وسىدان تۋرا بەس جىل بۇرىن وبلىس جۇرتشىلىعى تالاس اۋدانىنداعى «امانگەلدى گاز» كەن ورنى ماڭىنان «جارقۇم» كەن ورنىنىڭ اشىلۋ سالتاناتىنا كۋا بولدى. سول تۇستا وبلىستاعى گاز-كەن ءوندىرىسى سالاسىنا تىڭ سەرپىن بەرگەن جاڭا كەن ورنىنىڭ اشىلۋىمەن وڭىردەگى ەلدى مەكەندەردى كوگىلدىر وتىنمەن قامتۋ ءىسى كۇش الاتىندىعى ايتىلعان بولاتىن. راسىندا وسى 5 جىل ىشىندە «جارقۇم»گازى مىڭداعان جامبىلدىقتىڭ يگىلىگىنە جارادى، دەپ جازادى Qamshy.kz اقپارات اگەنتتىگى. 

جالپى جامبىل وبلىسى وڭىردەگى گاز ءوندىرۋ ءىسىنىڭ الپاۋىت سانالاتىن «امانگەلدى گاز» كەن ورنىنان جىلىنا 330 مييليون تەكشە مەتر گاز بەرەدى. كەن ورنى پايدالانۋعا بەرىلگەن العاشقى 10 جىلدىڭ وزىندە مۇندا وندىرىلگەن 3،5 ميلليارد تەكشە مەتر گاز وندىرىستىك، تۇرمىستىق قاجەتتىلىكتەرگە جۇمسالعان ەكەن. ال 2014 جىلى 4 بۇرعىلاۋ قوندىرعىسىمەن ىسكە قوسىلعان «جارقۇم» كەن ورنى جىلىنا 65 ميلليون گاز بەرۋگە قابىلەتتى. بۇل كەن ورنى ەل يگىلىنە بەرىلگەن العاشقى جىلدارى مۇندا 30-عا جۋىق ادام ەڭبەك ەتكەن. كەن ورنىنىڭ نەگىزگى ماقساتى 2000 مەتر تەرەڭدىكتەگى كوگىلدىر وتىن وندىرىسىنە جول اشىپ، ونى جاقىن ماڭداعى تالاس، بايزاق اۋداندارى تۇرعىندارىنىڭ يگىلىگىنە اينالدىرۋ بولدى. سونداي-اق كەن ورنىنىڭ اشىلۋىمەن تالاس، بايزاق اۋداندارى مەن تاراز قالاسىنىڭ كوگىلدىر وتىنمەن قامتىلماعان بولىكتەرىن گازداندىرۋ ءىسى سونى سەرپىن الدى. سول سەكىلدى، وندىرىستىك قالا سانالاتىن جاڭاتاس قالاسىنا قاراتاۋ قالاسى ارقىلى گاز جەتكىزۋ دە جوسپارلاندى.

جالپى وتكەن جىلى جامبىل وبلىسىندا ەلدى مەكەندەردى گازداندىرۋعا وبلىستىق بيۋدجەتتەن 344 ميلليون تەڭگە، رەسپۋبليكالىق بيۋدجەتتەن 2 ميلليارد تەڭگە قارجى قاراستىرىلدى. اتالعان قارجىعا تالاس اۋدانىنىڭ 5 ەلدى مەكەنى مەن سارىسۋ اۋدانىنىڭ 4 ەلدى مەكەنىنە گاز قۇبىرى تارتىلدى. اعىمداعى بۇل جۇمىستاردى تولىق اياقتاۋعا وبلىستىق بيۋدجەتتەن 22 ميلليون تەڭگە، رەسپۋبليكالىق بيۋدجەتتەن تاعى 198 ميلليون تەڭگە ءبولىنىپ ماقساتتى يگەرىلۋدە.سونداي-اق بيىل بايزاق اۋدانىن گازبەن قامتاماسىز ەتۋ ءۇشىن وبلىستىق بيۋدجەتتەن 1 ميلليارد 365 ميلليون تەڭگە ءبولىندى. بۇل قارجى اۋدانداعى 10 ەلدى مەكەندى كوگىلدىر وتىنمەن قامتۋ ىسىنە جۇمسالاتىن بولادى.

مۇنان بولەك جامبىل اۋدانىنىڭ 13 ەلدى مەكەنىن گازداندىرۋ ءۇشىن رەسپۋبليكالىق بيۋدجەتتەن 300 ميلليون تەڭگە، وبلىستىق بيۋدجەتتەن 33،3 ميلليون، ال جۋالى اۋدانىنىڭ 15 ەلدى مەكەنىن گازداندىرۋ ءۇشىن رەسپۋبليكالىق بيۋدجەتتەن 704 ميلليون تەڭگە وبلىستىق بيۋدجەتتەن وسىنىڭ 70 ميلليون تەڭگە كولەمىندە قارجى قارالدى. سارىسۋ اۋدانىنىڭ ەلدى مەكەندەرىن، جاڭاتاس قالاسىن گازداندىرۋ ءۇشىن «شايان –«ەۆرو-حيم»-جاڭاتاس» جوعارى قىسىمدى گاز قۇبىرى قۇرىلىسى ارقىلى شەشىلمەك. بۇل جوباعا باستاۋ ءۇشىن 3 ميلليارد تەڭگە ءبولىندى. ناتيجەسىندە وڭىردەگى ەلدى مەكەندەردى گازداندىرۋ ماسەلەسى الداعى 7-8 جىلدا تولىعىمەن ءوز شەشىمىن تاپپاق.