كىسىگە قايىرىمدىلىق جاساۋدا قازاقتاي جاناشىر، قازاقتاي مەيىربان ۇلت جوق شىعار. وزگەنىڭ قايعىسىن، مۇڭ-زارىن ءوزى باستان وتكىزگەندەي بولاتىن ءبىزدىڭ حالىق جەتىم مەن جەسىردى جىلاتپاۋدى قادىم زاماننان تۇسىنگەن. بۇگىندە ارامىزدا وسى ءبىر قانعا سىڭگەن قاسيەتتەن اينىماي جۇرگەن زامانداستارىمىز جەتكىلىكتى. ت.رىسقۇلوۆ اۋدانىنىڭ تۇرعىنى بوتاگوز باكەيەۆا 9 بالانى باۋىرىنا باسىپ، قامقورلىعىنا العان جان، دەپ جازادى Qamshy.kz اقپارات اگەنتتىگى. 

بوتاگوز بولات قىزى ت.رىسقۇلوۆ اۋدانى اكىمدىگىنىڭ ءبىلىم بولىمىندە ادىسكەر بولىپ ەڭبەك ەتەدى. ءوز قىزمەتىندە بۇلدىرشىندەردىڭ مەكتەپكە دەيىنگى ءبىلىمى مەن تاربيەسىمەن اينالىساتىن ماماننىڭ 4 بالاسى بار. وعان قوسا ول وبلىستىق ومىرلىك قيىن جاعدايداعى بالالاردى قولداۋ مەكەمەسى مەن «ءۇمىت» بوبەكتەر ءۇيىنىڭ تاربيەلەنۋشىسى بولعان 9 بالانى پاتروناتتىق تاربيەگە العان. كەيبىرەۋلەر جاتىرىنا بىتكەن بالانى ومىرگە اكەلۋدە تۇرمىستىق جاعدايدى العا تارتاتىن شاقتى 13 بالانىڭ اسىل اناسى اتانعان ب.بولات قىزىنىڭ بۇل ارەكەتىن شىنىندا باتىل قادام دەپ باعالاۋ بولادى. ال ونىڭ ءوزى بۇل ارەكەتىن بالا كۇنىنەن وتباسىندا جالعىزىلىكتى بولىپ وسۋىمەن بايلانىستىرادى.

–مەن 10 جاسىما دەيىن ۇيدەگى جالعىز بالا بولدىم. ءىنىم 10 جىلدان كەيىن دۇنيە ەسىگىن اشتى. ەسىمدى بىلگەن شاقتان كورشى ءۇيدىڭ بالالارى باۋىرلارىمەن اسىر سالىپ ويناپ جاتقاندا ولارعا قىزىعا دا قىزعانا دا قارايتىنىن. سول كەزدەن وزىمە كوپ بالالى انا اتانامىن دەگەن ماقسات قويدىم. مىنە جاقىندا وسى ارمانىم ورىندالعانداي بولدى. ءوزىم اللانىڭ بەرگە 4 بالاسىن دۇنيەگە اكەلىپ، تاربيەلەدىم. وعان قوسا جولداسىممەن اقىلداسىپ 9 بالانى پاتروناتتىق تاربيەگە الۋعا ۇيعاردىق.

راسىندا بۇل ىسكە بەكىنگەندە مۇمكىندىك بولسا قازاق بالالارىن اسىراپ الۋدى دۇرىس كوردىك. الايدا ومىرلىك قيىن جاعدايداعى بالالاردى قولداۋ مەكەمەلەرىنىڭ ءبىرقاتارىندا بولعانىمىزبەن ولاردا قاراكوز قازاق بۇلدىرشىندەردى تابۋ مۇمكىن بولمادى. اقىرى ۇلكەندەردىڭ كەلىسىمىمەن وزگە ۇلت وكىلدەرىنەن تۋعان بالالاردى دا قامقورلىققا الۋدى ءجون سانادىق،–دەيدى ب.بولات قىزى.

بوتاگوز كەلىن بولىپ تۇسكەن ءسابيتباي اقساقال مەن دينا اجەيدىڭ كىندىگىنەن تاراعان ۇل-قىزدارىنان 11 نەمەرەسى بار.

–ولاردىڭ قاتارىن تاعى 9 ءبۇلدىرشىن تولىقتىرىپ، قۋانىشىمىز ەسەلەنە ءتۇستى. ءتۇر-تۇسى باسقا دەمەسەڭ بۇل بالالار قازاق ءتىلىن ەركىن مەڭگەرگەن. اراسىندا قازاق سىنىپتارىندا وقىپ جۇرگەندەرى دە بار ەكەن. اعايىن-تۋىس، دوس-جاران باۋىرجان مەن بوتاگوزدىڭ بۇل شەشىمدەرىن قوس قولداپ قولدايدى،–دەيدى دينا اجەي.

جالپى وبلىستاعى اۋدانداردا بۇعان دەيىن يسايەۆتار سياقتى 9 بىردەي بالانى باۋىرىنا باسقان وتباسى بولماعان ەكەن. ءوز كەزەگىندە وبلىستىق ومىرلىك قيىن جاعدايداعى بالالاردى قولداۋ مەكەمەسى تاربيەلەنۋشىلەرى جاڭا وتباسىنا باۋىر باسقانعا دەيىن ءارتۇرلى الەۋمەتتىك جانە پسيحولوگيالىق كومەكتەر كورسەتىپ تۇرادى.