وتكەن عاسىردىڭ العاشقى جىلدارىندا قازاق دالاسىندا يندۋستريالاندىرۋدىڭ تۇڭعىش قادامى تەمىر جول جەلىلەرىنىڭ قۇرىلىسىمەن باستالعانى ءمالىم. ال جامبىل وڭىرىندەگى العاشقى تەمىر جول جەلىسى بۋرنىي ستانسياسىنا 1917 جىلى جەتتى. وسىلايشا توعىز جولدىڭ تورابىنداعى ولكە جامبىل وبلىسىندا تەمىر جول قىزمەتىنىڭ تاريحى باستالدى، دەپ جازادى Qamshy.kz اقپارات اگەنتتىگى.
جالپى قازاقستانداعى تەمىر جول قىزمەتىنىڭ تاريحى 1904 جىلدان باستاۋ الادى. ءدال وسى جىلى ورەنبۋرگ-تاشكەنت تەمىر جول باعىتىنىڭ سولتۇستىك بولىگىنىدە ورەنبۋرگ قازالى باعىتى اشىلدى. بۇل تەمىر جول جەلىسى سول جىلداردىڭ وزىندە جولاۋشىلار مەن جۇك تاسىمالىنىڭ لوكوماتيۆىنە اينالىپ ۇلگەرگەن بولاتىن. ال 1912 جىلى ارىس ستانسياسىنان بىشكەك ستانسياسىنا دەيىن سەميرەچەنسكيي جول ءبولىمىنىڭ قۇرىلىسى باستالدى. 5 جىل وتكەن سوڭ وسى جەلى جامبىل وبلىسىنىڭ اۋماعىنا ءوتىپ قازىرگى جۋالى تەمىر جول بەكەتىنە جەتتى. ءدال وسى تاريحي وقيعادان 3 جىل ۋاقىت وتكەن سوڭ ياعني 1920 جىلدىڭ 28 قاراشاسىندا قوزعالىس قۇرامى اۋليە-اتا ستانسياسىنا كەلدى. 1924 جىلى وسى ستانسيادا ۆاگوندارعا تەحنيكالىق قىزمەت كورسەتەتىن دەپونىڭ قۇرىلىسى جۇرگىزىلدى. ودان سوڭ اۋليە-اتا تەمىر جول جەلىسى ارقىلى وتاربا قىرعىزستاننىڭ استاناسىن بىشكەك قالاسىنا قاراي باعىت ءتۇزدى. 1930 جىلى كەڭەس وداعىنىڭ يندۋستريالاندىرۋ تاريحىندا عاسىر قۇرىلىسىنا بالانعان تۇركىسىبتىڭ قۇرىلىسى اياقتالدى. بۇل الىپ قۇرىلىستىڭ باس-قاسىندا كورنەكتى مەملەكەت جانە قوعام قايراتكەرلەرى مۇحامەدجان تىنىشبايەۆ، تۇرار رىسقۇلوۆ سىندى الاش ارداقتىلارى دا تابىلدى.
ءقازىر جامبىل تەمىر جول بەكەتىنىڭ جىلدىق جۇك تاسىمالانىڭ كولەمى شامامەن 80 ميلليون تەڭگەنى قۇرايدى. ءارى ينفراقۇرىلىمدىق جەتىلدىرۋ ناتيجەسىندە وڭىردەن جۇك پويىزدارىنىڭ ءجۇرىپ ءوتۋ ۋاقىتى ەكى ەسەگە دەيىن ازايعان.
بۇگىندە «جامبىل جول بولىمشەسى» فيليالى قازاقستاندىق تەمىر جول جەلىسىندەگى شىعىس پەن باتىستى، ازيا مەن ەۋروپانى بايلانىستىراتىن التىن كوپىر سانالادى. وڭىردە شۋ-وتار تەمىر جول تەلىمىندەگى ەكىنشى تەمىر جولدىڭ قۇرىلىسى ەسەبىنەن تەمىر جول قىزمەتىنىڭ وتكىزۋ قابىلەتتىلىگىن تاۋلىگىنە 68 پويىزعا دەيىن كوتەرۋگە قول جەتكىزىلدى. سول سەكىلدى جامبىل تەمىر جول بەكەتىنىڭ جولاۋشىلار تاسىمال سالاسىنداعى ءرولى وراسان زور.
