«ايشا ءبيبى»، «تەرىس-اششىبۇلاق» اسكەري پوليگوندارىندا قازاقستان-رەسەي وقۋ-جاتتىعۋ جيىنى ۇيىمداستىرىلدى. شاراعا قوس ەلدىڭ تاۋ جاعدايىندا ۇرىس-قيمىلدارىن جۇرگىزۋگە بەيىم اسكەري قۇرامالارى قاتىستى. ءبىر قىزىعى بۇل وقۋ جاتتىعۋ جيىنىنا رەسەي جاقتان كەلگەن 150 اسكەري قىزمەتشى تىۆا رەسپۋبليكاسىنان باستالعان 3000 شاقىرىم جولدى جاياۋ ءجۇرىپ وتكەن، دەپ جازادى Qamshy.kz اقپارات اگەنتتىگى. 

قازاقستان جاقتان بۇل وقۋ جاتتىعۋ جيىنىنا قازاقستان رەسپۋبليكاسى قارۋلى كۇشتەرىنىڭ جاياۋ اسكەرى، «وڭتۇستىك» وڭىرلىك قولباسشىلىعىنىڭ تاۋلى-قورىقشى اسكەري جاساعىنىڭ جەكە قۇرامى، سونداي-اق ۇلتتىق قاۋىپسىزدىك كوميتەتىنىڭ شەكارا قىزمەتىنىڭ «وڭتۇستىك» قولباسشىلىعىنىڭ شەكاراشىلارى، جامبىل وبلىستىق توتەنشە جاعدايلار قىزمەتىنىڭ جاساقتارى قاتىسىپ، وزدەرىنىڭ قارىم-قابىلەتتەرىن جوعارى دەڭگەيدە كورسەتە ءبىلدى. ال رەسەي فەدەراسياسىنان بۇل جيىنعا ورتالىق اسكەري وكرۋگىنىڭ 41 جالپىاسكەري بريگاداسىنىڭ 55-تاۋ موتواتقىشتار بريگاداسىنىڭ جەكە قۇرامى قاتىسقان.

وقۋ-جاتتىعۋ جيىنىندا بارلاۋ ارەكەتتەرىن جۇرگىزۋ، قارسىلاستى اڭدۋ، زاڭسىز قارۋلانعان قۇرىلىمداردىڭ بازاسىن بۇعاتتاۋ جانە جويۋ، قارۋلى قاراقشىلار باسىپ العان ەلدى مەكەندەرگە شابۋىل جاساۋ كەزىندەگى اسكەري قۇرامالاردىڭ دايىندىعى پىسىقتالدى. ول ءۇشىن ءدال وسىنداي وقىس جاعدايعا ۇقساس ۇرىس-قيمىلدارى ۇيىمداستىرىلدى. وندا قارۋلانعان توپ شەكارانى كەسىپ ەتۋگە ارەكەتتەندى. قارۋلى قاراقشىلاردىڭ كەيپىنە «وڭتۇستىك» وڭىرلىك قولباسشىلىعىنىڭ اسكەريلەرى ەندى.

–وڭىردەگى اسكەري-ساياسي تۇراقتىلىقتى نىعايتۋ ماقساتىندا ءبىز ءارقاشان كەز كەلگەن ءقاۋىپ پەن قاتەرگە دايىن بولۋىمىز قاجەت. قاۋىپسىزدىككە تونگەن قاتەردىڭ كەز كەلگەن تۇرىنە جەدەل توتەپ بەرۋ ماقساتىندا وسىناۋ بىرلەسكەن وقۋ-جاتتىعۋ جيىندارىن وتكىزۋدەمىز، –دەدى «وڭتۇستىك» وڭىرلىك قولباسشىلىعىنىڭ قولباسشىسى قايدار قاراقۇلوۆ.

جالپى تاۋ جاعدايىنداعى ۇرىس قيمىلدارىنىڭ بارلىق الگوريتمدەرى پىسىقتالعان بىرىلەسكەن وقۋ-جاتتىعۋ جيىنى «ايشا ءبيبى» جانە «تەرىس-اششىبۇلاق» اسكەري پوليگوندارىندا ەكى اپتا بويى وتكىزىلدى. وعان 100 اسكەري تەحنيكا جۇمىلدىرىلدى. ونىڭ 40 داناسىن رەسەي اسكەريلەرى الىپ كەلگەن.

سونداي-اق وقۋ جاتتىعۋ جيىنىنىڭ باستى ەرەكشەلەگى «وڭتۇستىك» وڭىرلىك قولباسشىلىعىنا قاراستى 91 678 اسكەري ءبولىمى جاۋىنگەرلەرىنىڭ جاۋىنگەرلىك دايىندىعىنىڭ سىنالۋى بولدى. ويتكەنى، بۇل قۇرىلىم ەلىمىزدەگى اتتى جاساعى بار بىردەن-بىر اسكەري ءبولىم سانالادى. وقۋ-جاتتىعى جيىنى كەزىندە اتتى اسكەريلەر وق-دارىلەرلەر ۇرىس-قيمىلدارى جۇرگىزىلىپ جاتقان تاۋدىڭ تەحنيكا جۇرۋگە قابىلەتسىز اۋماقتارىنا تاسىمالدادى.