اعىمداعى جىلدىڭ باسىنداعى مالىمەت بويىنشا جامبىل وبلىسى تۇرعىندارىنىڭ جالپى سانى 1 ميلليون 125 مىڭ 442 ادامدى قۇرايدى. ال وبلىستىڭ 1 ميلليونىنشى تۇرعىنى وسىدان 14 جىل بۇرىن ت.رىسقۇلوۆ اۋدانىندا دۇنيە ەسىگىن اشقان، دەپ جازادى Qamshy.kz اقپارات اگەنتتىگى.
ت.رىسقۇلوۆ اۋدانىندا تۇراتىن نۇربول تۇستىكبايەۆ پەن شولپان قۇرمانبەكوۆا العاشىندا 2005 جىلدىڭ 23 قىركۇيەگىندە دۇنيە ەسىگىن اشقان ۇلدارى دانيار اسەمقۇلدىڭ ميلليونىنشى جامبىلدىق ەكەنىنەن بەيحابار بولعان.
–2005 جىلدىڭ 23 قىركۇيەگىندە دانياردى دۇنيەگە اكەلدىم. الايدا ول كەزدە جامبىل وبلىسىنىڭ ميلليونىنشى تۇرعىنىنىڭ اناسى اتانعانىمدى بىلگەن جوق ەدىم. تەك ءۇش ايدان سوڭ تۇرار رىسقۇلوۆ اۋداندىق اكىمدىگىنىڭ قىزمەتكەرلەرى كەلىپ ماعان بۇل حاباردى سۇيىنشىلەتىپ جەتكىزدى. جاڭا جىل قارساڭىندا وبلىس اكىمىنىڭ ارنايى قۇتتىقتاۋعا كەلەتىنىن ەستىگەندە قۋانىشىمدا شەك بولمادى. بۇلاي بولادى دەگەن وي ءۇش ۇيىقتاسام تۇسىمە دە كىرمەگەن شىعار. شىنىمەن مەرەكە قارساڭىندا وبلىس اكىمىنىڭ ورىنباسارى ءوڭىر باسشىسىنىڭ ارنايى قۇتتىقتاۋىن جەتكىزىپ، تاراز قالاسىنان ءۇش بولمەلى پاتەردىڭ كىلتى مەن 1 ميلليون تەڭگە كولەمىندە ارنايى سىيلىقتى تابىس ەتتى،– ميلليونىنشى جامبىلدىقتىڭ اناسى شولپان قۇرمانبەكوۆا.
ءقازىر دانيار وتباسىمەن بىرگە تاراز قالاسىندا تۇرادى. ايتپاقشى جامبىل وبلىسىنىڭ ميلليونشى تۇرعىنى نۇربول تۇستىكبايەۆ پەن شولپان قۇرمانبەكوۆانىڭ شاڭىراعىنداعى ەكىنشى پەرزەنت. ول ءبىلىم الاتىن تاراز قالاسىنداعى №53 مەكتەپتىڭ پەداگوگيكالىق ۇجىمى دا دانياردىڭ وقۋدا وزات ەكەنىن العا تارتادى.
جالپى سوڭعى 20 جىلدا جامبىل وبلىسىندا دەموگرافيالىق ءدۇمپۋ بايقالادى. ءححى عاسىردىڭ العاشقى جىلى جامبىلدىقتاردىڭ جالپى سانى 986 144 ادام بولعان. ودان كەيىنگى 3 جىلدا وبلىس حالقىنىڭ سانى 979 199 ادامعا دەيىن ازايىپ كەتكەن. بۇعان تاۋەلسىزدىكتىڭ العاشقى جىلدارىنداعى كوپتەگەن ۇلت وكىلدەرىنىڭ تاريحي وتانىنا ورالۋى مەن جايلى تۇرمىس ىزدەۋ ماقساتىندا ءورىس العان رەسپۋبليكاداعى ىشكى ميگراسيانىڭ اسەر ەتكەنى داۋسىز. بۇل فاكتورلار كۇنى بۇگىنگە دەيىن وبلىس حالقى سانىنىڭ وسىمىنە تەجەۋ بولىپ كەلە جاتقانى داۋسىز. وبلىس تۇرعىندارى نەگىزىنەن نۇر-سۇلتان، الماتى، اقتاۋ قالالارىنا قونىس اۋدارادى. سول سەكىلدى، جۇمىسپەن قامتۋدىڭ جاڭا باعدارلاماسى ەسەبىنەن سولتۇستىككە قونىس اۋدارۋشىلاردىڭ سانى دا ەداۋىر ۇلعايعان.
