تاراز قالاسىنداعى «عىلىمي-كلينيكالىق كارديوحيرۋرگيا جانە ترانسپلانتولوگيا ورتالىعى» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى، تانىمال كارديولوگ سەيىتحان جوشىبايەۆ قىرعىزستان رەسپۋبليكاسى پرەزيدەنتى ساۋرانباي جيەنبەكوۆتىڭ قولىنان اتالعان ەلدەگى جوعارى ماراپاتتىڭ ءبىرى سانالاتىن «دوستىق» وردەنىن الدى. بۇل وردەن جەرلەسىمىزگە جۇزدەگەن قىرعىزستاندىقتىڭ ءومىرىن قۇتقارعانى جانە اتالعان ەلدەگى مەديسينالىق قىزمەتكەرلەردى دايىنداۋعا قوسقان ۇلەسى ءۇشىن بەرىلگەن، دەپ جازادى Qamshy.kz اقپاراتتىق اگەنتتىگى.

1939 جىلى جامبىل وبلىسىنىڭ تۇرار رىسقۇلوۆ اۋدانى، اقىرتوبە اۋىلىندا دۇنيە ەسىگىن اشقان سەيىتحان جوشىبايەۆ شىنىندا قىرعىزستان مەديسيناسىنا كوپ ەڭبەك ءسىڭىردى. بۇل ماراپاتقا دەيىن تانىمال كارديولوگ قىرعىزستاننىڭ ەڭبەك سىڭىرگەن دارىگەرى اتاعىن يەلەنگەن ەدى. سونداي-اق كەڭەس وداعىنىڭ دەنساۋلىق ساقتاۋ ءىسىنىڭ ۇزدىگى دەپ تە تانىلدى. 2006 جىلدان بەرى سەيىتحان جوشىبايەۆ تاراز قالاسىنداعى «عىلىمي-كلينيكالىق كارديوحيرۋرگيا جانە ترانسپلانتولوگيا ورتالىعى» جاۋاپكەرشىلىگى شەكتەۋلى سەرىكتەستىگىنە جەتەكشىلىك ەتەدى.

ايتا كەتۋ كەرەكايىر قالپاقتى اعايىننىڭ ەڭ جوعارى مەملەكەتتىك ناگراداسىن يەلەنگەن قازاقستاندىق دارىگەر جوعارى مەديسينالىق ءبىلىمدى دە بىشكەك قالاسىنان العان. ول 1962 جىلى سول كەزدەگى فرۋنزە قالاسىنداعى قىرعىسزتاننىڭ مەملەكەتتىك مەديسينا ينستيتۋتىن ءتامامداعان. وسىدان سوڭ سەيىتحان جوشىبايەۆ دەنساۋلىق ساقتاۋ ءىسىنىڭ ەڭ كۇردەلى سالاسىمەن شىنداپ اينالىسۋعا كىرىسەدى. 5 جىل بويى قىرعىزستاننىڭ نارىن، تالاس قالالارىندا دارىگەردىڭ اسسيسەنتى، دارىگەر ورديناتور بولىپ ەڭبەك ەتەدى.كەيىننەن ءبىلىمىن ماسكەۋ قالاسىندا جەتىلدىرىپ، ونداعى جۇرەك-قان تامىرلارى عىلىمي-زەرتتەۋ ينستيتۋتىنىڭ اسپيرانتۋراسىن بىتىرەدى. ماسكەۋدەن قايتا ورالىپ، قىرعىزستانداعى ءتۇرلى مەديسينالىق ۇيىمداردا ءبولىم مەڭگەرۋشىسى، رەسپۋبليكالىق كلينيكالىق اۋرۋحانادا حيرۋرگ، قىرعىزستان مەملەكەتتىك مەديسينا ينستيتۋتىندا كافەدرا مەڭگەرۋشىسى لاۋازىمدارىن اتقاردى.

سەيىتحان جوشىبايەۆ اراعا شيرەك عاسىر ۋاقىت سالىپ، قازاقستانعا قايتا ورالىپ، الماتىداعى سىزعانوۆ اتىنداعى جۇرەك-قان تامىرلارى ينيستيتۋتىنىڭ جەتەكشىلىك جاسايدى. مۇنان كەيىن تۋعان جەرى جامبىل وبلىسىنا كەلىپ، تاراز قالاسىنداعى «عىلىمي-كلينيكالىق كارديوحيرۋرگيا جانە ترانسپلانتولوگيا ورتالاعىنا» باسشىلىق ەتتى. بۇل مەكەمە بۇگىندە رەسپۋبليكاداعى جۇرەكتى ەمدەۋ ىسىندەگى جەتەكشى مەديسينالىق ۇيىم سانالادى. تانىمال كارديولوگتىڭ قازاقستاندىق مەديسيناعا سىڭىرگەن ەڭبەگى دە ەسكەرۋسىز قالعان ەمەس. ول 2001 جىلى «ەرەن ەڭبەگى ءۇشىن» مەدالىن يەلەنسە، 2008 جىلى ەلىمىزدەگى جوعارعى مەملەكەتتىك ماراپات سانالاتىن «پاراسات» وردەنى مەن ماراپاتتالدى. كەيىننەن «قازاقستان تاۋەلسىزدىگىنە 20 جىل»، ءىى دارەجەدەگى «بارىس» وردەنىنىڭ يەگەرى اتاندى.