تاراز قالاسىنىڭ اكىمى قايرات دوسايەۆ جامبىلدىق جاس اقىندارمەن جۇزدەستى. شوقان ءۋاليحانوۆ اتىنداعى وبلىستىق امبەباپ عىلىمي كىتاپحاناسىندا وتكەن باسقوسۋعا بۇل كۇندە پوەزيانى جانىنا سەرىك ەتىپ، جاستىق جالىنىن جىرعا قوسىپ، حالىقارالىق ءھام رەسپۋبليكالىق ءمۇشايرالاردا جەڭىمپاز اتانىپ جۇرگەن تالانتتى جاستار قاتىستى. 

قالا اكىمىنىڭ قولداۋىمەن ۇيىمداستىرىلعان ەركىن فورماتتاعى ادەبي كەزدەسۋدى اشىپ بەرىپ، جۇرگىزىپ وتىرعان وبلىستىق «ARAI» گازەتىنىڭ مادەنيەت ءبولىمىنىڭ رەداكتورى، جاس اقىن نۇرجان ءقادىرالى العاشقى ءسوز تىزگىنىن قازاقستان جازۋشىلار وداعى وبلىستىق فيليالىنىڭ ءتوراعاسى، اقىن حاميت ەسامانعا بەردى. ءوز كەزەگىندە حاميت ەربولات ۇلى ارنايى قولداۋ ءبىلدىرىپ، جاستار جىلىندا ءوڭىردىڭ قالام ۇستاعان تالانتتارىنىڭ شىعارماشىلىعىنا جاناشىرلىق تانىتىپ، وسىنداي يگى شارانى ۇيىمداستىرىپ وتىرعان قايرات اسكەربەكۇلىنا العىس ايتىپ، ءبىرقاتار ۇسىنىس، وي-پىكىرىن جەتكىزدى.

ءسوز بارىسىندا قازاقستان جازۋشىلار وداعى وبلىستىق فيليالىنىڭ ءتوراعاسى جەرگىلىكتى جاس اقىنداردىڭ جەكە جيناق كىتاپتارىن شىعارۋعا قالا اكىمدىگى تاراپىنان قولداۋ بولسا، سونىمەن قاتار قازىرگى وتاندىق پوەزيا كەڭىستىگىندە ەسىمى ەلگە، تالانتى حالىققا مويىندالعان تارازدىق اقىن ەرلان جۇنىسپەن كەزدەسۋ ۇيىمداستىرىلسا جانە رۋمي مەن رۋداكيدەن باستاپ شىعىستىڭ شوق جۇلدىزدى شايىرلارى مىڭداعان جىل جىرلاعان كيەلى تاراز قالاسىندا پوەزيالىق فورۋم وتسە دەگەن وزەكتى ۇسىنىستارىن ورتاعا سالدى.

بۇل رەتتە شاھار باسشىسى جاستاردىڭ شىعارماشىلىعىن قولداۋ ماسەلەسى مۇمكىندىگىنشە نازاردا بولاتىنىن ايتتى. بۇدان كەيىن تالات تىزگىنىندەگى اقىندار تابيعات ابايىلدايەۆ، دانيار ءالىمقۇل، نۇربولات ساتىمقۇل،  ارايلى جاقسىلىق، عاينيكەن رايىمبەكوۆا، شاپاعات ءابدىر، جۇماتاي كوكسۋباي، نازەركە يسرايلوۆا،ەلدار بورانبەك، ايان قۋات،مارال حانتورە قىزى، نازەركە وڭعار، بەكسۇلتان قوشتايەۆ، ارۋجان قۋات ءنازيرالى ناركەس جىردان نوسەر توكسە، وسى قاتاردا ءوز ولەڭىن وقىعان جاس اقىن نۇرلان ابدىكارىم «قۇلاقتان كىرىپ، بويدى الار» اۋەزدى اننەن شاشۋ شاشتى.

جىر كەرۋەنىن جالعاعان نۇرجان ءقادىرالى تارازعا ارناعان تولعاۋىن وقىپ، قالامداس، زامانداستارىنىڭ قوشەمەتىنە بولەندى. جيىندى قورىتىندىلاعان قايرات اسكەربەك ۇلى قازىرگىدەي ۋاقىتتا ومىردەن ءوز ورنىن تابا الماي جۇرگەن جاستاردىڭ بار ەكەنىن تىلگە تيەك ەتىپ، وسى رەتتە قازاق ادەبيەتىنىڭ كەلەشەگىنە قالاممەن جول سالىپ، تامشىداي بولسا ۇلەس قوسىپ جۇرگەن جاس اقىندارعا العىسىن جەتكىزدى. قالا باسشىسى قازاقتىڭ بىرنەشە كورنەكتى اقىندارىنىڭ ولەڭىنەن جاتقا ءۇزىندى وقىپ، شىعارماشىل جاستاردى تارازدىڭ وزىندىك ءانۇرانىنا اينالارلىق تۋىندى جازۋعا شاقىردى. كادەسىي رەتىندە بارلىق قاتىسۋشىلارعا ابايدىڭ قۇندى قارا سوزدەرى جيناعىن تارتۋ ەتتى.