە اسۋى بۇگىندە «Nur Otan» پارتياcىنىڭ باقىلاۋىندا الىندى.

-تۇسكەن ۇسىنىس-تىلەكتەردىڭ ءبىرقاتارى باسپانا، جۇمىسسىزدىق، جول جوندەۋ جانە اۋىز سۋ مەن ەلدى مەكەندەرگە كوگىلدىر وتىن جەتكىزۋ ماسەلەلەرى. بايزاق اۋدانىنىڭ تۇرعىندارىنان تۇسكەن ۇسىنىستاردىڭ دەنى اۋىلعا گاز تارتىپ، ونى ۇيدى-ۇيگە كىرگىزۋ قۇنىنىڭ قولجەتىمدى بولۋى. قازىرگى تاڭدا بايزاق اۋدانىندا 43 ەلدى مەكەننىڭ 60 پايىزى كوگىلدىر وتىنمەن قامتىلىپ، تۇرعىندارعا گاز تۇراقتى بەرىلۋدە. اۋدان اۋماعىنداعى گازداندىرىلماعان ەلدى مەكەندەردى كوگىلدىر وتىنمەن قامتۋ ماقساتىندا قازىرگى تاڭدا 9 اۋىلعا گاز قۇبىرىن تارتۋ جۇمىستارى جۇرگىزىلۋدە. بۇل بيىلعى جىلعى مەجە. ال الداعى ەكى جىلدا 21 ەلدى مەكەنگە كەزەڭ كەزەڭىمەن كوگىلدىر وتىن جەتكىزۋ جوسپارلانعان. قۇرىلىس جوباسىنىڭ جالپى قۇنى – 3،46 ميلليارد تەڭگە،- «Nur Otan» پارتياسى جامبىل وبلىستىق فيليالىنىڭ باسپا ءسوز حاتشىسى نۇرجان تۋعانباي.

سونىمەن قاتار، بايزاقتىق تۇرعىنداردى تولعاندىراتىن تاعى ءبىر ماسەلە – اۆتوجولداردىڭ جوندەلۋى. راس، اۋداندى وبلىس ورتالىعىمەن بايلانىستىراتىن ۇلكەن جولدىڭ ءبىرقاتار بولىگى سىن كوتەرمەيدى. سەبەپ تە جوق ەمەس. تاراز قالاسىنا تىكە اپاراتىن كۇرە تامىر دا سول جول. جۇك كولىكتەرى دە ءجيى قاتىنايدى. الايدا، ازاماتتاردىڭ تىلەگىنىڭ ورىندالۋى پارتيا نازارىندا. وبلىستىق ماڭىزى بار «تاراز-سارىكەمەر-تۇيمەكەنت-اقشولاق» اۆتوجولىنىڭ 3،4-4،4 شاقىرىم ارالىعىن جوندەۋ جۇمىستارى كۇن تارتىبىندە تۇر. قازىرگى ۋاقىتتا مەردىگەر كومپانيا انىقتالىپ، قۇرىلىس جۇمىستارى باستالدى. 2،5 ميلليارد تەڭگە قاراجاتتى قۇرايتىن جوبا اياسىندا قولعا الىنعان ءىس كەلەسى جىلى تولىق اياقتالادى دەپ جوسپارلانعان.

سونداي-اق «تاراز-جەتىباي-تەگىستىك-ويىق» اۆتوجولىن جوندەۋ جۇمىستارى دا ءجىتى باقىلاۋدا. جالپى قۇنى 825 ميلليون تەڭگە قاراجاتتى قۇرايتىن قۇرىلىس جۇمىسى بيىل باستالىپ، نىسان الداعى جىلى پايدالانۋعا بەرىلمەك. اتالعان اۆتوجولدىڭ 7-60 شاقىرىم ارالىعىنا ورتا جوندەۋ جۇمىستارىن جاساۋ 2020-2022 جىلدار ارالىعىندا ىسكە اسىرىلادى.

اۆتوموبيل جولدارىن جوندەۋ ماسەلەسى بويىنشا ت.رىسقۇلوۆ اۋدانى تۇرعىندارى دا «BIRGE» جالپىۇلتتىق اكسياسى اياسىندا ۇسىنىس-تىلەكتەرىن جولداعان بولاتىن. جالپى ۇزىندىعى 8،8 شاقىرىمدى قۇرايتىن اۋداندىق ماڭىزى بار ەكى اۆتوجولدى جوندەۋ جوسپارلانىپ، قاراقات اۋىلىنا كىرەبەرىس جول مەن تورەڭوزەك-كوكارىق-شولاق-قايىڭدى اۆتوجولىنا ورتاشا جوندەۋ جۇمىستارى جۇرگىزىلدى. سونداي-اق بيىل اۋدان بويىنشا ۇزىندىعى 22 شاقىرىمنان اساتىن 23 كوشە جولدارى جونگە كەلتىرىلەتىن بولادى. قۇرىلىس جۇمىستارىن قازان ايىندا اياقتاۋ كوزدەلگەن.