تاۋەلسىز قازاقستاننىڭ ءتول تەڭگەسىن اينالىمعا ەنگىزۋ تۋرالى زاڭعا 1993 جىلدىڭ 12 قاراشاسىندا قول قويىلدى. ارادا ءۇش كۇن وتكەن سوڭ قازاقستاندىقتار جاپپاي ساۋدا جاساۋ، ەسەپ ايىرىسۋ كەزىندە ءتول ۆاليۋتانى قولدانا باستادى. وسى ءبىر تاريحي وقيعا تاريحي تاراز جەرىندە باستاۋ العان ەدى، دەپ جازادى Qamshy.kz اقپارات اگەنتتىگى. 

29 جىل بۇرىن قازاقستانداعى جاڭا ۆاليۋتانى ەنگىزىلۋىمەن ەلىمىزدە تاۋەلسىزدىگىمىزدى، ءبىرتۇتاستىعىمىزدى ايشىقتايتىن تاعى ءبىر ءتول بەلگىمىز پايدا بولدى. وسىناۋ تاريحي وقيعانىڭ تاراز جەرى تاريحىندا وزىنشە ءىز قالدىرعانىن بۇگىندە بىرەۋ بىلسە، بىرەۋ بىلمەيدى. شىنىندا 2000 جىلدان استام تاريحى بار تاراز قالاسىندا تيىنداردى سوعۋ ءىسى سوناۋ VI-VIII عاسىردا كەڭ قانات جايعانىن ارحەولوگيالىق قازبا جۇمىستارى ايعاقتايدى. ءدال وسى تاريحي وقيعامەن ساباقتاسىپ، تاۋەلسىز قازاقستاننىڭ ءتول تەڭگەسى دە تاراز قالاسىنا العاش تابان تىرەپ، وتە قۇپيا وپەراسيا رەتىندە رەسپۋبليكانىڭ تۇپكىر-تۇپكىرىنە جول تارتتى.

–ەلباسى ۇلتتىق ۆاليۋتانى قولدانىس ەنگىزۋ جايلى شەشىم شىعارعان سوڭ ونىڭ نوبايىن جاساۋ ءۇشىن ارنايى ماماندار توبى جاساقتالدى. 1992 جىلى العاشقى بانكنوتالار ۇلىبريتانياداعى 400 جىلدان بەرى وسى سالاعا ماماندانعان «حارريسون جانە ونىڭ ۇلدارى» كومپانياسىندا باسىلىپ شىعارىلدى. ال 1993 جىلى 12 قاراشادا «قازاقستان رەسپۋبليكاسىندا ۇلتتىق ۆاليۋتانى ەنگىزۋ» تۋرالى جارلىققا قول قويىلىپ، ءۇش كۇننەن سوڭ قازاقستاندىقتار تولىعىمەن تەڭگەنى پايدالانۋعا كوشتى. ماعان وسىناۋ شاقتا ۇلتتىق بانكتىڭ وبلىستىق فيليالىنىڭ ديرەكتورى رەتىندە اۋقىمدى جۇمىستاردىڭ باسى-قاسىندا ءجۇرۋ باقىتى بۇيىردى.

قازىرگى تاراز قالاسىنداعى ۇلتتىق بانكتىڭ وبلىستىق فيليالى ورنالاسقان عيمارات كەڭەس وداعى تۇسىندا مەملەكەتىك بانك قويماسىنىڭ ورتالىق ازياداعى №2 قويماسى بولعان.ماسكەۋدەن كەلگەن اقشا وسى جەردەن وداقتاس ەلدەردىڭ ورتالىق ازيادا ورنالاسقان بولىكتەرىنە تارايتىن. سوندىقتان ەلىمىزدىڭ ءتول ۆاليۋتاسىن قولدانىسقا ەنگىزۋ كەزىندە دە قازاقستانداعى ەڭ ۇلكەن قويماسى بانك رەتىندە تاڭداۋ تاراز قالاسىنا ءتۇستى. سايكەسىنشە انگليادا باسىلعان بانكنوتتار اپتاسىنا ءبىر رەت ارنايى ۇشاقپەن بىردەن تارازعا جەتكىزىلىپ وتىردى. ارينە بۇل ارەكەتتەردىڭ بارلىعى وتە قۇپيا تۇردە جۇرگىزىلدى، –دەيدى سول كەزدەرى ق ر ۇلتتىق بانكىنىڭ وبلىستىڭ فيليالىن باسقارعان ايدايبەك حاليمبەتوۆ.

ۇلتتىق ۆاليۋتانىڭ 20 جىلدىعى قارساڭىندا ق ر ۇلتتىق بانكىنىڭ وبلىستىڭ فيليالى عيماراتىنىڭ الدىندا ءتول تەڭگەنىڭ كۇللى قازاقستانعا وسى جەردەن تارالعانىن ايعاقتايتىن ارنايى ستەلا ورناتىلعان.